ઈરાન યુદ્ધ ખતમ કરીને જ ટ્રમ્પે ઉજવ્યો 80મો જન્મદિવસ, UFC ફાઈટની મજા માણી | trump announce iran peace agreement on his birthday white house
Donald Trump Celebrates 80th Birthday: અમેરિકન પ્રમુખ ડોનાલ્ડ ટ્રમ્પે ઈરાન સાથે યુદ્ધનો અંત આણતી એક ઐતિહાસિક સમજૂતીની જાહેરાત કરી છે. આ મોટી ઈરાન ડીલની જાહેરાતની સાથે જ ટ્રમ્પે વ્હાઈટ હાઉસમાં પોતાનો 80મો જન્મદિન મનાવ્યો અને ત્યાં આયોજિત અલ્ટીમેટ ફાઈટિંગ ચેમ્પિયનશિપ (UFC) કેજ ફાઈટની ભરપૂર મજા માણી. તેમણે પોતાના જન્મદિવસની ઉજવણીના બરાબર બે કલાક પહેલા સોશિયલ મીડિયા પ્લેટફોર્મ ‘ટ્રુથ સોશિયલ’ પર લખ્યું કે, ઈસ્લામિક રિપબ્લિક ઓફ ઈરાન સાથેની ડીલ હવે પૂર્ણ થઈ ગઈ છે અને હું આ માટે સૌને અભિનંદન પાઠવું છું.
આ સમજૂતીની સાથે જ ટ્રમ્પે વ્યૂહાત્મક દ્રષ્ટિએ અત્યંત મહત્વપૂર્ણ હોર્મુઝ સ્ટ્રેટને વિશ્વભરના વ્યાપારી જહાજો માટે સંપૂર્ણપણે ખુલ્લો મૂકવાની અને અમેરિકન નૌસેના દ્વારા કરવામાં આવેલી નાકાબંધીને પણ તાત્કાલિક અસરથી હટાવવાની મોટી જાહેરાત કરી છે. તેમણે પોસ્ટમાં લખ્યું કે, ‘દુનિયાભરના જહાજો, પોતાના એન્જિન શરૂ કરો અને તેલની સપ્લાય શરૂ થવા દો’. ટ્રમ્પે એક અન્ય પોસ્ટમાં સ્પષ્ટ કર્યું કે, બંને દેશો વચ્ચેના આ શાનદાર શાંતિ કરાર પર આગામી શુક્રવારે હસ્તાક્ષર કરવામાં આવશે, જે સમગ્ર વિસ્તારમાં સ્થિરતા અને સુરક્ષા લઈને આવશે.
વ્હાઈટ હાઉસના લૉનમાં સજી UFCની રિંગ
આ વખતે અમેરિકન પ્રમુખનો જન્મદિવસ એટલા માટે પણ સૌથી અલગ અને ખાસ રહ્યો કારણ કે આ જ વર્ષે અમેરિકા પોતાની આઝાદીની 250મી વર્ષગાંઠ પણ ઉજવી રહ્યું છે. આ બેવડા અને ઐતિહાસિક અવસરને યાદગાર બનાવવા માટે વ્હાઈટ હાઉસના સાઉથ લોનમાં એક બેહદ અનોખું આયોજન કરવામાં આવ્યું હતું. ટ્રમ્પે પોતાની બર્થડે સેલિબ્રેશન માટે ત્યાં UFC કેજ ફાઈટનો શો યોજાવ્યો હતો, જેમાં તારની જાળીથી બનેલા આઠ ખૂણાવાળા પાંજરાની અંદર કુલ સાત ફાઈટ્સ થવાની છે.
આ પણ વાંચો: મિડલ ઈસ્ટમાં શાંતિ થઈ ત્યાં બ્રિટને કરી એવી હરકત કે ભારત-રશિયા બંને ઉશ્કેરાઈ શકે!
‘UFC ફ્રીડમ 250’ નામની આ ખાસ સ્પોર્ટ્સ ઈવેન્ટની શરૂઆત બ્રાઝિલના ડિએગો લોપેઝ અને અમેરિકન ફાઇટર સ્ટીવ ગાર્સિયા વચ્ચેના રસાકસીભર્યા મુકાબલાથી થઈ હતી. વ્હાઈટ હાઉસના ઈતિહાસમાં આ પોતાની રીતનો આ પ્રથમ અને સૌથી અનોખો બર્થડે સેલિબ્રેશન છે, જ્યાં એક તરફ સમગ્ર વિશ્વને રાહત આપનારી ઈરાન ડીલ ફાઇનલ થઈ અને રાજદ્વારી જીતની ઉજવણી કરવામાં આવી, તો બીજી તરફ રમતના મેદાન પર એક્શન અને રોમાંચનો માહોલ જોવા મળ્યો.
