ગુજરાતી ગેંગને 10 જન્મ પણ ઓછા પડશે’, ફાલ્ટામાં ફરી ચૂંટણીના આદેશ બાદ અભિષેક બેનરજીનું નિવેદન | west bengal election falta repoll abhishek banerjee vs amit malviya diamond harbor model
West Bengal Falta Repolling: પશ્ચિમ બંગાળ વિધાનસભા ચૂંટણીના પરિણામો પૂર્વે ફાલ્ટા વિધાનસભા બેઠક પર ચૂંટણી પંચના એક નિર્ણયે રાજ્યમાં નવો રાજકીય સંઘર્ષ શરૂ કરી દીધો છે. 29 એપ્રિલના રોજ થયેલી હિંસા અને ગેરરીતિઓના ગંભીર આરોપો બાદ પંચે આખી બેઠક પર નવેસરથી મતદાન કરાવવાનો આદેશ આપ્યો છે.
ચૂંટણી પંચનો મોટો નિર્ણય
ચૂંટણી પંચે 144-ફાલ્ટા વિધાનસભા ક્ષેત્રના તમામ 285 મતદાન કેન્દ્રો (સહાયક કેન્દ્રો સહિત) પર ફરીથી મતદાન કરવાનો નિર્દેશ આપ્યો છે. જેના પગલે હવે આગામી 21 મે 2026 ના દિવસે ત્યાં ફરી મતદાન થશે. સવારે 7 વાગ્યાથી સાંજે 6 વાગ્યા સુધી મતદાન ચાલશે. 24 મે 2026 ના દિવસે મતગણતરી કરવામાં આવશે. નોંધનીય છે કે રાજ્યની અન્ય 293 બેઠકોનું પરિણામ 4 મેના રોજ જાહેર થશે, પરંતુ ફાલ્ટાનું પરિણામ અલગથી જાહેર કરવામાં આવશે.
આ પણ વાંચો: ભાજપ 500-700 મતે આગળ હોય તો તરત રિ-કાઉન્ટિંગ માંગજો, મમતા બેનરજીનો એજન્ટોને કડક આદેશ
શા માટે લેવાયો આ નિર્ણય?
29 એપ્રિલના રોજ મતદાન દરમિયાન ફાલ્ટામાં ભારે રાજકીય ઝપાઝપી થઈ હતી અને EVM પર સ્ટીકર ચોંટાડવાના ગંભીર કિસ્સાઓ પ્રકાશમાં આવ્યા હતા. આ ઘટનાક્રમને લોકશાહી પ્રક્રિયાનું ઉલ્લંઘન માનીને પંચે આકરો નિર્ણય લીધો છે.
અમિત માલવીયા vs અભિષેક બેનર્જી
આ નિર્ણય બાદ ભાજપના નેતા અમિત માલવીયાએ મમતા સરકાર પર પ્રહાર કરતા કહ્યું કે, ડાયમંડ હાર્બર મોડલ હવે ધ્વસ્ત થઈ ચૂક્યું છે. ભાજપના આ પ્રહાર સામે ટીએમસી સાંસદ અભિષેક બેનર્જી લાલચોળ થઈ ગયા હતા. તેમણે સોશિયલ મીડિયા પર વળતો પ્રહાર કરતા જણાવ્યું કે, મારા ડાયમંડ હાર્બર મોડલને કોઈ નુકસાન પહોંચાડી શકશે નહીં, ખાસ કરીને આ બાંગ્લા વિરોધી ગુજરાતી ટોળકી તો બિલકુલ નહીં. તેમણે ભાજપને ખુલ્લો પડકાર ફેંકતા કહ્યું કે, જો હિંમત હોય તો ભાજપ તેના સૌથી મજબૂત ઉમેદવારને ફાલ્ટાના મેદાનમાં ઉતારે અને બધું જ દાવ પર લગાવીને જોઈ લે. ફાલ્ટા બેઠક ડાયમંડ હાર્બર વિસ્તારમાં આવતી હોવાથી ટીએમસી માટે તે પ્રતિષ્ઠાનો જંગ બની ગઈ છે. હવે 21 મેના રોજ થનારા મતદાન પર આખા દેશની નજર રહેશે.
