12 વર્ષમાં ભાજપે નવ રાજ્યોમાં પ્રથમ વખત સરકાર બનાવી ઇતિહાસ રચ્યો | BJP created history by forming government in nine states for the first time in 12 years
– કેન્દ્રની મોદી સરકાર ભાજપ માટે સૂવર્ણ યુગ લાવી
– 2014 પછી પ્રથમ વખત હરિયાણા, મહારાષ્ટ્ર, આસામ, અરુણાચલ, ઓડિશા, મણિપુર, ત્રિપુરા, બિહાર, બંગાળ જીત્યા
નવી દિલ્હી : વર્ષ ૨૦૧૪માં કેન્દ્રમાં સત્તા પરિવર્તન થયું અને નરેન્દ્ર મોદીની આગેવાનીમાં ભાજપની સરકાર રચાઇ હતી, ત્યારથી લઇને અત્યાર સુધીમાં ભાજપે નવ રાજ્યોમાં પ્રથમ વખત પોતાની સરકાર બનાવી છે. જેમાં તાજેતરમાં જ બંગાળમાં તૃણમુલ કોંગ્રેસને હરાવીને પ્રાપ્ત કરેલી સત્તાનો પણ સમાવેશ થાય છે. જ્યાં ક્યારેય ભાજપે સરકાર નહોતી બનાવી ત્યાં સત્તાની શરૂઆત હરિયાણા અને મહારાષ્ટ્રથી થઇ હતી.
વર્ષ ૨૦૧૪માં કેન્દ્રમાં ભાજપની સરકાર બની અને નરેન્દ્ર મોદી વડાપ્રધાન બન્યા, ૨૦૧૪માં જ હરિયાણા અને મહારાષ્ટ્રમાં પ્રથમ વખત ભાજપની સરકાર બની હતી. જે બાદ ૨૦૧૬માં આસામ અને અરૂણાચલ પ્રદેશ, ૨૦૧૭માં મણિપુર, ૨૦૧૮માં ત્રિપુરા, ૨૦૨૪માં ઓડિશા, આ જ વર્ષે બિહાર અને હવે પશ્ચિમ બંગાળમાં ભાજપે પ્રથમ વખત સત્તા પ્રાપ્ત કરીને સરકાર બનાવી ચે. તેવી જ રીતે મુખ્યમંત્રીઓ અંગે વાત કરીએ તો હરિયાણામાં મનોહરલાલ ખટ્ટર, મહારાષ્ટ્રમાં દેવેન્દ્ર ફડણવીસ, આસામમાં સબ્રાનંદ સોનોવાલ ભાજપના પ્રથમ મુખ્યમંત્રી બન્યા હતા. ભાજપે ૨૦૧૬માં આસામમાં જીત પ્રાપ્ત કરીને પૂર્વોત્તરમાં પોતાની પકડ મજબૂત બનાવી હતી, ત્યારતી લઇને અત્યાર સુધી ભાજપ ત્રીજી વખત આસામમાં સત્તા પ્રાપ્ત કરવામાં સફળ રહ્યું છે.
તેવી જ રીતે ભાજપે ૨૦૧૬માં અરુણાચલ પ્રદેશમાં પ્રથમ વખત સરકાર બનાવી હતી, તે વર્ષે જુલાઇમાં કોંગ્રેસના નેતા પેમા ખાંડુએ લાંબા રાજકીય સંકટ વચ્ચે મુખ્યમંત્રી તરીકે પદ સંભાળ્યું હતું, જોકે સપ્ટેમ્બરમાં પેમા ખાંડુ અને કોંગ્રેસના ધારાસભ્યો ભાજપમાં સામેલ થઇ ગયા હતા તેથી સત્તા પલટાઇ ગઇ હતી અને ભાજપની સરકાર બની ગઇ હતી. બાદમાં ૨૦૧૮માં ભાજપે ત્રિપુરામાં ડાબેરી મોરચાના દશકો જુના શાસનને ઉખાડી ફેંક્યું હતું, બિપ્લબ કુમાર દેવના નેતૃત્વમાં પોતાની પહેલી સરકાર બનાવી હતી, ભાજપે ૨૦૨૪માં પૂર્વમાં વધુ એક સફળતા પ્રાપ્ત કરી અને ઓડિશામાં બીજુ જનતા દળને હરાવીને સરકાર બનાવી. નીતીશ કુમાર બે દસકાથી વધુ સમય સુધી બિહારના મુખ્યમંત્રી રહ્યા, જોકે હવે ત્યાં ભાજપના મુખ્યમંત્રી છે.
આમ ૨૦૧૪માં ભાજપની સરકાર બની ત્યારથી લઇને અત્યાર સુધી ભાજપે પ્રથમ વખત નવ રાજ્યોમાં પોતાની સરકાર બનાવી છે. આમ છેલ્લા ૧૨ વર્ષમાં ભાજપે પ્રથમ વખત નવ રાજ્યોમાં પોતાની સરકાર બનાવી છે.
