ઈરાને 2000 કિ.મી. દૂર સુધી પ્રહાર કરવા સક્ષમ મિસાઈલ તહેનાત કરી, યુરોપના પણ અનેક શહેર રેન્જમાં | iran new underground missile city khorramshahr 4 launch
Iran Unveils Its New Khorrmanshahr-4 : ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC) એ એક નવી અન્ડરગ્રાઉન્ડ (ભૂગર્ભ) મિસાઈલ સિટી તૈયાર કર્યું છે. આ સાથે જ અત્યંત આધુનિક બેલેસ્ટિક મિસાઈલ ખોર્રમશહર-4 (Khorramshahr-4) ને સંપૂર્ણ ઓપરેશનલ મોડમાં લાવી દીધી છે. 2000 કિલોમીટરની રેન્જ અને 1500 કિલોગ્રામ વજનના વોરહેડ સાથેની આ મિસાઈલે ઈરાનની સૈન્ય તાકાતમાં મોટો વધારો કર્યો છે.
ખોર્રમશહર-4 મિસાઈલની મુખ્ય વિશેષતાઓ
રેન્જ: 2000 કિમી : જેનાથી મધ્ય પૂર્વના દેશો, ઈઝરાયેલ અને યુરોપના કેટલાક હિસ્સાઓ નિશાના પર આવી શકે છે.
વોરહેડ: 1500 કિલોગ્રામ : આટલો ભારે વોરહેડ મોટા પ્રમાણમાં વિનાશ વેરવા સક્ષમ છે.
ચોકસાઈ : આશરે 30 મીટર: એટલે કે તે ખૂબ જ સચોટ હુમલો કરી શકે છે.
ગતિ અને ક્ષમતા: હાઈપરસોનિક સ્પીડ અને હવામાં વળાંક લેવાની ક્ષમતા ધરાવે છે. આનાથી દુશ્મનની મિસાઈલ ડિફેન્સ સિસ્ટમ (જેમ કે ઈઝરાયેલની આયર્ન ડોમ) ને ચકમો આપવો સરળ બને છે.
ભેદવાની ક્ષમતા: તે મજબૂત બંકરો અને સુરક્ષિત ઠેકાણાને પણ તોડી પાડવા માટે સક્ષમ છે.
ઈંધણ: લિક્વિડ ફ્યુઅલ: અગાઉના વર્ઝન કરતા વધુ એડવાન્સ ટેકનોલોજીનો ઉપયોગ.
ઈરાને તેને ‘એક્ટિવ ડિટરેન્સ’ (પ્રતિરોધ) નું મુખ્ય હથિયાર ગણાવ્યું છે, જેનો અર્થ છે કે હવે માત્ર બચાવ નહીં, પરંતુ ઝડપી વળતો હુમલો કરવાની વ્યૂહનીતિ અપનાવવામાં આવશે.
શું છે આ નવી ‘મિસાઈલ સિટી’?
* IRGC એ એક નવી ભૂગર્ભ સુવિધાનું ઉદઘાટન કર્યું છે, જેને ‘મિસાઈલ સિટી’ તરીકે ઓળખવામાં આવે છે.
* આ સુવિધા સંપૂર્ણપણે જમીનની નીચે છે, જ્યાં મિસાઈલોનું નિર્માણ, સ્ટોરેજ અને લોન્ચિંગ કરી શકાય છે.
* આવી સુવિધાઓ દુશ્મનના હવાઈ હુમલાઓથી સુરક્ષિત રહે છે. ઈરાન પાસે પહેલાથી જ આવા અનેક ભૂગર્ભ બેઝ છે.
* આ મિસાઈલ સિટી દ્વારા ઈરાને સ્પષ્ટ સંદેશ આપ્યો છે કે તેની સૈન્ય તૈયારીઓ અત્યંત મજબૂત છે.
અમેરિકા ઈરાન વચ્ચે સતત વધતો તણાવ
ઈરાન અને ઈઝરાયેલ વચ્ચે તણાવ અત્યારે ચરમસીમા પર છે. ગત વર્ષે જૂનમાં બંને દેશો વચ્ચે 12 દિવસ સુધી યુદ્ધ ચાલ્યું હતું. ઈરાન પાસે મધ્ય પૂર્વમાં સૌથી મોટો બેલેસ્ટિક મિસાઈલ ભંડારમાં આશરે 2000-3000 મિસાઈલો છે.
તણાવની વૈશ્વિક અસરો
ઈઝરાયેલ માટે ખતરો: 2000 કિમીની રેન્જ આખા ઈઝરાયેલને કવર કરે છે. હાઈપરસોનિક ગતિને કારણે તેને રોકવું મુશ્કેલ છે.
અમેરિકાની ચિંતા: મધ્ય પૂર્વમાં આવેલા અમેરિકી બેઝ પણ હવે નિશાના પર છે.
પ્રાદેશિક સંતુલન: સાઉદી અરેબિયા અને UAE જેવા દેશો પણ પોતાની સંરક્ષણ ક્ષમતા વધારી રહ્યા છે.
આંતરરાષ્ટ્રીય પ્રતિક્રિયા: અમેરિકા અને ઈઝરાયેલે તેને ઉશ્કેરણીજનક ગણાવ્યું છે.
આગળ શું?
નિષ્ણાતોના અનુસાર ઈરાનના આ પગલાથી આ પ્રદેશમાં તણાવ વધુ વધી શકે છે. ઈરાને સ્પષ્ટ કર્યું છે કે, જો કોઈ ખતરો આવશે તો તેનો ઝડપી અને મજબૂત જવાબ આપવામાં આવશે. હવે આખી દુનિયાની નજર અમેરિકા અને ઈઝરાયેલના પ્રતિસાદ પર છે.
