જામનગરમાં 30 વર્ષીય યુવકનું હાર્ટ એટેકથી મોત, સમગ્ર ઘટના CCTVમાં કેદ | Heart Attack Death of 30 Year Old Young Man in Jamnagar
Young Man Dies Of Heart Attack In Jamnagar: હાલના સમયમાં યુવાનોમાં હાર્ટ એટેકનું પ્રમાણ ચિંતાજનક રીતે વધી રહ્યું છે, ત્યારે જામનગરના રામેશ્વરનગર વિસ્તારમાંથી એક હૃદયદ્રાવક કિસ્સો સામે આવ્યો છે. જ્યા 30 વર્ષીય આશાસ્પદ યુવકનું અચાનક હાર્ટ એટેક આવવાને કારણે સેકન્ડોમાં મોત નિપજ્યું છે. આ સમગ્ર ઘટનાના સીસીટીવી (CCTV) ફૂટેજ સામે આવ્યા છે, જે જોઈને લોકો સ્તબ્ધ થઈ ગયા છે.
સેકન્ડોના ભાગમાં ખેલ ખતમ
મળતી માહિતી અનુસાર, રામેશ્વરનગર વિસ્તારમાં રહેતો 30 વર્ષીય યુવક ઓટલા પર બેઠો હતો. તે અન્ય લોકો સાથે સામાન્ય રીતે વાતચીત કરી રહ્યો હતો અને બધું જ સામાન્ય જણાતું હતું. જોકે, અચાનક જ તેને છાતીમાં તીવ્ર દુઃખાવો ઉપડ્યો હતો. યુવક કંઈ સમજે તે પહેલા જ તે ઓટલા પરથી નીચે ઢળી પડ્યો હતો.
યુવકને ફસડાઈ પડતો જોઈ આસપાસના લોકો અને પરિજનો તાત્કાલિક તેની મદદે દોડી આવ્યા હતા. તેને બચાવવા માટે તાત્કાલિક હોસ્પિટલ ખસેડવાની તજવીજ હાથ ધરવામાં આવી હતી, પરંતુ હોસ્પિટલ પહોંચે તે પહેલા જ યુવકનું મોત નીપજ્યું હતું. તબીબોના પ્રાથમિક રિપોર્ટ અનુસાર, મોતનું કારણ હાર્ટ એટેક હોવાનું સામે આવ્યું છે.
આ પણ વાંચો: અમદાવાદના ફતેહવાડીમાં બે ઘરઘાટી મહિલાઓએ 12.25 લાખના દાગીના-રોકડની ચોરી કરી
સ્તબ્ધ કરી દેતા CCTV ફૂટેજ
આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ છે. વીડિયોમાં જોઈ શકાય છે કે યુવક તદ્દન સ્વસ્થ અવસ્થામાં બેસીને વાતો કરી રહ્યો છે અને અચાનક જ તે મોતને ભેટે છે. આ ફૂટેજ સોશિયલ મીડિયા પર વાયરલ થતા સ્થાનિક રહીશોમાં ગભરાટ અને ફાળ પડી ગઈ છે.
યુવાનોમાં વધતું જોખમ
માત્ર 30 વર્ષની વયે આ રીતે યુવકનું મોત થતા મેડિકલ ક્ષેત્રે પણ ચિંતા વ્યક્ત કરવામાં આવી રહી છે. જીવનશૈલીમાં ફેરફાર અને સ્ટ્રેસને કારણે યુવાનોમાં હાર્ટ એટેકના કેસો સતત વધી રહ્યા છે, જે સમાજ માટે લાલબત્તી સમાન છે.
