ઈરાન સાથે યુદ્ધ વચ્ચે ટ્રમ્પને ઝટકો આપતો સર્વે, 62 ટકા અમેરિકન સ્વભાવ અને કામકાજથી નાખુશ | Trump approval Rating Downs many americans questions trump temperament iran war
Trump’s approval Rating Downs: અમેરિકામાં હાલમાં કરવામાં આવેલા એક સર્વે મુજબ, રાષ્ટ્ર પ્રમુખ ડોનાલ્ડ ટ્રમ્પની કાર્યશૈલી અને સ્વભાવને લઈને અમેરિકન નાગરિકોમાં ચિંતા વધતી જઈ રહી છે. Reuters અને Ipsosના સંયુક્ત સર્વેમાં એ વાત સામે આવી છે કે ત્યાં મોટી સંખ્યામાં લોકો રાષ્ટ્ર પ્રમુખ ટ્રમ્પના સ્વભાવ અને નિર્ણય લેવાની ક્ષમતા પર સવાલ ઉઠાવી રહ્યા છે. સર્વેમાં દાવો કરવામાં આવ્યો છે કે 62 ટકા અમેરિકન ટ્રમ્પના કામકાજથી ખુશ નથી. જેમાં તેમની પાર્ટીના કેટલાક રિપબ્લિકન પણ સામેલ છે, જે તેમના સ્વભાવ પર સવાલ ઉઠાવી રહ્યા છે. જો કે ટ્રમ્પનું એપ્રુવલ રેટિંગ 36 ટકા પર જળવાઈ રહ્યું છે.
ઘણા અમેરિકન તેમના સ્વભાવથી ખુશ નથી
સર્વેમાં કહેવામાં આવ્યું છે કે બહુ ઓછા અમેરિકન ઈરાન પર અમેરિકા હુમલા અથવા NATOમાંથી બહાર નીકળવાની ચર્ચા જેવા ટ્રમ્પના નિર્ણયનું સમર્થન કરે છે. આ સર્વે રિપોર્ટ ત્યારે આવ્યો છે, જ્યારે ટ્રમ્પ પોપ સાથે વિવાદોમાં ઘેરાયેલા છે અને ઈરાન યુદ્ધમાં પણ તેઓ વ્યૂહાત્મક રીતે પાછળ રહી રહ્યા છે. સર્વે મુજબ હાલના દિવસોમાં રાષ્ટ્ર પ્રમુખ ડોનાલ્ડ ટ્રમ્પનું એપ્રુવલ રેટિંગ તેમના કાર્યકાળના સૌથી નીચલા સ્તરે બનેલું છે, કારણ કે ઈરાન યુદ્ધ અને પોપ લિયો સાથેના વિવાદ વચ્ચે ઘણા અમેરિકન તેમના સ્વભાવથી ખુશ નથી.
એપ્રુવલ રેટિંગ 47 ટકાથી 36 ટકા પર આવી ગયું
સોમવારે પૂરા થયેલા છ દિવસીય જનમત સર્વેક્ષણ દર્શાવે છે કે માત્ર 36% અમેરિકન ટ્રમ્પના કામ કરવાની રીતને પસંદ કરે છે, જે એક મહિના પહેલાના સ્તર પર જ બનેલું છે. ટ્રમ્પને તેમના વર્તમાન કાર્યકાળમાં સૌથી વધુ એપ્રુવલ રેટિંગ (47 ટકા) ત્યારે મળ્યું હતું, જ્યારે તેમણે 20 જાન્યુઆરી, 2025ના રોજ રાષ્ટ્ર પ્રમુખ તરીકે પદના શપથ લીધા હતા. જ્યારે 28 ફેબ્રુઆરીએ તેમના પ્રશાસન અને ઈઝરાયલ દ્વારા ઈરાન વિરુદ્ધ યુદ્ધ શરૂ કરવામાં આવ્યું, ત્યારથી જ ટ્રમ્પ પર આ દબાણ બનેલું છે. લગભગ 36% અમેરિકન ઈરાન વિરુદ્ધ અમેરિકન સૈન્ય હુમલાઓનું સમર્થન કરે છે, જ્યારે 10-12 એપ્રિલના રોજ કરવામાં આવેલા સર્વેમાં આ આંકડો 35% હતો. દેશભરમાં 4,557 અમેરિકન વયસ્કો પર ઓનલાઇન કરવામાં આવેલા આ તાજા સર્વેમાં 2 ટકા પોઇન્ટની ભૂલની હોય તેવી શક્યતા વ્યક્ત કરવામાં આવી છે.
