સ્પેસ શૂટ પહેરીને પૃથ્વી પર ઉતર્યા હતા 4 ફૂટના એલિયન્સ! UFOની ગુપ્ત ફાઇલ્સમાં મોટો ઘટસ્ફોટ | pentagon ufo files fbi memo mysterious beings space suits frank edwards
Pentagon UFO Files 2026: અત્યાર સુધી જે વાતોને કલ્પના માનવામાં આવતી હતી, તેના પર હવે ખુદ અમેરિકાના સંરક્ષણ વિભાગે મહોર મારી હોય તેમ લાગે છે. પેન્ટાગોન દ્વારા તાજેતરમાં 162 નવી UFO ફાઇલ્સ જાહેર કરવામાં આવી છે. આ દસ્તાવેજોમાં દાયકાઓ પહેલા જોવાયેલા ત્રણથી ચાર ફૂટ ઊંચા વિચિત્ર જીવો અને અવકાશયાનના અવશેષો વિશે અત્યંત ચોંકાવનારી વિગતો સામે આવી છે.
સ્પેસ સૂટ અને હેલ્મેટ પહેરેલા જીવો
પેન્ટાગોનની ફાઇલ્સમાં દાયકાઓ જૂના એવા અહેવાલોનો ઉલ્લેખ છે. જેમાં અવકાશમાં સ્પેસ સૂટ અને હેલ્મેટ પહેરેલા ત્રણથી ચાર ફૂટ ઊંચા રહસ્યમય જીવો જોવા મળ્યા હતા. આ અહેવાલોમાં એ વાતનો પણ ઉલ્લેખ છે કે, FBIના એક મેમોમાં ફ્રેન્ક એડવર્ડ્સના પુસ્તક “Flying Saucers – Serious Business” પર ધ્યાન કેન્દ્રિત કરવામાં આવ્યું હતું. જેણે તે સમયે લોકોમાં UFO પ્રત્યે ભારે ઉત્સુકતા અને વિવાદ જગાવ્યો હતો.
પૃથ્વી પર નજર રાખતું સ્પેસ વ્હીકલ
FBI મેમોમાં એડવર્ડ્સના દાવાને ટાંકવામાં આવ્યો છે કે, UFO એ પૃથ્વી પરની પ્રવૃત્તિઓનું નિરીક્ષણ કરવા માટે મોકલવામાં આવેલા સ્પેસ વાહનો હતા. મેમોમાં એવો પણ આક્ષેપ છે કે અમેરિકન એરફોર્સે જાણીજોઈને માહિતી છુપાવી હતી અને લોકોને ભ્રમિત કર્યા હતા, કારણ કે જો સત્ય બહાર આવે તો લોકોમાં ગભરાટ ફેલાઈ જવાનો ડર હતો.
UFOના આકાર અને વિશેષતાઓ
દસ્તાવેજોમાં UFOને લઈને કેટલાક ચોક્કસ વર્ણનો આપવામાં આવ્યા છે. UFO ચળકતી ધાતુની વસ્તુઓ જેવા દેખાતા હતા. જે ગરમી અને પ્રકાશ ઉત્સર્જિત કરતા હતા, જેના કારણે નજીક રહેલા સાક્ષીઓ દાઝી ગયા હોય તેવા પણ કિસ્સા નોંધાયા છે. તેનો રંગ સફેદથી લઈને લાલ અને તેજસ્વી નારંગી જેવો હોય છે. દસ્તાવેજો મુજબ UFOના ત્રણ મૂળભૂત આકારો છે. 300 ફૂટ સુધી લાંબા ઝેપ્લીન આકારના જહાજો, ડિસ્ક આકારની રકાબીઓ (વ્યાસ 100 ફૂટ સુધી) અને તાજેતરમાં જોવા મળતા ઈંડા આકારના પદાર્થો.
અજાણી ધાતુ અને પુરાવા
સૌથી વધુ ચોંકાવનારી બાબત એ છે કે, FBI એ કબૂલ્યું છે કે UFO જોનારા લોકોમાં કાયદા અમલીકરણ અધિકારીઓ, ફરજ પરના લશ્કરી જવાનો અને કોમર્શિયલ પાઇલટો જેવા ભરોસાપાત્ર વ્યક્તિઓ સામેલ હતા. આ સિવાય, ઓછામાં ઓછા ત્રણ પ્રસંગોએ ક્રેશ થયેલા પદાર્થોનો કાટમાળ મળી આવ્યો છે. આ કાટમાળમાં મેગ્નેશિયમ એલોય અને એક એવી અત્યંત સખત અજ્ઞાત ધાતુ મળી આવી છે. જેના પર માઇક્રો-મેટિયોરાઇટની અથડામણના નિશાન પણ હતા.
ટ્રમ્પ પ્રશાસન અને આગામી ખુલાસા
શુક્રવારે સંરક્ષણ વિભાગે જે 162 ફાઇલો બહાર પાડી છે તેમાં ફોટોગ્રાફ્સ, વીડિયો ફૂટેજ અને સાક્ષીઓના નિવેદનો સામેલ છે. જેમાં 1947ના ફ્લાઇંગ ડિસ્કના દૃશ્યનો પણ સમાવેશ થાય છે. ટ્રમ્પ પ્રશાસને ભારપૂર્વક જણાવ્યું છે કે, આગામી અઠવાડિયામાં વધારાના દસ્તાવેજો તબક્કાવાર રીતે જાહેર કરવામાં આવશે.
