ગોંડલમાં એક જ રાતમાં પાંચ સ્થળે ત્રાટકેલા શિકલીગર ગેંગના બે સભ્યો ઝડપાયા | Two members of Shikligar gang who attacked five places in Gondal in one night arrested
બે ચોરાઉ બાઇક પર જઇ ત્રણ મકાનમાં ત્રાટક્યા હતા
બંને આરોપીઓ લાંબો ગુનાઇત ઇતિહાસ ધરાવે છે, કારમાં ચોરી કરવા આવ્યા હતા
રાજકોટ: ગોંડલ શહેરમાં એક જ રાતમાં બે વાહનની ચોરી કરી તેની ઉપર બેસી ત્રણ મકાનમાં ત્રાટકી તરખાટ મચાવનાર શિકલીગર ગેંગના બે સભ્યો નાનકસિંગ ઉર્ફે કુલદીપસિંગ બલ્લેસિંગ ટાંક (ઉ.વ.૪૫, રહે. ભેસ્તાન, ભીંડી બજાર, સુરત) અને જશબીરસિંગ ઉર્ફે જગવીરસિંગ રાજેશસિંગ ટાંક (ઉ.વ.૨૫, રહે. સ્વામિનારાયણ ગુરુકુળ પાસે, વંથલી)ને એલસીબીએ ઝડપી લીધા હતા.
બંને આરોપીઓ ઝાયલો કાર લઇ ગોંડલ આવ્યા બાદ કારને હાઇવે પર અવાવરૂ જગ્યાએ પાર્ક કરી નજીકમાં આવેલા વિસ્તારોમાંથી બે બાઇકની ચોરી કરી હતી. આ ચોરાઉ બાઇક ઉપર જઇ ગોંડલથી ગુંદાળા રોડ પર વ્રજવાટિકા એપાર્ટમેન્ટમાં રહેતા ટ્રાન્સપોર્ટર રાજદીપભાઇ નંદલાલભાઇ ઉજીયાના મકાનમાં ત્રાટકી કબાટમાંથી રૂા.૬ લાખનાં સોના-ચાંદીના દાગીના અને રૂા.૧ લાખની રોકડ રકમ ચોરી ગયા હતા.
આ ઉપરાંત અન્ય બે મકાનોમાં પણ ત્રાટક્યા હતા પરંતુ સફળતા મળી ન હતી. એક મકાનમાં વૃદ્ધા જાગી જતાં ભાગી ગયા હતા. ચોરી કર્યા બાદ બંને બાઇક રેઢા મુકી ઝાયલો કારમાં સુરત જતા રહ્યા હતા. એલસીબીએ તપાસમાં ઝુંકાવી સીસીટીવી ફુટેજનાં આધારે બંને આરોપીઓની ઓળખ મેળવી ઝડપી લીધા હતા. આરોપીઓ પાસેથી ગુનામાં વપરાયેલી ઝાયલો કાર, બે ચોરાઉ બાઇક, મોબાઇલ ફોન, રોકડ રકમ, ડીસમીસ, લોખંડનો સળીયો વગેરે કબજે કર્યો હતો.
એલસીબીના સુત્રોએ જણાવ્યું કે, બંને આરોપીઓ રીઢા ઘરફોડીયા છે. એટલું જ નહીં લાંબો ગુનાઇત ઇતિહાસ ધરાવે છે. આરોપી નાનકસિંગ સામે રાજ્યભરમાં ચોરી સહિતનાં ૩૦થી વધુ ગુના નોંધાયા છે. મોટાભાગનાં ગુના સુરત અને તેની આસપાસનાં વિસ્તારનાં છે. પાસાની હવા પણ ખાઇ આવ્યો છે. બીજા આરોપી જશબીરસિંગ વિરુદ્ધ પણ ચોરી સહિતનાં ડઝનથી વધુ ગુના નોંધાયા છે. તે પણ પાસાની હવા પણ ખાઇ આવ્યો છે.
