10 લાખની ગાડીનું AMC એ 12 લાખ રૂપિયા ભાડું ચુકવ્યું, છે ને બાકી દલા તરવાડીની વાડી! | amc car rent scandal 10 lakh car 12 lakh rent gujarati news
Ahmedabad News : અમદાવાદ મ્યુનિ. કોર્પોરેશનનું વાર્ષિક બજેટ 17 હજાર કરોડ રૂપિયા સુધી પહોંચી ગયું છે. પરંતુ આ રકમ પ્રમાણેનો વિકાસ શહેરમાં દેખાતો નથી. તેની પાછળનું કારણ અણધડ આયોજનમાં બેફામ વપરાતા પૈસા છે. કંઈક આવો જ કિસ્સો સામે આવ્યો છે. શહેરમાં આસિ. મ્યુનિ. કમિશનરોની કામગીરી ઘણી વખત વિવાદમાં આવી ચૂકી છે. આ આસિ. કમિશનરો માટે 21 ઈલેક્ટ્રિક કાર પાંચ વર્ષ માટે ભાડે રાખીને મ્યુનિ.એ લાખના બાર હજાર કર્યા છે. ગાડીની મૂળ કિંમત કરતા સવા ગણુ ભાડું મ્યુનિ.એ ચૂકવ્યું છે! આસિ. મ્યુનિ. કમિશનરોને ફાળવેલી કાર ચારેક મહિનાથી જમાલપુર વર્કશોપમાં ભંગાર હાલતમાં ઘૂળ ખાઈ રહી છે.
ભારત સરકારની કંપની છે EESL
અમદાવાદના જમાલપુર સ્થિત સેન્ટ્રલ વર્કશોપમાં હાલ ટાટા કંપનીની 21 ટીગોર ઈલેક્ટ્રિક કાર પડી પડી ઘૂળ ખાઈ રહી છે. આ કાર અંગે વિગતો મેળવતા ચોંકાવનારી હકીકતો સામે આવી છે. પાંચ વર્ષ પહેલા અમદાવાદ મ્યુનિ. કોર્પોરેશને આ 21 કાર ભાડે લીધી હતી. જે આસિ. મ્યુનિ. કમિશનરોને ફાળવવામાં આવી હતી. અલબત, કાર ભાડે આપનાર કોઈ ખાનગી એજન્સી નથી, પરંતુ ભારત સરકાર હેઠળની જ ઈઈએસએલ(એનર્જી એફિસિયન્સી સર્વિસીઝ લી.) કંપની હતી. એક કારનું ભાડું મહિને રૂ.21 હજાર નિયત કરાયું હતું. એટલે કે એક કારનું 60 મહિનાનું ભાડું રૂ.12.60 લાખ રૂપિયા થાય છે.
કારની કિંમત કરતા વધારે ભાડું ચુકવ્યું
વર્ષ 2020 ના રજિસ્ટ્રેશનની આ કાર જ્યારે માર્ગો પર ફરતી થઈ ત્યારે તેની બજાર કિંમત 9 થી 10 લાખ રૂપિયા હતી. આજે પણ આ કારની મૂળ કિંમત 12 લાખ રૂપિયા આસપાસની જ છે. એટલે કે મૂળ કિંમત કરતા વધારે રકમનું ભાડું અમદાવાદ મ્યુનિ.એ ચૂકવ્યું છે. 21 કારની વર્ષ 2020 ની ગણતરી અનુસારની બજાર કિંમત રૂ.2 થી 2.10 કરોડ જેટલી જ હશે. તેની સામે મ્યુનિ.એ પાંચ વર્ષમાં રૂ.2.64 કરોડથી વઘુ રકમનું ભાડું ચૂકવ્યું છે. હાલ ચારેક મહિનાથી કોન્ટ્રાક્ટ પૂરો થઈ ગયો હોય આ કાર જેતે કંપનીને પરત કરવાની હોવાથી જમાલપુર સ્થિત વર્કશોપમાં રાખી દેવામાં આવી છે.
લોડર મશીનનું ટેન્ડર પણ વિવાદિત
અત્રે ઉલ્લેખનીય છે કે સેન્ટ્રલ સ્ટોર્સ દ્વારા બે દિવસ પહેલાં જ 15 લોડર મશીનની મુદત બે વર્ષ પછી પૂર્ણ થઇ રહી હોવા છતાં પાંચ વર્ષ માટે ઓપરેશન એન્ડ મેઇન્ટેનન્સનો કોન્ટ્રાક્ટ આપતી દરખાસ્ત મૂકવામાં આવી હતી. જેને સ્થાયી સમીતીએ આંખો બંધ કરીને પાસ પણ કરી દીધી હતી.આ બાબત હજી ચર્ચાનો વિષય છે. ત્યાં વાહનોને લઇ વઘુ એક તીકડમ સામે આવ્યું છે.
કારનું રજિસ્ટ્રેશન મ્યુનિ. કમિશનરના નામે અને માલિકી ઈઈએસએલ કંપનીની!
જમાલપુર ડેપોમાં પડેલી 21 ટાટા ટીગોર કારનું આરટીઓ રજિસ્ટ્રેશન હોદ્દાની રૂએ મ્યુનિ. કમિશનરના નામનું બોલે છે. જ્યારે મ્યુનિ.ના સૂત્રોના જણાવ્યા અનુસાર આ કારની માલિકી તો ઈઈએસએલ કંપનીની છે. કોન્ટ્રાક્ટ પૂરો થઈ જતા આ તમામ કાર જેતે કંપનીને પરત લઈ જવા માટે જાણ પણ કરી દેવામાં આવી છે. ત્યારે જો કાર ભાડા પર જ લેવાઈ હતી, તો પછી તેનું રજિસ્ટ્રેશન જેતે કંપનીના નામે થવું જોઈએ, તેના બદલે મ્યુનિ. કમિશનરના નામે શા માટે? આ 21 કારને લઈને ભવિષ્યમાં કોઈ કાયદાકીય પ્રશ્નો થાય તો જવાબદારી કોની? તેવા અનેક સવાલો યક્ષપ્રશ્ન છે.
કાર લીઝ પર લેવામાં આવી હતી, પરત કરવાની કાર્યવાહી ચાલું છે
મ્યુનિ.ના સેન્ટ્રલ વર્કશોપના સૂત્રોના જણાવ્યા અનુસાર ઈલેક્ટ્રિક વાહનોને પ્રોત્સાહન આપવાની ભારત સરકારની યોજના હેઠળ આ 21 કાર ઈઈએસએલ કંપની પાસેથી લીઝ પર લેવામાં આવી હતી. પાંચ વર્ષનો કોન્ટ્રાક્ટ પૂરો થઈ જતા કંપની સાથે પત્ર વ્યવહાર કરીને આ તમામ કાર પરત લઈ જવા માટેની કાર્યવાહી ચાલું છે.
