યુએસડીટીમાં રોકાણના નામે યુવાન પાસેથી 45.50 લાખ પડાવાયા | 45 50 lakhs were seized from a young man in the name of investment in USDT

જૂનાગઢના યુવાનની રૂપાવટીના કાકા-ભત્રીજા સામે ફરિયાદ ઉઘરાણી કરી : તો પૈસાના બદલામાં કાર આપવા નક્કી કર્યું, બાદમાં ગોંધી રાખી રિવોલ્વર બતાવી ધમકી આપી

જૂનાગઢ, : મૂળ ભેસાણ તાલુકાના ગુજરીયાના અને હાલ જૂનાગઢ રહેતા યુવાનને રૂપાવટીના યુવાને યુએસડીટીમાં રોકાણ કરી ઉંચા વળતરની લાલચ આપી 45.50 લાખ પડાવ્યા હતા. બાદમાં પૈસા પરત ન આપતાં તેના બદલામાં કાર આપવા નક્કી કરીને તેનું લખાણ કરવા વિસાવદર જતા ત્યાં ગોંધી રાખી રિવોલ્વર બતાવી ‘હવે પૈસા માંગશો તો મારી નાખશું’ એવી ધમકી આપી હતી. આ અંગે યુવાને ફરિયાદ કરતા બી ડિવિઝન પોલીસે રૂપાવટીના કાકા-ભત્રીજા સામે ગુનો દાખલ કરી વધુ કાર્યવાહી હાથ ધરી છે.

જૂનાગઢના ઝાંઝરડા રોડ પર રહેતા અને ગેસ એજન્સીમાં ડિલીવરીનું કામ કરતા વનરાજ ઉર્ફે પિન્ટુ જોરૂભાઈ ખાખડીયા (ઉ.વ. 30)ને તેના સબંધી ગૌતમ સુરેશભાઈ વિકમાએ ચારેક માસ પહેલા પોતે યુએસડીટીનું કામ કરતો હોવાનું જણાવીને કહેલું કે ‘તમે પણ રોકાણ કરો, તમને રોજના 2 લાખ રૂપીયાનો નફો અપાવીશ. ભાર્ગવ પણ મારી સાથે કામ કરે છે, તેને ઘણા રૂપીયા મળ્યા છે. ઓછામાં ઓછા 50,000ના યુએસડીટી લેવા પડે અને 45 લાખ જેટલું રોકાણ કરવું પડે.’ વનરાજ તથા તેના ત્રણ મિત્રોએ 45.55 લાખ રૂપિયા ભાગે પડતા કાઢ્યા હતા. ગૌતમના કહેવા મુજબ તે રકમનું અમદાવાદ આંગડીયું કર્યું હતું. વ્હોટસએપ કોલ પર ગૌતમે ‘રૂપિયા મળી ગયા, 10 મિનિટ બાદ તમને ફોન કરૂ પછી બિનાન્સ એપ ડાઉનલોડ કરી લેજો તેના વોલેટમાં 50,000 યુએસડીટી આવી જશે.’ એમ કહ્યા પછી તેનો ફોન આવ્યો ન હતો અને ફોન બંધ આવ્યો હતો. તેણે આપેલા નંબર પર ફોન કરતા તે પણ બંધ હતો.

આ અંગે વનરાજે ગૌતમના પિતા સુરેશભાઈને જાણ કરી હતી અને ત્રણેય રૂપાવટી જવા નીકળ્યા હતા. રસ્તામાં ગૌતમે ફોન કરી ‘કાલે તમારો હિસાબ પતાવી આપીશ’ એવી વાત કરી હતી. તા.3-2-2026 ના ગૌતમ ઝાંઝરડા રોડ પર મળ્યો, પણ ‘સોનાના ચેઈન પર લોન કરાવી પૈસા આપી દઈશ અને જોષીપરામાં મિત્રો પાસેથી પ લાખ લઈને આવું છું’ તેમ કહી ગયા બાદ પરત આવ્યો ન હતો અને ફોન પણ રિસીવ કર્યા ન હતા. ત્યારબાદ પોતે રૂપાવટી હોવાનું કહેતા વનરાજ તથા તેના મિત્રો ત્યાં ગયા હતા. રોકડા પૈસા ન હોવાનું અને કાર તથા જૂનાગઢનું મકાન સંભાળી લેવાનું કહ્યું હતું. બીજા દિવસે વિસાવદર નજીક આવેલા કારખાના પર જતાં માર્ગમાં મળેલા ગૌતમે રોકડા રૂપિયા ન હોવાનું અને થાર 22.50 લાખમાં સંભાળી લેવા તથા બાકીના રોકડા આપશે તેમ વાત કરી 5 લાખ રોકડા આપ્યા હતા. ત્યાં તેના કાકા જયરાજ દેવકુભાઈ વિકમાએ વિડીયો ઉતાર્યો હતો. તા.પના ગૌતમે જૂનાગઢમાં આવી કાર નામે કરાવી દીધી હતી. બાકીના પૈસા થોડા દિવસમાં આપી દેવા કહ્યું હતું. તા.૧૬-ર-ર૦ર૬ના વનરાજ, દેવલ અને જીતુ વિસાવદર જતા ગૌતમ કોર્ટ નજીક આવેલી એક દુકાનમાં લઈ ગયો હતો જ્યાં પૈસાની વાતચીત ચાલી રહી હતી એ દરમ્યાન જયરાજ વિકમાએ ઉશ્કેરાઈ જઈ ગાળો આપી પૈસા દેવાના થતા નથી થાય તે કરી લેજો એમ કહી રિવોલ્વર કાઢી વનરાજના લમણે મુકી જીવતા રહેવું હોય તો થારનું લખાણ કેન્સલ કરાવો બાકી જીવતા જવા નહી દેવા અને વ્યાજના ખોટા કેસમાં ફસાવી દેવાની ધમકી આપી હતી અને કેન્સલ કરાવેલું લખાણ તથા વનરાજના નામનો લીધેલો સ્ટેમ્પ લઈ જતા રહ્યા હતા. આ અંગે આજે વનરાજ ખાખડીયાએ ફરિયાદ કરતા બી ડિવિઝન પોલીસે રૂપાવટીના ગૌતમ ઉર્ફે સુરેશ વિકમા અને તેના કાકા જયરાજ દેવકુ વિકમા સામે ગુનો દાખલ કરી વધુ તપાસ હાથ ધરી છે.