અમરેલી: ખેતરમાં રમતી બાળકી પર 3 શ્વાનોનો રાક્ષસી હુમલો, પિતાની નજર સામે 7 વર્ષની દીકરીને ફાડી ખાધી | 7 Year Old Girl Death to Stray Dogs Attack in Vadiya’s amreli
Amreli News: અમરેલી જિલ્લામાં વન્ય પ્રાણીઓના હુમલાની ઘટનાઓ વચ્ચે હવે રખડતા શ્વાનોનો પણ આતંક વધી રહ્યો છે. વડિયા તાલુકાના ખાન ખીજડીયા ગામે એક કાળજું કંપાવી દે તેવી ઘટના સામે આવી છે, જેમાં વાડી વિસ્તારમાં રમતી 7 વર્ષની માસૂમ બાળકી પર ત્રણ શ્વાનોએ જીવલેણ હુમલો કરી તેને પિતાની નજર સામે જ મોતને ઘાટ ઉતારી દીધી હતી. શ્વાનોના આ વધતા આતંકથી ખેડૂતો અને શ્રમિક પરિવારોમાં ભારે ફફડાટ વ્યાપી ગયો છે.
ખેતરમાં રમતી બાળકી પર 3 શ્વાનોનો રાક્ષસી હુમલો
પ્રાપ્ત વિગતો મુજબ, વડિયાની ખાન ખીજડીયા ગામે ખેત મજૂરી કરતા પ્રકાશભાઈની 7 વર્ષની દીકરી અંજના વાડીના ખેતરમાં રમી રહી હતી. આ દરમિયાન અચાનક ત્રણ હિંસક શ્વાનો ત્યાં ધસી આવ્યા હતા અને માસૂમ બાળકી પર તૂટી પડ્યા હતા. શ્વાનોએ બાળકીને બચકાં ભરીને લોહીલુહાણ કરી નાખી હતી. આ ભયાનક દ્રશ્ય જોઈ પિતા દોડી આવ્યા હતા, પરંતુ ત્યાં સુધીમાં મોડું થઈ ગયું હતું. હુમલો એટલો ગંભીર હતો કે બાળકીએ પિતાની નજર સામે જ દમ તોડી દીધો હતો.
અગાઉ પણ થયા છે હુમલા
વડિયા પંથકમાં રખડતા શ્વાનો દ્વારા હુમલાની આ કોઈ પ્રથમ ઘટના નથી. અગાઉ પણ અનેક વખત શ્વાનોએ રાહદારીઓ અને બાળકો પર હુમલા કર્યા હોવાના કિસ્સાઓ સામે આવ્યા છે. સિંહ અને દીપડાના ભય વચ્ચે હવે શ્વાનોના આતંકના કારણે ખેત મજૂરોમાં ભયનો માહોલ છે. ગ્રામજનોમાં રોષ જોવા મળી રહ્યો છે કે, શ્વાનોના હુમલાની ઘટના સામે તંત્ર દ્વારા કોઈ નક્કર કાર્યવાહી કરવામાં આવતી નથી.
