બોલિવૂડનો ફ્લોપ સ્ટાર કિડ! પિતા સુપરસ્ટાર પણ દીકરાની 18 ફિલ્મોમાંથી માત્ર 1 જ થઈ હિટ! | mithun chakraborty son mimoh chakraborty career flops haunted 3d box office
One Star Kid Who Only Give 1 Hit: બોલિવૂડ ફિલ્મ ઇન્ડસ્ટ્રીમાં એવા ઘણા કલાકારો છે જેમના માતા-પિતા સુપરસ્ટાર રહ્યા હોય અને તેમણે સિનેમા જગત પર રાજ કર્યું હોય. જોકે સ્ટાર કિડ હોવા છતાં દરેક કલાકારને ઇન્ડસ્ટ્રીમાં એ ઓળખ કે સફળતા નથી મળતી. હિન્દી સિનેમામાં વિનોદ ખન્ના, જિતેન્દ્ર અને રાજેન્દ્ર કુમાર જેવા દિગ્ગજોના નામ સામેલ છે જેમના સંતાનો પિતા જેવો જાદુ ચલાવવામાં નિષ્ફળ રહ્યા. આ જ યાદીમાં બોલિવૂડના મિથુન ચક્રવર્તીના પુત્ર મિમોહ ચક્રવર્તીનું નામ પણ મોખરે આવે છે, જેમનું કરિયર પિતાના આટલા મોટા કદ છતાં ફ્લોપ સાબિત થયું છે.
મહાક્ષય ઉર્ફે મિમોહનું કરિયર રહ્યું છે નિરાશાજનક
મિમોહ ચક્રવર્તીને ઇન્ડસ્ટ્રીમાં ‘મહાક્ષય ચક્રવર્તી’ના નામથી પણ ઓળખવામાં આવે છે. હાલના દિવસોમાં તે પોતાની તાજેતરમાં રિલીઝ થયેલી ફિલ્મ ‘હૉન્ટેડ 3D: ઇકોઝ ઓફ ધ પાસ્ટ’ને લઈને ચર્ચામાં છે. જોકે, આ ફિલ્મ પહેલાં તે લાંબા સમય સુધી સ્ક્રીન પરથી ગાયબ રહ્યો હતો. મિમોહે પોતાના અત્યાર સુધીના એક્ટિંગ કરિયરમાં અંદાજે 18થી વધુ ફિલ્મો અને સીરીઝ કરી છે, પરંતુ તેમાંથી મોટાભાગની બોક્સ ઓફિસ પર ઊંધા માથે પછડાઈ છે. તેના આખા કરિયરમાં માત્ર 1 જ ફિલ્મ હિટ સાબિત થઈ છે.
ડેબ્યુ ફિલ્મ ‘જીમી’ બોક્સ ઓફિસ પર સુપરફ્લોપ રહી
મિમોહ ચક્રવર્તીએ વર્ષ 2008માં ફિલ્મ ‘જીમી’થી બોલિવૂડમાં કદમ મૂક્યો હતો. રાજ એન. સિપ્પીના નિર્દેશનમાં બનેલી આ ફિલ્મમાં મિમોહે મુખ્ય ભૂમિકા ભજવી હતી અને તે એક ડીજેના રોલમાં જોવા મળ્યો હતો. જોકે, તેની આ ડેબ્યુ ફિલ્મ બોક્સ ઓફિસ પર એટલી ખરાબ રીતે ફ્લોપ થઈ કે લોકોને એ પણ ખબર ન પડી કે ફિલ્મ ક્યારે સિનેમાઘરોમાં આવી અને ક્યારે જતી રહી. આ ફિલ્મથી તેના કરિયરને કોઈ ફાયદો ન થયો.
કરિયરની એકમાત્ર હિટ ફિલ્મ: ‘હૉન્ટેડ 3D’
મિમોહ ચક્રવર્તીના 18 વર્ષ લાંબા કરિયરની એકમાત્ર હિટ ફિલ્મ વર્ષ 2011માં આવેલી હોરર-થ્રિલર ફિલ્મ ‘હૉન્ટેડ 3D’ છે. વિક્રમ ભટ્ટના નિર્દેશનમાં બનેલી આ ફિલ્મ અંદાજે 13 કરોડ રૂપિયાના બજેટમાં તૈયાર થઈ હતી અને તેણે વિશ્વભરમાં 34 કરોડ રૂપિયાનું શાનદાર કલેક્શન કર્યું હતું. આ એક જ ફિલ્મની સફળતાના કારણે દર્શકો મિમોહને ઓળખતા થયા હતા.
હાલના દિવસોમાં આ જ ફ્રેન્ચાઈઝીની સિક્વલ ફિલ્મ ‘હૉન્ટેડ 3D: ઇકોઝ ઓફ ધ પાસ્ટ’ બોક્સ ઓફિસ પર સારું પ્રદર્શન કરી રહી છે. આ નવી ફિલ્મે અત્યાર સુધીમાં 11.55 કરોડ રૂપિયાથી વધુનું નેટ કલેક્શન અને 13.60 કરોડ રૂપિયાનું ગ્રોસ કલેક્શન કરી લીધું છે.
OTT અને અન્ય ફિલ્મો દ્વારા વાપસીનો પ્રયાસ
‘હૉન્ટેડ’ સિવાય મિમોહે વર્ષ 2011માં ‘લૂટ’, 2013માં ‘એનિમી’ અને 2015માં ‘ઇશ્ક દરિયા’ જેવી ફિલ્મો કરી હતી, પરંતુ આમાંથી એકપણ ફિલ્મ દર્શકોને થિયેટર સુધી ખેંચી લાવવામાં સફળ રહી નહોતી. ફિલ્મોમાં નિષ્ફળતા મળ્યા બાદ મિમોહે ડિજિટલ દુનિયા તરફ પ્રયાણ કર્યું છે. તેણે નેટફ્લિક્સની લોકપ્રિય વેબ સિરીઝ ‘ખાખી: ધ બેંગોલ ચેપ્ટર’ દ્વારા ઓટીટી પ્લેટફોર્મ પર ડેબ્યુ કર્યું છે. આ સિવાય વર્ષ 2023માં નવાઝુદ્દીન સિદ્દીકી સાથે આવેલી ફિલ્મ ‘જોગીરા સારા રા રા’માં તેના અભિનયને કારણે તેને ઇન્ડસ્ટ્રીમાં થોડી નવી ઓળખ ચોક્કસ મળી છે.
