પશ્ચિમ બંગાળની ફલતા વિધાનસભા બેઠક પર ભાજપનો શાનદાર વિજય | BJP wins a landslide victory in West Bengal’s Falta assembly seat
21 મેનાં રોજ થયેલી ફરીથી ચૂંટણીમાં 86 ટકા મતદાન થયું હતું
ઇવીએમ સાથે ચેડાં અને ચૂંટણી અનિયમિતતાઓનાં આરોપ પછી ચૂંટણી પંચે ફરીથી મતદાનનો નિર્ણય લીધો હતો
કોલકાતા: ભાજપે ફલતા વિધાનસભા બેઠક પર ફરીથી થયેલા મતદાનમાં એક લાખથી વધારે મતોનાં અંતરથી શાનદાર વિજય પ્રાપ્ત કર્યો છે. આ બેઠક લાંબા સમયથી તૃણમુલનો ગઢ ગણાતી હતી. ઇવીએમ સાથે ચેડાં અને ચૂંટણી અનિયમિતતાઓનાં આરોપ પછી ચૂંટણી પંચે ફલતા વિધાનસભાનાં તમામ મતદાન મથકો પર ફરીથી ચૂંટણી કરાવવાનો નિર્ણય લીધો હતો. ૨૧ મેનાં રોજ ફરીથી મતદાન યોજવામાં આવ્યું હતું. જેમાં ૮૬ ટકા જેટલું મતદાન થયું હતું.
જો કે આ વખતે તૃણમુલ ચોથા સ્થાને રહી છે અને તેની ડિપોઝીટ પણ જપ્ત થઇ ગઇ છે. ૧,૪૯,૬૬૬ મતો મેળવીને ભાજપનાં દેબાંગ્શુ પાંડાએ પોતાની સૌથી નજીકનાં હરીફ સીપીઆઇ(એમ)નાં શંભુનાથ કુર્મીને ૧,૦૯,૦૨૧ મતોથી હરાવ્યા છે.
કુર્મીને ૪૦,૬૪૫ મતો મળ્યા હતાં. જ્યારે કોંગ્રેસનાં અબ્દુલ રઝઝાક મોલ્લા ૧૦,૦૮૪ મતોથી સાથે ત્રીજા ક્રમે રહ્યાં હતાં. તૃણમુલનાં જહાંગીર ખાન જે ક્યારેક ફલતા ચૂંટણી પ્રચાર દરમિયાન સૌથી વધારે ચર્ચામાં રહેનારા ચહેરાઓ પૈકીનાં એક હતાં. તેમને ફક્ત ૭૭૮૩ વોટ મળ્યા હતાં અને તે ચોથા સ્થાને રહ્યાં હતાં અને તેમની ડિપોઝીટ પણ જપ્ત થઇ ગઇ હતી. મતદાનનાં બે દિવસે ખાને જાહેરાત કરી હતી કે ફલતાનાં હિતને ધ્યાનમાં રાખીને ચૂંટણીમાંથી ખસી રહ્યાં છે. ફલતા વિધાનસભા પર ૨૦૧૧થી તૃણમુલનો કબજો હતો. ૨૦૨૧માં પણ તૃણમુલે આ સીટ પર પોતાનો કબજો કાયમ રાખ્યો હતો અને લગભગ ૫૭ ટકા મતો મેળવ્યા હતાં. ફલતામાં વિજયની સાથે પશ્ચિમ બંગાળમાં ભાજપની સીટોેની સંખ્યા ૨૦૭થી વધીને ૨૦૮ થઇ ગઇ છે. જો કે મુખ્યપ્રધાન સુવેન્દુ અધિકારી બે બેઠકો પરથી જીત્યા હતાં અને તેમણે નંદીગ્રામ બેઠક ખાલી કરતા ભાજપ સીટોની સંખ્યા ઘટીને ફરી ૨૦૭ થઇ ગઇ છે.
