એક તરફ કંપનીઓને દંડ ફટકારતું AMC હવે ખુદ 6.90 લાખ નંગ પ્લાસ્ટિકની થેલી ખરીદશે | ahmedabad municipal corporation plastic bag purchase controversy
Ahmedabad News: પર્યાવરણ જાળવણી અને પ્લાસ્ટિક મુક્ત શહેરના નારા હેઠળ સરકારી બાબુઓએ પ્લાસ્ટિકની થેલી વાપરતા અનેક એકમો પાસેથી લાખો રૂપિયાનો દંડ ઉઘરાવ્યો છે. પરંતુ પર્યાવરણ જાળવણીની જવાબદારી માત્ર શહેરીજનોના શિરે જ હોય તેમ અમદાવાદ મ્યુનિ. ખુદ 6.90 લાખ નંગ પ્લાસ્ટિકની થેલીની ખરીદવાનું છે! અધિકારીઓના મતે મ્યુનિ.ના વપરાશથી પર્યાવરણને કોઈ નુકસાન નહીં થતું હોય માટે બેફામપણે તેની ખરીદી કરાઈ રહી હોય તેવું ચિત્ર સર્જાયું છે.
શેરીએ શેરી ફરી લોકોને દંડતુ તંત્ર
અમદાવાદને પ્લાસ્ટિક મુક્ત બનાવવા માટે મ્યુનિ. તંત્રના અધિકારીઓ દરરોજ શેરીએ શેરીએ ફરીને પ્લાસ્ટિકની થેલી વાપરતા દુકાનદારો, ફેરિયાવાળા તેમજ પાથરણાંવાળાની તપાસ કરી દંડાત્મક કાર્યવાહી કરે છે. તેનો વપરાશ કે ઉત્પાદન કરતાં ઔદ્યોગિક એકમોને તો કેટલીક વખત સીલ કરવા સુધીના પગલાં લેવામાં આવે છે. પરંતુ હવે એ જ મ્યુનિ. ખુદ ખાનગી એજન્સી પાસેથી લાખોના ખર્ચે નાની-મોટી સાઈઝની 690000 નંગ વેસ્ટ પ્લાસ્ટિક બેગની ખરીદી કરશે! શહેરીજનોના વપરાશથી પર્યાવરણ માટે ઝેર સમાન બનતી પ્લાસ્ટિકની થેલીને સરકારી ચોપડે જરૂરિયાત બનાવી દેવાઈ હોય તેવો તાલ સર્જાયો છે.
આ પણ વાંચો :
શેઠની શીખામણ ઝાંપા સુધી જેવો કોર્પોરેશનનો હાલ
બાયોડીગ્રેડેબલ બેગ જેવા પ્લાસ્ટિક બેગના ઘણાં વિકલ્પ હાલના સમયે ઉપલબ્ધ છે. છતાં શહેરીજનોને પર્યાવરણ બચાવવાની સુફિયાણી સલાહ આપતું તંત્ર ખુદની જ સલાહના લીરેલીરા ઉડાડી પોતાની બેવડી નીતિની સાબિતી આપી રહ્યું છે. જો તંત્ર ખુદ જ આવા કોઈ વિકલ્પ ના શોધી શકતું હોય તો તે સામાન્ય નાગરિકો પાસેથી આવી અપેક્ષાઓ શા માટે રાખે છે? પ્લાસ્ટિક ન જ વાપરવું જોઈએ તે અંગે લોકોને સમજાવવા તેમજ જરૂર પડ્યે ચોક્કસ કાર્યવાહી કરવી યોગ્ય છે. પરંતુ જો શહેરને ખરેખર પ્લાસ્ટિક મુક્ત બનાવવું જ હોય તો શહેરી સત્તાનું કેન્દ્ર ગણાતી કચેરીથી જ કેમ શરૂઆત કરાતી નથી? તેવા સવાલોએ જોર પકડ્યું છે.