રિપબ્લિકન પાર્ટીમાં પણ ફાંટા
સર્વેમાં જાણવા મળ્યું છે કે ટ્રમ્પની રિપબ્લિકન પાર્ટીના લોકો પણ ટ્રમ્પને સમર્થન આપવાના મુદ્દે બે ફાટામાં વહેંચાયેલા છે. તેમની પાર્ટીના કેટલાક સભ્યો 79 વર્ષીય રાષ્ટ્ર પ્રમુખના સ્વભાવ અને માનસિક સ્થિતિને લઈને અમુક અંશે ચિંતિત છે. સર્વે મુજબ, માત્ર 26% અમેરિકનનું માનવું છે કે તેઓ ટ્રમ્પને ‘શાંત સ્વભાવ’વાળા માને છે. આ સવાલ પર રિપબ્લિકન વિભાજિત છે. 53% રિપબ્લિકન તેમને શાંત સ્વભાવના માને છે, જ્યારે 46%નું કહેવું છે કે તેઓ તેવા નથી. કેટલાક લોકોએ આ સવાલનો જવાબ આપવાનો ઇન્કાર કર્યો હતો. બીજી તરફ વિપક્ષમાં માત્ર 7% ડેમોક્રેટ જ ટ્રમ્પને શાંત સ્વભાવના માને છે.
ટ્રમ્પ યુદ્ધ પૂર્ણ કરવા અકળાયા?
જણાવી દઈએ કે હાલના દિવસોમાં ટ્રમ્પની બેચેની અનેક પ્રસંગોએ જાહેર થઈ છે. તેમણે પાછલા દિવસોમાં સોશિયલ મીડિયા પર ઈરાનની સભ્યતાને ભૂસી નાખવાની ધમકી પોસ્ટ કરી હતી, અને સાથે જ ઈરાન યુદ્ધની પોપ દ્વારા કરવામાં આવેલી આલોચના બાદ, પોપ લિયો પર અપરાધના મામલામાં નબળા હોવાનો આરોપ લગાવતા તેમના પર પણ નિવેદન આપ્યું હતું. ટ્રમ્પે હવે ઈરાનના તમામ પુલો અને પાવર પ્લાન્ટ્સને નષ્ટ કરવાની પણ ધમકી આપી છે.
જીવનધોરણના મામલે ટ્રમ્પનું એપ્રુવલ રેટિંગ 26% રહ્યું
આ વર્ષની શરૂઆતમાં ટ્રમ્પે તેમના સહયોગીઓને ત્યારે ચોંકાવી દીધા હતા, જ્યારે તેમણે ગ્રીનલૅન્ડને અમેરિકામાં ભેળવવાની પોતાની માંગને લઈને NATO સહયોગી ડેનમાર્ક વિરુદ્ધ સૈન્ય બળનો ઉપયોગ કરવાની ધમકી આપી હતી. વ્હાઇટ હાઉસ દ્વારા આ સર્વે પર ટિપ્પણીની વિનંતીનો તાત્કાલિક કોઈ જવાબ આપવામાં આવ્યો નથી. આ સર્વે ત્યારે આવ્યો છે, જ્યારે ઈરાન સાથેના યુદ્ધને કારણે પેટ્રોલના ભાવમાં મોટો ઉછાળો આવ્યો છે, જેની અસર મોટાભાગના અમેરિકનોની અંગત આર્થિક સ્થિતિ પર પડી છે. અમેરિકામાં જીવનનિર્વાહના ખર્ચને સંભાળવાના મામલે ટ્રમ્પનું એપ્રુવલ રેટિંગ 26% રહ્યું, જે અત્યાર સુધીના તેમના સૌથી ઓછા રેટિંગની બરાબર છે.
સર્વે ટ્રમ્પ માટે મોટી ચેતવણી
તે જ રીતે, પોલમાં સામેલ માત્ર 26% લોકોએ કહ્યું કે ઈરાનમાં અમેરિકન સૈન્ય કાર્યવાહી, તેના પર ખર્ચવામાં આવેલા નાણાંના સંદર્ભમાં યોગ્ય હતી. બીજી તરફ માત્ર 25% લોકોએ કહ્યું કે તેમને લાગે છે કે ઈરાન પર અમેરિકન હુમલાઓથી અમેરિકા વધુ સુરક્ષિત બનશે. જો કે ટ્રમ્પના આક્રમક નિવેદનો અને નીતિઓએ જનતા વચ્ચે તેમના વિશ્વાસને નબળો પાડ્યો છે. ખાસ કરીને ઈરાન યુદ્ધ અને આંતરરાષ્ટ્રીય વિવાદોએ ટ્રમ્પ છબીને પ્રભાવિત કરી છે. આ રીતે આ સર્વે ટ્રમ્પ માટે એક ચેતવણી પણ માનવામાં આવી રહ્યો છે.
