અમદાવાદીઓ સાવધાન! સારંગપુરમાં બંધ મકાનના તાળા તૂટ્યા, સોના-ચાંદીના ઘરેણા લઈ તસ્કરો ફરાર | House Break in in Ahmedabads Sarangpur Area Jewellery Worth ₹2 33 Lakh Stolen

Ahmedabad News: અમદાવાદના સારંગપુર વિસ્તારમાં સોમવારે વહેલી સવારે એક ચોરીની ઘટના સામે આવી છે. તસ્કરોએ એક બંધ મકાનને નિશાન બનાવી સોના-ચાંદીના દાગીના અને રોકડ સહિત કુલ રૂ.2.33 લાખની મતાની ચોરી કરી છે.

ખાડિયા પોલીસના જણાવ્યા અનુસાર, આ ઘટના 13 એપ્રિલના રોજ સવારે 5:00 થી 8:30 વાગ્યાના સમયગાળા દરમિયાન બની હતી. ફરિયાદી નથુભાઈ સુખાભાઈ પટેલ (43), જેઓ તાલિયાની પોળમાં રહે છે, તેઓ સવારે પોતાની ફરજ પર ગયા હતા ત્યારે આ ચોરી થઈ હતી.

નથુભાઈ સારંગપુર દરવાજા પાસે આવેલી એક ચાની લારી પર સવારની શિફ્ટમાં કામ કરે છે. તેઓ ઘરના લોખંડના શટરને લોક કરીને કામ પર ગયા હતા. સવારે 8:30 વાગ્યે આસપાસના એક દુકાનદારે તેમને જાણ કરી કે તેમના ઘરના શટરનું તાળું તૂટેલું છે.

શું ચોરી થયું?

જ્યારે નથુભાઈ ઘરે પરત ફર્યા ત્યારે તેમણે જોયું કે શટર અધખુલ્લું હતું અને પ્રથમ માળે રહેલી તિજોરીના તાળા તૂટેલા હતા. તસ્કરો નીચે મુજબની વસ્તુઓ ચોરી ગયા છે:

• સોનાના દાગીના: આશરે એક તોલા વજનની સોનાની કાનની બુટ્ટીઓ (કિંમત આશરે રૂ.1.10 લાખ).
• ચાંદીના દાગીના: આશરે એક કિલો વજનના ચાંદીના કંદોરા, બંગડીઓ, બ્રેસલેટ અને હાર (કિંમત આશરે રૂ.1.20 લાખ).
• રોકડ: રૂ.3,000 રોકડા.

પોલીસ ગુનો નોંધી તપાસ હાથ ધરી

પોલીસના મતે, ચોરોએ લોખંડનું શટર તોડી, સીડી મારફતે ઘરમાં પ્રવેશી તિજોરીને નિશાન બનાવી હતી. હાલમાં અજાણ્યા શખ્સો વિરુદ્ધ ગુનો નોંધી તપાસ શરૂ કરવામાં આવી છે. પોલીસ આસપાસના CCTV ફૂટેજ તપાસી રહી છે અને ફોરેન્સિક પુરાવાઓ એકત્રિત કરીને આરોપીઓને પકડવા માટે ચક્રો ગતિમાન કર્યા છે.