જૂનાગઢ જિલ્લા ભાજપ પ્રમુખે જાહેર રસ્તા પર કેક કાપી જન્મદિવસ ઉજવ્યો | Junagadh District BJP President celebrated his birthday by cutting a cake on a public road
ભાજપના નેતાઓ સત્તાના નશામાં કાયદો ઘોળીને પી ગયાનો રોષ : કેશોદના ચાર ચોક ખાતે ધારાસભ્યની હાજરીમાં ફટાકડા ફોડી કાયદાની ધજ્જિયા ઊડાવાઈઃ ચૂંટણી સમયે પણ તંત્ર- પોલીસ મૌન
જૂનાગઢ, : કેશોદના વ્યસ્ત એવા ચાર ચોક વિસ્તારમાં જૂનાગઢ જિલ્લા ભાજપ પ્રમુખ ચંદુ મકવાણાના જન્મદિવસની એવી રીતે ઉજવણી કરવામાં આવી કે જાણે કાયદો અને વ્યવસ્થા જેવું કંઈ અસ્તિત્વમાં જ ન હોય. તેમાં કેશોદના ભાજપના ધારાસભ્ય સહિતના આગેવાનો પણ હાજર હતા. કેક કટીંગ કર્યા બાદ ફટાકડા ફોડી ઉજવણી કરવામાં આવી હતી.
ભાજપના કાર્યકરોની હાજરીમાં કેશોદના મુખ્ય ચાર ચોક વિસ્તારમાં જાહેર રસ્તા પર કેક કાપી જન્મદિવસની ઉજવણી કરવામાં આવી હતી. હાલ ચૂંટણી આચારસંહિતા અમલી હોવા છતાં તંત્રની પરવાનગી વગર આ પ્રકારે ભીડ એકઠી કરવી અને ફટાકડા ફોડીને ધાંધલ-ધમાલ કરવી એ કાયદાનું ઉલ્લંઘન છે. આ ઉજવણીમાં માત્ર કાર્યકરો જ નહીં પરંતુ કેશોદના ધારાસભ્ય દેવા માલમ પણ ઉપસ્થિત રહ્યા હતા. ઉત્સાહમાં આવી ગયેલા ભાજપના કાર્યકરોએ જાહેર માર્ગો પર ફટાકડા ફોડી સામાન્ય જનતા માટે હાલાકી ઊભી કરી હતી. કેશોદના સ્થાનિકો આ ઘટનાને લઈને ભારે રોષ સાથે સવાલો ઉઠાવી રહ્યા છે કે શું સત્તાધારી પક્ષના નેતાઓ માટે આચારસંહિતાના નિયમો લાગુ પડતા નથી ? સામાન્ય નાગરિક સામે ત્વરિત કાર્યવાહી કરતી પોલીસ ભાજપના આગેવાનો સામે પગલાં લેવાની હિંમત બતાવશે ?
સામાન્ય માણસો આવું કરે તો પોલીસ તેને પકડીને રીલ બનાવે છે
આ તબક્કે પ્રજાજનો પૂછી રહ્યા છે કે રાજ્ય ચૂંટણી આયોગ અને સ્થાનિક પોલીસ તંત્ર આ ખુલ્લેઆમ થયેલા ઉલ્લંઘન બદલ જિલ્લા ભાજપ પ્રમુખ અને ધારાસભ્ય સામે કોઈ શિક્ષાત્મક કાર્યવાહી કરે છે કે પછી હંમેશની જેમ સત્તાના દબાણ હેઠળ મામલો દબાવી દેવામાં આવશે? જો સામાન્ય વ્યક્તિ આવી ભૂલ કરે તો પોલીસ તેના પર કાર્યવાહી કરી માફી મંગાવતી રિલ બનાવી સોશ્યલ મીડિયામાં મુકે છે, તો આ કિસ્સામાં પોલીસની હિંમત ચાલશે ?
