વડોદરાના વોર્ડ નં.1માં 31 મતનો તફાવત : કોંગ્રેસની રિકાઉન્ટિંગની માગ, હાઈકોર્ટ જવાની તૈયારી | Difference of 31 votes in Ward No 1 of Vadodara: Congress demands recount
Vadodara Corporation Elections : વડોદરા મ્યુનિસિપલ કોર્પોરેશનની 2026ની ચૂંટણીમાં વોર્ડ નંબર 1માં માત્ર 31 મતના તફાવતે રાજકીય ગરમાવો વધી ગયો છે. સામાન્ય બેઠક પર કોંગ્રેસના મહિલા ઉમેદવાર પુષ્પાબેન વાઘેલાને 13,341 મત મળ્યા હતા, જ્યારે અપક્ષ ઉમેદવાર હરીશ પટેલે 13,372 મત મેળવી માત્ર 31 મતથી જીત નોંધાવી છે.
આ પરિણામ બાદ કોંગ્રેસે ફરી મતગણતરી (રિકાઉન્ટિંગ) કરવાની માગ ઉઠાવી છે. પક્ષના મતે જો પુષ્પાબેનને 31 કરતાં વધુ વધારાના મત મળે તો તેઓ પ્રથમ બેઠક પર વિજેતા જાહેર થઈ શકે છે.
આ સાથે બીજી સામાન્ય મહિલા બેઠક પર કોંગ્રેસની અમી રાવતને 11,920 મત મળ્યા છે, જ્યારે ભાજપની શ્વેતા શાહને 10,785 મત મળ્યા છે. એટલે કે અમી રાવત લગભગ 1,000થી વધુ મતોથી આગળ છે. હાલની સ્થિતિમાં કોંગ્રેસના અમી રાવત 11,135 મત સાથે આગળ હોવાનું દર્શાવવામાં આવ્યું છે,
કોંગ્રેસનું ગણિત એવું છે કે જો રિકાઉન્ટિંગમાં પુષ્પાબેન વાઘેલાને 31 કરતા વધુ મત વધુ મળે તો બીજી બેઠક પર અમી રાવતની લીડને કારણે કોંગ્રેસને વોર્ડ નં. 1માં સીધી બે બેઠકો મળી શકે.
આ સમગ્ર મામલે કોંગ્રેસે હાઈકોર્ટમાં રિકાઉન્ટિંગ માટે અરજી સાથે પિટિશન દાખલ કરવાની તૈયારી દર્શાવી છે.
