ઈરાનના નવા સુપ્રીમ લીડર બન્યા મોજતબા ખામેનેઈ, અમેરિકા-ઈઝરાયલને આપી ધમકી | Mojtaba Khamenei Appointed as Iran’s New Supreme Leader 2026
Mojtaba Khamenei Appointed as Iran’s New Supreme Leader : અમેરિકા અને ઈઝરાયલના ક્રૂર હુમલામાં મૃત્યુ પામેલા ઈરાનના સુપ્રીમ લીડર આયતુલ્લાહ અલી ખામેનાઈના સ્થાને હવે તેમના દીકરા ઈરાનના નવા સુપ્રીમ લીડર બની ગયા છે. તેમણે સત્તા હાથમાં લેતા જ અમેરિકા અને ઈઝરાયલને ધમકી આપી દીધી છે.
સત્તાવાર વરણી અને પડકારો
ઈરાનની શક્તિશાળી ‘નિષ્ણાતોની પરિષદ’ (Assembly of Experts) એ એક તાકીદની બેઠક બાદ મોજતબા ખામેનેઈને ઈરાનના નવા સર્વોચ્ચ નેતા તરીકે ચૂંટી કાઢ્યા છે. પિતા આયતુલ્લા અલી ખામેનેઈના નિધન બાદ ઉભી થયેલી સત્તાની શૂન્યતાને ભરવા માટે આ નિર્ણય લેવામાં આવ્યો છે. મોજતબા ખામેનેઈ લાંબા સમયથી પડદા પાછળ રહીને ઈરાનના રાજકીય અને સૈન્ય માળખા પર મજબૂત પકડ ધરાવે છે, જેના કારણે તેમની વરણી અપેક્ષિત માનવામાં આવતી હતી.
કોણ છે મોજતબા ખામેનેઈ?
મોજતબા ખામેનેઇનો જન્મ 1969માં મશહદ શહેરમાં થયો હતો. તેમણે ધાર્મિક માહોલમાં અભ્યાસ કર્યો છે. ઈરાન અને ઈરાક યુદ્ધના અંતિમ દોરમાં તેમણે રેવોલ્યુશનરી ગાર્ડમાં કામ કર્યું હતું. તે લાંબા સમયથી તેમના પિતાના નજીકના મનાતા હતા. કહેવાય છે કે તે પરદા પાછળ રહીને મહત્ત્વના નિર્ણયો લેવામાં મોટી ભૂમિકા ભજવતા હતા. જોકે તેમણે અત્યાર સુધી કોઈ સત્તાવાર સરકારી પદ સંભાળ્યા નહોતા. જોકે તે પિતા માટે મહત્ત્વના સલાકાર મનાતા હતા.
IRGC સાથે મજબૂત સંબંધો
મોજતબા ખામેનેઈની વરણીમાં ઈરાનની સૌથી શક્તિશાળી સૈન્ય પાંખ ‘ઈસ્લામિક રિવોલ્યુશનરી ગાર્ડ કોર્પ્સ’ (IRGC) ની ભૂમિકા સૌથી નિર્ણાયક રહી છે. અમેરિકા અને ઈઝરાયેલ સાથે વધી રહેલા યુદ્ધના તણાવ વચ્ચે, સેનાને એક એવા નેતાની જરૂર હતી જે પિતાની કઠોર નીતિઓને આગળ ધપાવી શકે. હવે મોજતબા સામે સૌથી મોટો પડકાર ઈઝરાયેલના હુમલાઓનો વળતો જવાબ આપવો અને દેશની આંતરિક સુરક્ષા જાળવવી તે રહેશે.
વિશ્વની નજર ઈરાનના આગામી કદમ પર
મોજતબા ખામેનેઈ સત્તા પર આવતા જ તેમણે ઈતિહાસના સૌથી વિનાશક હુમલાની ચેતવણીને દોહરાવી છે. અમેરિકા અને ઈઝરાયેલ માટે મોજતબા એક ‘કઠોરપંથી’ નેતા તરીકે જાણીતા છે, જેમના નેતૃત્વમાં ઈરાન વધુ આક્રમક બની શકે છે. ખાસ કરીને પરમાણુ કાર્યક્રમ અને ‘એક્સિસ ઓફ રેઝિસ્ટન્સ’ (હિઝબુલ્લાહ, હમાસ વગેરે) ને અપાતા સમર્થન બાબતે ઈરાનનું વલણ હવે કેવું રહેશે, તેના પર સમગ્ર વિશ્વની નજર છે.
