હોર્મુઝ સંકટનો અંત આવશે? ઈરાને અમેરિકાને કરી નવી ઓફર, દુનિયાનું ટેન્શન ઓછું થશે | Iran’s Proposal for Safe Passage in Strait of Hormuz via Oman Side
Iran’s Proposal for Safe Passage in Strait of Hormuz : છેલ્લા દોઢ મહિનાથી ચાલી રહેલા અમેરિકા-ઈઝરાયેલ અને ઈરાન વચ્ચેના યુદ્ધને કારણે વૈશ્વિક ઉર્જા પુરવઠામાં જે અવરોધ ઊભો થયો છે, તેમાં હવે સમાધાનની આશા જાગી છે. રોઇટર્સના અહેવાલ મુજબ, ઈરાને અમેરિકા સાથેની મંત્રણામાં એક પ્રસ્તાવ રજૂ કર્યો છે, જેમાં તે ઓમાન તરફના સમુદ્રી માર્ગે જહાજોને હુમલાના જોખમ વિના મુક્તપણે પસાર થવા દેવા માટે સંમત થઈ શકે છે.
શું છે ઈરાનનો નવો પ્રસ્તાવ?
હોર્મુઝની સામુદ્રધુની માત્ર 34 કિમી પહોળી છે, જેનો એક હિસ્સો ઈરાન અને બીજો હિસ્સો ઓમાનના કાર્યક્ષેત્રમાં આવે છે. ઈરાને પ્રસ્તાવ મૂક્યો છે કે જો અમેરિકા તેની માંગણીઓ સ્વીકારે, તો તે ઓમાનના જળક્ષેત્રમાંથી પસાર થતા જહાજોને કોઈ અવરોધ વિના જવા દેશે. આ પ્રસ્તાવ ત્યારે જ અમલમાં આવશે જો વોશિંગ્ટન અને તેહરાન વચ્ચે યુદ્ધ રોકવા માટે કોઈ મજબૂત સમજૂતી થાય.
માઈન્સ અંગે અસ્પષ્ટતા
જોકે, ઈરાને તે વિસ્તારમાં બિછાવેલી સમુદ્રી માઈન્સ (Mines) દૂર કરશે કે કેમ અને ઈઝરાયેલ સાથે જોડાયેલા જહાજોને પણ આ રાહત મળશે કે નહીં, તે અંગે હજુ સ્પષ્ટતા કરવામાં આવી નથી. 28 ફેબ્રુઆરીથી શરૂ થયેલા આ યુદ્ધને કારણે હોર્મુઝમાંથી થતી અવરજવર અટકી પડી છે. હાલમાં ગલ્ફ વિસ્તારમાં સેંકડો ટેન્કરો અને લગભગ 20000 જેટલા નાવિકો અટવાયેલા છે. દુનિયાના કુલ ઓઈલ અને ગેસ પુરવઠાનો 20 % હિસ્સો આ સાંકડા માર્ગેથી પસાર થાય છે, જે યુદ્ધને કારણે ખોરવાઈ ગયો છે.
વાટાઘાટોનો આગામી રાઉન્ડ
રાષ્ટ્રપતિ ડોનાલ્ડ ટ્રમ્પે બુધવારે સંકેત આપ્યા હતા કે યુદ્ધ હવે સમાપ્તિના આરે છે. સૂત્રોના જણાવ્યા અનુસાર, અમેરિકા અને ઈરાનના અધિકારીઓ હવે મંત્રણાના આગામી રાઉન્ડ માટે ફરીથી પાકિસ્તાનમાં મળે તેવી શક્યતા છે.
