ઈઝરાયલ-લેબેનોન વચ્ચે સીઝફાયર 3 અઠવાડિયા લંબાયું, ટ્રમ્પની મધ્યસ્થતામાં લેવાયો નિર્ણય | Israel Lebanon Ceasefire Extended by 3 Weeks Under Trump’s Mediation
Israel-Lebanon Ceasefire Extended : પશ્ચિમ એશિયા (મિડલ ઈસ્ટ) માં ચાલી રહેલા સંઘર્ષને અટકાવવા માટે અમેરિકન પ્રમુખ ડોનાલ્ડ ટ્રમ્પે મોટી સફળતા મેળવી છે. વોશિંગ્ટનમાં વ્હાઇટ હાઉસ ખાતે યોજાયેલી ઉચ્ચ સ્તરીય બેઠક બાદ ટ્રમ્પે જાહેરાત કરી છે કે ઈઝરાયલ અને લેબેનોન વચ્ચેના સીઝફાયરને વધુ ૩ અઠવાડિયા માટે લંબાવવામાં આવ્યું છે. આ શાંતિ મંત્રણાનો મુખ્ય ઉદ્દેશ્ય મિડલ ઈસ્ટમાં સ્થિરતા લાવવાનો અને લેબેનોનને હિઝબુલ્લાહના ખતરાથી સુરક્ષિત રાખવાનો છે.
વ્હાઇટ હાઉસમાં ઐતિહાસિક બેઠક
ઓવલ ઓફિસમાં યોજાયેલી આ બેઠકમાં અમેરિકા વતી ટ્રમ્પ ઉપરાંત ઉપરાષ્ટ્રપતિ જેડી વેન્સ, સેક્રેટરી ઓફ સ્ટેટ માર્કો રુબિયો અને ઈઝરાયલ તથા લેબેનોનમાં રહેલા અમેરિકન રાજદૂતો પણ ઉપસ્થિત રહ્યા હતા. ટ્રમ્પે આ મંત્રણાને ‘અત્યંત સફળ’ ગણાવતા તેને અમેરિકા માટે એક મોટી રાજદ્વારી જીત ગણાવી છે. આ બેઠક એવા સમયે થઈ છે જ્યારે એક દિવસ પહેલા જ થયેલા હવાઈ હુમલામાં અમલ ખલીલ નામના પત્રકાર સહિત પાંચ લોકોએ જીવ ગુમાવ્યો હતો.
નેતન્યાહૂ અને જોસેફ આઉનની મુલાકાતનો માર્ગ મોકળો
આ શાંતિ મંત્રણાના ભાગરૂપે ટ્રમ્પે હવે ભવિષ્યમાં વધુ મોટા પગલાના સંકેત આપ્યા છે. ટૂંક સમયમાં ઈઝરાયલના વડાપ્રધાન બેન્જામિન નેતન્યાહૂ અને લેબેનોનના રાષ્ટ્રપતિ જોસેફ આઉન વ્હાઇટ હાઉસમાં રૂબરૂ મુલાકાત કરશે. આ મુલાકાત મધ્ય-પૂર્વના ઈતિહાસમાં અત્યંત મહત્વની સાબિત થઈ શકે છે. ટ્રમ્પે સ્પષ્ટ કર્યું છે કે જો આ વિસ્તારમાં સ્થાયી શાંતિ જોઈતી હોય, તો ઈરાને હિઝબુલ્લાહને મળતી આર્થિક મદદ (ફંડિંગ) બંધ કરવી જ પડશે.
સીઝફાયર છતાં જમીની હકીકત ગંભીર
એક તરફ ટ્રમ્પે શાંતિની જાહેરાત કરી છે, તો બીજી તરફ જમીની સ્તરે હિંસા હજુ સંપૂર્ણપણે થમી નથી. સીઝફાયરના વિસ્તારની જાહેરાત બાદ પણ હિઝબુલ્લાહે ઈઝરાયલના શ્ટુઆ (Shtula) વિસ્તારને નિશાન બનાવીને અનેક રોકેટ છોડ્યા હતા. જોકે, ઈઝરાયેલી સેના (IDF) એ દાવો કર્યો છે કે તમામ રોકેટને હવામાં જ તોડી પાડવામાં આવ્યા છે. આ ઘટનાઓ દર્શાવે છે કે સીઝફાયર અત્યંત નાજુક તબક્કે છે.
