રશિયાએ 700 ડ્રોન, ડઝનેક મિસાઇલ ઝીંકી યુક્રેનને હચમચાવ્યું, 16 લોકોના મોત, 80 ઘાયલ | russia massive drone strike ukraine kyiv 700 drones death toll
Russia Ukraine War Update: રશિયા અને યુક્રેન વચ્ચે ચાલી રહેલું યુદ્ધ હવે વધુ ભયાનક વળાંક લઈ રહ્યું છે. બુધવારની રાત યુક્રેન માટે કાળી સાબિત થઈ હતી, જ્યારે રશિયાએ સેંકડો ડ્રોન અને ડઝનબંધ મિસાઇલો વડે યુક્રેનની રાજધાની કીવ સહિતના નાગરિક વિસ્તારો પર અત્યાર સુધીનો સૌથી મોટો હવાઈ હુમલો કર્યો હતો. આ હુમલામાં 16 નિર્દોષ લોકોએ જીવ ગુમાવ્યા છે, જ્યારે 80થી વધુ લોકો ગંભીર રીતે ઘાયલ થયા છે.
આકાશમાંથી આવ્યું મોત
યુક્રેનના વિદેશ મંત્રી એન્ડ્રી સિબિહાના જણાવ્યા અનુસાર, રશિયાએ આ હુમલામાં આશરે 700 ડ્રોન અને અનેક બેલેસ્ટિક તેમજ ક્રૂઝ મિસાઇલોનો ઉપયોગ કર્યો હતો. છેલ્લા બે અઠવાડિયામાં રશિયા તરફથી કરવામાં આવેલો આ સૌથી મોટો હુમલો છે.
ક્યાં કેટલું નુકસાન?
રાજધાની કીવમાં મિસાઇલ હુમલામાં 12 વર્ષના બાળક સહિત 4 લોકોના મોત થયા છે. અહીં 50થી વધુ લોકો ઘાયલ થયા હતા. દક્ષિણી બંદર ઓડેસા શહેરમાં રશિયન મિસાઇલોએ હાહાકાર મચાવ્યો હતો. જેમાં 9 લોકોના મોત થયા છે. મધ્ય યુક્રેનના ડિનિપ્રો અને ઝાપોરિજ્જિયામાં 3 અને દક્ષિણમાં 1 વ્યક્તિનું મોત થયું છે.
આ પણ વાંચો : તોઈબાના આતંકી હાફિઝ સઈદના ‘રાઈટ હેન્ડ’ને પાકિસ્તાનમાં અજાણ્યા હુમલાખોરોએ ગોળી મારી
636 શાહેદ ડ્રોનનો ઉપયોગ યુક્રેનનો વળતો પ્રહાર
રશિયાએ આ હુમલામાં ઈરાની બનાવટના શાહેદ પ્રકારના ડ્રોનનો મોટો જથ્થો ઉતાર્યો હતો. યુક્રેનિયન વાયુસેનાએ દાવો કર્યો છે કે, તેમની એર ડિફેન્સ સિસ્ટમે 703માંથી 667 લક્ષ્યોને હવામાં જ તોડી પાડ્યા હતા. જોકે, 20 ડ્રોન અને 12 મિસાઇલો સુરક્ષા કવચ ભેદીને રહેણાંક વિસ્તારોમાં ત્રાટકી હતી.
આ યુદ્ધ અપરાધ છે, યુક્રેનનો આક્રોશ
વિદેશ મંત્રી સિબિહાએ આ હુમલાને યુદ્ધ અપરાધ ગણાવતાં કહ્યું કે, નાગરિકોને આ રીતે નિશાન બનાવવાની ઘટનાને સામાન્ય ન ગણી શકાય. વિશ્વએ આના માટે જવાબદાર લોકોને સજા અપાવવી જોઈએ. રશિયાના આ હુમલાથી સમગ્ર યુરોપમાં ફરી એકવાર ચિંતાનું મોજું ફરી વળ્યું છે.
