વડોદરા સ્ટેશનના પ્લેટફોર્મ પર શૌચાલય સુવિધા વધારવા DRMને રજૂઆત | Presentation to DRM to increase toilet facilities on the platform of Vadodara station
Western Railways : વડોદરા વિભાગ, પશ્ચિમ રેલવેના ડીઆરયુસીસી (DRUCC) સભ્ય મોહમ્મદ હબીબ લોખંડવાળાએ 28 એપ્રિલ 2026ના રોજ ડિવિઝનલ રેલવે મેનેજર (DRM)ને રજૂઆત કરી વડોદરા સ્ટેશનના પ્લેટફોર્મ નંબર 2/3 અને 4/5 પર શૌચાલય તથા યુરિનલ સુવિધા વધારવા માટે તાત્કાલિક પગલાં લેવા વિનંતી કરી છે.
એમની રજૂઆત મુજબ, વડોદરાએ એક અત્યંત મહત્વનું અને વ્યસ્ત સ્ટેશન છે, જ્યાં 24 કલાક ટ્રેનો અને મુસાફરોની અવરજવર રહે છે. પરંતુ હાલમાં પ્લેટફોર્મ પર શૌચાલય સુવિધાનું વિતરણ અસંતુલિત હોવાના કારણે મુસાફરોને ભારે મુશ્કેલી પડી રહી છે.
પ્લેટફોર્મ નં.2 અને 3 પર શૌચાલય સુવિધા માત્ર અમદાવાદ છેડે (નોર્થ સાઇડ) ઉપલબ્ધ છે, જ્યારે મુંબઈ/સુરત છેડે કોઈ સુવિધા નથી. પ્લેટફોર્મ નં.4 અને 5 પર સુવિધા માત્ર સુરત છેડે (સાઉથ સાઇડ) છે, જ્યારે અમદાવાદ છેડે મુસાફરો આ સુવિધાથી વંચિત છે.
વડોદરા સ્ટેશનના પ્લેટફોર્મ ઘણા લાંબા હોવાથી એક છેડેથી બીજા છેડે જવું વૃદ્ધ મુસાફરો, મહિલાઓ અને નાનાં બાળકો સાથે પ્રવાસ કરતાં પરિવારો માટે ઘણું કષ્ટદાયક બની જાય છે. ટ્રેન આવવાના સમયે ઉતાવળ હોવાના કારણે પ્લેટફોર્મના બીજા છેડે સુધી જવું વ્યવહારિક રીતે શક્ય બનતું નથી.
પ્લેટફોર્મ 2/3ના મુંબઈ છેડે નવા યુરિનલ અને શૌચાલય બ્લોકનું તાત્કાલિક નિર્માણ કરવામાં આવે. પ્લેટફોર્મ 4/5ના અમદાવાદ છેડે પણ નવી શૌચાલય સુવિધા ઊભી કરવામાં આવે.
