સુપરસ્ટાર વિજયે રાજકારણમાં ગઠબંધનનું ગણિત બેસાડયું, 4 પાર્ટીઓના ટેકાથી બનાવશે સરકાર? | Vijay TVK plans talks with Congress Left parties to form Coalition government
Vijay TVK Coalition Government: તમિલનાડુમાં ઈતિહાસ રચનારો રાજકીય ફેરફાર જોવા મળી રહ્યો છે. વિધાનસભા ચૂંટણીમાં એક પણ પક્ષને સ્પષ્ટ બહુમતી ન મળ્યા બાદ, રાજ્ય દાયકાઓમાં પ્રથમ વખત ગઠબંધન સરકાર બનવા જઈ રહી છે. અભિનેતામાંથી રાજનેતા બનેલા વિજયના નેતૃત્વવાળી તમિલગા વેટ્રી કઝગમ (TVK) સૌથી મોટા પક્ષ તરીકે ઉભરી આવી છે, પરંતુ 234 સભ્યોની વિધાનસભામાં બહુમતી માટે જરૂરી 118 બેઠકો કરતા ઓછી બેઠકો મેળવવાને કારણે હવે ગઠબંધનનો માર્ગ અપનાવવામાં આવી રહ્યો છે.
શું કોંગ્રેસ વિજયની પાર્ટીને સમર્થન આપશે?
મંગળવાર એટલે કે આજે TVK મુખ્યાલયમાં વિજય દ્વારા નવનિર્વાચિત ધારાસભ્યો સાથે કરવામાં આવેલી બેઠકોમાં ગઠબંધનની રૂપરેખા સ્પષ્ટ થવા લાગી છે. સૂત્રો મુજબ કોંગ્રેસ (5 બેઠકો), VCK (2), CPI (2) અને CPI(M) (2) ના કુલ 11 ધારાસભ્યોનું સમર્થન TVKને બહુમતી અપાવવા માટે પૂરતું હશે. રિપોર્ટ અનુસાર, આ પક્ષો સાથે અનૌપચારિક વાતચીત ચાલી રહી છે. એવું કહેવામાં આવી રહ્યું છે કે તેઓએ ગઠબંધન સરકાર બનાવવાની ઈચ્છા વ્યક્ત કરી છે. 7 મેના રોજ વિજય મુખ્યમંત્રી પદના શપથ લઈ શકે છે.
જનતા ગઠબંધન સરકાર ઈચ્છે છે: VCK પ્રમુખ
ખાનગી ચેનલના રિપોર્ટમાં કરવામાં આવેલા દાવા મુજબ, VCK પ્રમુખ થોલ થિરુમાવલવને કહ્યું કે જનતા ગઠબંધન સરકાર ઈચ્છે છે. અમે અને ડાબેરી પક્ષો રાજ્યમાં ધર્મનિરપેક્ષ મોરચા હેઠળ કામ કરીશું. બીજી તરફ, TVK સૂત્રોએ જણાવ્યું કે વિજયે ચૂંટણી પ્રચાર દરમિયાન જ ગઠબંધન સરકારના વિચારનું સમર્થન કર્યું હતું.
મંત્રીમંડળ વહેંચણીની ફોર્મ્યુલા
અહીં, કોંગ્રેસ મહાસચિવ કેસી વેણુગોપાલે દાવો કર્યો છે કે વિજયે તમિલનાડુમાં સરકાર બનાવવા માટે કોંગ્રેસ પાસે સમર્થન માંગ્યું છે. પાર્ટીએ 108 બેઠકો સાથે વિધાનસભામાં સૌથી મોટા પક્ષ તરીકે સરકાર બનાવવાનો દાવો રજૂ કર્યો છે. એવું કહેવામાં આવી રહ્યું છે કે શપથ ગ્રહણ સમારોહ રાજભવનમાં યોજાશે. રિપોર્ટ અનુસાર, પ્રસ્તાવિત ગઠબંધન હેઠળ કોંગ્રેસને બે મંત્રાલય મળવાની શક્યતા છે, જ્યારે VCK અને ડાબેરી પક્ષોને એક-એક મંત્રાલય આપવામાં આવી શકે છે. TVK પોતાના સાથી પક્ષોને કુલ 4 થી 6 મંત્રી પદ સોંપવાની તૈયારીમાં છે, જેથી અનુભવની અછતને પૂરી કરી શકાય. અહીં એ નોંધવું જરૂરી છે કે TVKના મોટાભાગના ધારાસભ્યો પ્રથમ વખત ચૂંટાયા છે. આવી સ્થિતિમાં વિજયને અનુભવી અને જાણકાર લોકોની જરૂર છે.
આ જ કારણ છે કે સરકારમાં વહીવટી મજબૂતી માટે TVK પૂર્વ IAS અધિકારી અને ભ્રષ્ટાચાર વિરોધી છબી ધરાવતા યુ સગાયમને વિધાનસભામાં લાવવાની વ્યૂહનીતિ બનાવી રહી છે. શક્યતા છે કે વિજય દ્વારા જીતવામાં આવેલી તિરુચી પૂર્વ બેઠક પર પેટાચૂંટણી કરાવીને તેમને ધારાસભ્ય બનાવવામાં આવે. આજે (મંગળવારે) TVK ધારાસભ્યો દ્વારા વિજયને ધારાસભ્ય દળના નેતા તરીકે પસંદ કરી લેવામાં આવ્યા છે, હવે રાજ્યપાલ તેમને સરકાર બનાવવા માટે આમંત્રણ આપશે. પક્ષના સૂત્રોના જણાવ્યા અનુસાર, વિજય ગૃહમાં બહુમતી સાબિત કરવા માટે એક સપ્તાહનો સમય માંગી શકે છે, રાજકીય પંડિતોનું માનવું છે કે આ ગઠબંધન તમિલનાડુના રાજકારણમાં નવો અધ્યાય સાબિત થઈ શકે છે, જ્યાં અત્યાર સુધી સત્તા હંમેશા એક પક્ષના હાથમાં કેન્દ્રિત રહી છે.
