જામનગર શહેર અને જામજોધપુર પંથકમાં જુગાર વિરુદ્ધ પોલીસના બે સ્થળે દરોડા : બે અલગ કાર્યવાહીમાં 10 આરોપીઓ ઝડપાયા | Police raids two places in Jamnagar and Jamjodhpur against gambling: 10 arrested
Jamnagar Gambling Raid : જામનગર શહેર તથા જામજોધપુર પંથકમાં પોલીસ દ્વારા જુગારની પ્રવૃત્તિઓ સામે કડક કાર્યવાહી હાથ ધરતાં બે અલગ અલગ સ્થળોએ દરોડા પાડી કુલ દસ આરોપીઓને ઝડપવામાં આવ્યા છે. બંને બનાવોમાં પોલીસે રોકડ રકમ અને જુગારના સાધનો જપ્ત કરી કાયદેસરની કાર્યવાહી હાથ ધરી છે.
પ્રથમ બનાવમાં જામનગર શહેરના સીટી સી. ડિવિઝન પોલીસ દ્વારા ગોકુલનગર વિસ્તારની પ્રજાપતિ સોસાયટી પાસે જાહેરમાં જુગાર રમાતો હોવાની બાતમીના આધારે દરોડો પાડવામાં આવ્યો હતો. આ દરોડા દરમિયાન કલ્પનાબેન બાબુભાઈ ચુડાસમા નામની મહિલા, ઉપરાંત દિલીપ વશરામભાઈ પાથર, વજશી અરજણભાઈ ગોજિયા, રમેશ પાલાભાઈ વસરા, અને કિશોરભાઈ નાનજીભાઈ વારોતરીયા વગેરે પાંચ આરોપીઓ ગંજીપત્તાના પાનાથી તીનપત્તી નામનો જુગાર રમતા ઝડપાયા હતા. પોલીસે સ્થળ પરથી રોકડ રૂપિયા 14,500 તેમજ જુગારના પાના જપ્ત કર્યા હતા. તમામ આરોપીઓ સામે જુગાર ધારા ભંગની કલમ હેઠળ ગુનો નોંધવામાં આવ્યો છે.
બીજી કાર્યવાહી જામજોધપુર વિસ્તારમાં હાથ ધરવામાં આવી હતી. પોલીસને મળેલી માહિતીના આધારે રાણ વિસ્તારમાં આવેલ ઝાડ નીચે જાહેરમાં જુગાર રમાતો હોવાના આધારે દરોડો પાડવામાં આવ્યો હતો. આ દરમિયાન પાંચ વ્યક્તિઓ કિરણભાઈ સામતભાઈ ડાંગર, ભુપતભાઈ ટપુભાઈ ગોજીયા, કનાભાઇ જીવાભાઇ કરમુર, હેમંતભાઈ પાલાભાઈ અને કાનાભાઈ પોલાભાઈ કરંગીયા ગંજીપત્તાના પાનાથી પૈસાની હારજીત કરતા ઝડપાયા હતા. પોલીસે કુલ રૂપિયા 5,570ની રોકડ રકમ તથા પત્તા જપ્ત કર્યા હતા. જેમાંથી બે આરોપીઓને નોટિસ આપી મુકત કરવામાં આવ્યા છે જ્યારે ત્રણ આરોપીઓને કસ્ટડીમાં લઈ આગળની કાર્યવાહી કરવામાં આવી રહી છે. પોલીસ તંત્ર દ્વારા શહેર અને તાલુકા વિસ્તારમાં આવી ગેરકાયદેસર પ્રવૃત્તિઓ સામે સતત કાર્યવાહી ચાલુ રાખવાની ચેતવણી આપવામાં આવી છે.
