૧૯૫૭માં ડાબેરી શાસનની કેરલથી શરુઆત અને કેરલથી અંત, ચૂંટણી પરિણામોએ દેશની રાજકીય ભૂગોળ બદલી | In 1957 the Left rule began and ended in Kerala results changed political geography
નવી દિલ્હી,4 મે,2026,સોમવાર
પશ્ચિમ બંગાળ, તમિલનાડુ, કેરલ અને પોડ્ડીચેરીના ચૂંટણી પરિણામોએ ભારતની રાજકીય ભૂગોળને બદલી નાખી છે. પશ્ચિમ બંગાળમાં છેલ્લા ૧૫ વર્ષથી શાસન કરતા મમતા બેનરજીની તૃણમૂલ કોંગ્રેસનો ઘોર પરાજય થયો છે અને ભાજપે ૨૯૨માંથી ૨૦૫ જેટલી બેઠકો મેળવીને ઇતિહાસ રચ્યો છે. એક સમયે શુન્ય વોટ શેર ધરાવતી ભગવી પાર્ટીએ આઝાદીના ઇતિહાસમાં પ્રથમ વાર પશ્ચિમ બંગાળમાં સરકાર રચશે. બીજુ એક આશ્ચર્યજનક પરિણામ તામિલનાડુની વિધાનસભા ચૂંટણીમાં ટીવીકે નામની એક નવી જ રચાયેલી રાજકીય પાર્ટી તમિલ ફિલ્મ સ્ટાર થાલાપથી વિજયના નેતૃત્વમાં ડીએમકે અને એઆઇડીએમકે જેવી પરંપરાગત રાજકીય પક્ષોને સત્તાથી વંચિત કરી દીધા છે.
ટીવીકેને બહુમતિ કરતા થોડી ઓછી બેઠકો મળી રહી છે તેમ છતાં સૌથી મોટા પક્ષ તરીકે સરકાર રચવાનો દાવો કરશે. આસામમાં ૧૦૦ કરતા વધારે બેઠકો મેળવીને વિધાનસભામાં સતત ૩ વાર જીત મેળવી છે. સૌથી મોટો ઇતિહાસ તો કેરલમ રાજયમાં ડાબેરી પક્ષોની હાર થતા રચાયો છે. કોંગ્રેસ સમર્થિત યુડીએફ પક્ષને સ્પષ્ટ બહુમતિ મળવાની સાથે જ ડાબેરીઓએ ભારતમાં ડાબેરી શાસિત એક માત્ર રાજય ગુમાવ્યું છે. આ સાથે જ છેલ્લા ૧૯૭૭ પછી એટલે કે ૪૯ વર્ષના ઇતિહાસમાં પ્રથમ વાર ભારતના કોઇ રાજયમાં ડાબેરી વિચારધારાની સત્તા ના હોય તેવું બન્યું છે. એક સમયે કેરલ, ત્રિપુરા અને પશ્ચિમ બંગાળમાં ડાબેરી પક્ષોનો ગઢ રહયો હતો. કેરલમ ભારતનું પ્રથમ રાજય હતું જેમાં ૧૯૫૭માં પ્રથમ વાર ડાબેરીપક્ષોની સરકાર બની હતી.
નવાઇની વાત તો એ છે કે જે રાજયમાં પ્રથમવાર ડાબેરી સરકાર રચાઇ હતી ત્યાંથી જ અંતિમ વિદાય મળી રહી છે.ચૂંટણી પરિણામોમાં લેફટ ડેમોક્રેટની યુનાઇટેડ ડેમોક્રેટિક ફન્ટ સામે હાર મળી છે. ૧૯૬૪માં કોમ્યુનિસ્ટ પાર્ટીમાં ભાગલા થતા સીપીઆઇ અને સીપીઆઇ (એમ) એ બે પક્ષ ઉભા થયા હતા. પશ્ચિમ બંગાળની વાત કરીએ તો પહેલા જયોતિબસુ અને ત્યાર બાદ બુધ્ધદેવ ભટ્ટાચાર્યના નેતૃત્વમાં ૧૯૭૭ થી ૨૦૧૧ સુધી કોમ્યુનિસ્ટ પાર્ટીનું લાંબુ શાસન રહયું હતું. ૨૦૧૧માં મમતા બેનરજીએ ભારે સંઘર્ષ કરીને ગ્રાઉન્ડ પર રાજકીય લડાઇ લડીને લેફટ સરકારને ઉખાડી દીધી હતી. મમતા બેનરજીના ટીએમસી પક્ષનું બંગાળમાં સતત ૩ ટર્મથી શાસન રહયું હતું. પશ્ચિમ બંગાળમાં ભાજપની મતઆંધી સામે ટીએમસી તણખલું બનીને ઉડી રહી છે.
