રાજુલામાં લોહીયાળ ખેલ: પુત્રને બચાવવા આવેલી માતા પર કાર ચડાવી હત્યા, મહિલા સહિત 7 ઝડપાયા | Rajula Kidnapping Case: 7 Arrested After Dramatic Highway Incident in Amreli
Amreli Crime News: અમરેલી જિલ્લાના રાજુલામાં નેશનલ હાઈવે પર પ્રેમ પ્રકરણના મનદુઃખમાં માનવતાને શરમાવે તેવી સનસનીખેજ ઘટના સામે આવી છે. પીપાવાવ પોર્ટ ચોકડી નજીક એક પ્રેમી યુવકનું જાહેરમાં અપહરણ કરી, તેને બચાવવા વચ્ચે પડેલી તેની માતા પર આરોપીઓએ કાર ચડાવી દઈ કરુણ હત્યા કરી નાખી છે. આ સમગ્ર ઘટનાના સીસીટીવી ફૂટેજ પણ સામે આવ્યા છે, જેણે પંથકમાં ચકચાર મ જગાવી છે.
જાહેરમાં અપહરણ અને હત્યાની વિગત
મળતી માહિતી અનુસાર, રાજુલાના પીપાવાવ પોર્ટ ચોકડી પાસે આવેલા એક પેટ્રોલ પંપ નજીક આ ઘટના બની હતી. આરોપીઓએ જાહેરમાં પ્રેમી યુવક ભાવેશ ભીલને આંતરીને તેનું અપહરણ કરવાનો પ્રયાસ કર્યો હતો. પુત્રને અપહરણકર્તાઓની ચુંગાલમાંથી બચાવવા જ્યારે તેની 50 વર્ષીય માતા જીતુબહેન ભીલ વચ્ચે પડી, ત્યારે બેફામ બનેલા આરોપીઓએ તેના પર કાર ચડાવી દીધી હતી. ગંભીર ઈજાઓને કારણે જીતુબહેનનું ઘટનાસ્થળે જ કરુણ મોત નિપજ્યું હતું.
ઘટનાની જાણ થતા જ મરીન પીપાવાવ પોલીસ એક્શનમાં આવી હતી. પોલીસે અપહરણકર્તાઓનો પીછો કરીને ફિલ્મી ઢબે યુવક ભાવેશને આરોપીઓની ચુંગાલમાંથી છોડાવ્યો હતો.
પોલીસ કાર્યવાહી અને 9 આરોપીઓ સામે ફરિયાદ
આ મામલે મરીન પીપાવાવ પોલીસે કડક કાર્યવાહી હાથ ધરી છે. પોલીસે કુલ 9 આરોપીઓ સામે હત્યા અને અપહરણ સહિતની વિવિધ કલમો હેઠળ ગુનો નોંધી ત્રણ મહિલા સહિત સાત આરોપીની ધરપકડ કરવાની તજવીજ શરૂ કરી છે. સીસીટીવી ફૂટેજના આધારે વધુ પુરાવા એકત્રિત કરવામાં આવી રહ્યા છે. પ્રેમ પ્રકરણમાં થયેલી આ ઘાતકી હત્યા અને અપહરણની ઘટનાથી સમગ્ર રાજુલા પંથકમાં ભય અને રોષનો માહોલ જોવા મળી રહ્યો છે. પોલીસ હાલ આ મામલે વધુ તપાસ કરી રહી છે.
