વર્ષ-૧૯૬૬માં VMCની રચના થઇ કોર્પોરેશનની વર્ષ-૧૯૮૭ની ચૂંટણીમાં ભાજપની માંડ પાંચ બેઠકો આવી હતી | 1987 BJP gets only five seat
વડોદરા, તા.21 વડોદરા મ્યુનિસિપલ કોર્પોરેશનની વર્ષ-૧૯૬૬માં રચના થયાના ૨૯ વર્ષે બાદ વર્ષ-૧૯૯૫માં ભાજપે પ્રથમ વખત સત્તા મેળવ્યા બાદ હજી પણ કોર્પોરેશનમાં ભાજપનું જ શાસન છે. ૧૯૯૫ પહેલા કોર્પોેરેશનમાં ભાજપના સભ્યોની કોઇ નોંધપાત્ર હાજરી ન હતી.
૧૯૮૭ માં વડોદરા કોર્પોરેશનની ચૂંટણી યોજાઇ ત્યારે ૨૭ વોર્ડ અને ૭૭ બેઠકો હતી. તે સમયે કોંગ્રેસ, જનતાપાર્ટી, સાવધાન અને ભાજપ એમ ચાર મુખ્ય પક્ષો ચૂંટણી લડયા હતા. અપક્ષો સહિત ૪૮૩ ઉમેદવારો જંગમાં હતા જેમાં અપક્ષો જ ૨૦૧ હતા. ભાજપે ૬૮, સાવધાને ૬૮ અને કોંગ્રેસે ૭૭ ઉમેદવાર ઊભા રાખ્યા હતા. જૂના પાદરા રોડ તે વખતે વોર્ડ નં.૧૬ હતો અને ભાજપે અહીંથી કોઇ ઉમેદવાર ઊભો રાખ્યો ન હતો. આ વોર્ડની ત્રણેય બેઠક કોંગ્રેસે જીતી હતી. આ ચૂંટણીમાં ભાજપ માંડ પાંચ સીટ જીતી શક્યું હતું.
વોર્ડ નં.૨ માં યાકુતપુરામાં ગની કુરેશી (૩૮૪૦ મત), વોર્ડ નં.૫ બાજવાડા નલિન ભટ્ટ (૪૭૭૯ મત), વોર્ડ નં.૬ ઘડિયાળી પોળ ભૂપેન્દ્ર લાખાવાળા (૨૬૯૪ મત), વોર્ડ નં.૨૧ શિયાબાગ મધુભાઇ શાહ (૩૭૧૦ મત) અને વોર્ડ નં.૨૬ ગોવિંદરાવ ઢોણે ે (૪૦૪૭ મત) વિજયી થયા હતા. આજ વોર્ડમાંથી મધુભાઇ શ્રીવાસ્તવ અપક્ષ (૫૪૭૩ મત) વિજયી બન્યા હતા.
દાંડિયાબજાર વોર્ડ નં.૮માં ભાજપના ઉમેદવારને માત્ર ૩૩૫ મત મળ્યા હતા. આ વોર્ડની બે બેઠક હતી. જેમાંથી એક સાવધાનના અશોક પવારે અને જનતા પક્ષના લીલાબેન ચાંદોરકરે જીતી હતી. જ્યારે કોંગ્રેસના એક ઉમેદવારને ૮૮૮ અને બીજાને ૭૭૩ મત મળ્યા હતા. આ ચૂંટણી જંગમાં ભાજપના ૧૯ ઉમેદવાર એવા હતા, જેઓને બે હજારથી પણ ઓછા મત પ્રાપ્ત થયા હતા.
આમ, ૧૯૮૭ માં માત્ર પાંચ સીટ જીતી શકનાર ભાજપે તે પછીના આઠમા વર્ષે ૧૯૯૫ની ચૂંટણીમાં બૂલડોઝર ફેરવી દીધું હતું અને સીધી ૫૩ બેઠક જીતી લીધી હતી. આ ચૂંટણીમાં ચાર વોર્ડમાં ભાજપે સમયસર મેન્ડેટ નહીં આપતા દશ ઉમેદવારોને અપક્ષ લડવું પડયું હતું જેમાંથી ૭ સીટ જીતતા ભાજપે ૧૯૯૫ માં કુલ ૬૦ સીટ મેળવી હતી. ૧૯૯૫ બાદ ભાજપનું શાસન કોર્પોરેશન પર આજ સુધી જળવાઇ રહ્યું છે.
અત્રે એ નોંધનીય છે કે ૧૯૮૭ ના બોર્ડની પાંચ વર્ષની મુદત પૂરી થયા બાદ બે અઢી વર્ષ સુધી વહીવટદારનું શાસન રહ્યું હતું અને ૧૯૯૫ માં ચૂંટણી યોજાઇ હતી. કોર્પોરેશનની વર્ષ-૨૦૨૧ની ચૂંટણીમાં ભાજપે સીટો મેળવવામાં કોંગ્રેસ પર ફરી બુલડોઝર ફેરવી દીધું હતું. ૧૯ વોર્ડની કુલ ૭૬ બેઠકોમાંથી ભાજપે ૬૯ બેઠકો કબજે કરી હતી.
૧૯૮૭માં ભાજપના ૨૬ ઉમેદવારોને એક હજાર પણ મત મળ્યા ન હતા
વર્ષ-૧૯૮૭ની કોર્પોરેશનની ચૂંટણીમાં ભાજપના ૨૬ ઉમેદવારો એવા હતા જે પ્રત્યેકને એક હજાર મત પણ મળ્યા ન હતા. અક હજાર પૂરા મત નહીં મેળવી શકનારા ભાજપના ૨૬ ઉમેદવારો પૈકી વોર્ડ નં.૭ (ખંડેરાવ માર્કેટ પાછળ)ના ઉમેદવાર હેમચન્દ્ર બોચરે અને વોર્ડ નં.૧૨ (ફતેગંજ)ના ઉમેદવાર ભરચ સોમચંદ શાહ હતા જેઓ બાદમાં ૧૯૯૫થી ભાજપના શાસનમાં મેયર બન્યા હતા.
