ઈરાનની દાદાગીરી નહીં ચલાવીએ! PM મોદી-રૂબિયોની બેઠક બાદ અમેરિકાની ગર્જના; ઓઈલ મુદ્દે પણ મોટું નિવેદન | pm modi meets marco rubio us india energy supply ties
US Offers Energy Diversification to India : વૈશ્વિક સ્તરે ચાલી રહેલા યુદ્ધ અને તેલના બજારમાં ચાલી રહેલી ખેંચતાણ વચ્ચે ભારત અને અમેરિકા વચ્ચે એક અત્યંત મહત્વપૂર્ણ બેઠક યોજાઈ ગઈ છે. અમેરિકાના વિદેશ મંત્રી માર્કો રુબિયોએ શનિવારે નવી દિલ્હીમાં વડાપ્રધાન નરેન્દ્ર મોદી સાથે મુલાકાત કરી હતી. આ બેઠકમાં અમેરિકાએ ઈરાનને કડક શબ્દોમાં ચેતવણી આપતા ભારત સમક્ષ એનર્જી સપ્લાય એટલે કે તેલ અને ગેસ ક્ષેત્રે એક મોટી ઓફર મૂકી છે.
માર્કો રુબિયોએ સ્પષ્ટ કર્યું છે કે મિડલ ઈસ્ટમાં ચાલી રહેલા તણાવ વચ્ચે અમેરિકા વૈશ્વિક ઉર્જા બજારને કોઈના ભરોસે છોડશે નહીં.
1. ઈરાનને ગ્લોબલ એનર્જી માર્કેટ બંધક બનાવવા નહીં દઈએ
બેઠક બાદ યુએસ સ્ટેટ ડિપાર્ટમેન્ટના પ્રવક્તા ટોમી પિગોટે સત્તાવાર નિવેદન જાહેર કરીને જણાવ્યું છે કે મિડલ ઈસ્ટની વર્તમાન સ્થિતિ પર બંને નેતાઓ વચ્ચે ઊંડી ચર્ચા થઈ હતી. અમેરિકાએ ભારતને ભરોસો આપ્યો છે કે હોર્મુઝની ખાડીમાં ચાલી રહેલા વિવાદો વચ્ચે પણ અમેરિકા ઈરાનની મનમાની ચાલવા નહીં દે. અમેરિકાના એનર્જી પ્રોડક્ટ્સ ભારતના ઉર્જા પુરવઠાને વધુ મજબૂત અને વૈવિધ્યસભર બનાવી શકે છે, જેથી ભારતની બીજા દેશો પરની નિર્ભરતા ઘટે.
2. વર્ષ 2030 સુધીમાં વેપાર બમણો કરવાનો લક્ષ્યાંક: ‘મિશન 500’
આ બેઠકમાં માત્ર ડિફેન્સ કે તેલ પર જ નહીં, પરંતુ બંને દેશો વચ્ચેના વેપારને એક નવી ઊંચાઈએ લઈ જવા પર મહોર મારવામાં આવી છે. ડોનાલ્ડ ટ્રમ્પ અને પીએમ મોદીના મહત્વાકાંક્ષી પ્રોજેક્ટ ‘Mission 500’ અંતર્ગત વર્ષ 2030 સુધીમાં ભારત અને અમેરિકા વચ્ચેનો દ્વિપક્ષીય વેપાર બમણો કરવાનો લક્ષ્યાંક રાખવામાં આવ્યો છે. આ માટે બંને દેશો ડિફેન્સ કો-ઓપરેશન અને સેમિકન્ડક્ટર જેવી ક્રિટિકલ ટેકનોલોજી પર સાથે મળીને કામ કરશે.
3. પીએમ મોદીને વ્હાઇટ હાઉસનું વિશેષ આમંત્રણ
અમેરિકી વિદેશ મંત્રી માર્કો રુબિયોએ રાષ્ટ્રપતિ ડોનાલ્ડ ટ્રમ્પ વતી પીએમ મોદીને ટૂંક સમયમાં જ અમેરિકાના રાષ્ટ્રપતિ ભવન એટલે કે ‘વ્હાઇટ હાઉસ’ની મુલાકાત લેવા માટે સત્તાવાર આમંત્રણ આપ્યું છે.
4. કોલકાતાથી શરૂ થયો રુબિયોનો 4 દિવસનો ભારત પ્રવાસ
માર્કો રુબિયો શનિવારે સવારે જ ભારતના 4 દિવસના પ્રવાસે પહોંચ્યા છે, જેની શરૂઆત તેમણે કોલકાતાથી કરી હતી. ત્યાં તેઓ મધર ટેરેસાના વૈશ્વિક હેડક્વાર્ટર ‘મધર હાઉસ’ની મુલાકાતે પણ ગયા હતા. રુબિયોનો આ પ્રવાસ એટલા માટે મહત્વનો છે કારણ કે આગામી 26 મે ના રોજ નવી દિલ્હીમાં ‘ક્વાડ’ દેશોના વિદેશ મંત્રીઓની મહાબેઠક યોજાવાની છે. જેમાં ભારતના વિદેશ મંત્રી એસ. જયશંકરની સાથે અમેરિકા, ઓસ્ટ્રેલિયા અને જાપાનના વિદેશ મંત્રીઓ પણ ભાગ લેશે. આ બેઠકનો મુખ્ય હેતુ ઇન્ડો-પેસિફિક ક્ષેત્રને ચીનના દબદબાથી મુક્ત અને ખુલ્લો રાખવાનો છે.
