NEET પેપર લીકમાં વધુ એક મોટો ખુલાસો, ‘ગેસ પેપર’ના સવાલો પણ બીજા પ્રશ્નપત્ર સાથે મેચ થયા | NEET UG Paper Leak CBI Probe Reveals NTA Reserve Set Also Leaked As Guess Paper
NEET-UG-2026 Paper Leak Case Latest Update : નીટ-યુજી પેપર લીકમાં એક પછી એક ધરપકડ અને નવા-નવા ખુલાસાઓ થઈ રહ્યા છે. હવે આ કેસમાં વધુ એક ચોંકાવનારી માહિતી સામે આવી છે. કેસના મૂળ સુધી પહોંચેલી સીબીઆઈની તપાસમાં નવો ખુલાસો થયો છે કે, નીટનું માત્ર એક પેપર જ નહીં, પ્રશ્નપત્રનો બીજો સેટ પણ લીક થયો હતો. જોકે તપાસમાં મોટો ધડાકો થયો છે કે, પ્રશ્નપત્રની બીજા સેટના સવાલો પણ ‘ગેસ પેપર’ (સંભવિત પ્રશ્નપત્ર)ના સવાલો સાથે એકસરખા મેળ ખાતા હતા. પેપર લીકના મુખ્ય કિંગપિન મનાતા આસિસ્ટન્ટ પ્રોફેસર પી.વી.કુલકર્ણી, સીનિયર ટીચર મનીષા ગુરુનાથ માંધરે અને મનીષા વાઘમારેનું નામ સામે આવ્યું છે.
પ્રશ્નપત્રનું એક નહીં, બંને સેટ લીક થયા
વાસ્તવમાં નેશનલ ટેસ્ટિંગ એજન્સી (NTA) દર વર્ષે નીટ યુજી પ્રશ્ન પત્રના બે સેટ તૈયાર કરતી હોય છે. આમાંથી કયો સેટ પરીક્ષામાં ઉપયોગ કરાશે, તેની માહિતી માત્ર ડાયરેક્ટર જનરલ પાસે હોય છે. બે સેટમાંથી એક પ્રશ્નપત્રનો સેટ હોય છે, જ્યારે બીજો સેટ રિઝર્વમાં રાખવામાં આવે છે. પરીક્ષામાં જો કોઈ ગેરરીતિ થાય અથવા પેપર લીક થાય તો તાત્કાલીક બીજા સેટનો ઉપયોગ કરી શકાય તે માટે NTA બે સેટ તૈયાર કરતી હોય છે. જોકે સીબીઆઈની તપાસમાં હવે સામે આવ્યું છે કે, રિઝર્વ સેટનું પેપર પણ પહેલેથી જ લીક થઈ ગયું હતું.
જે પ્રશ્નો NTAના બીજા સેટમાં હતા, તેવા જ પ્રશ્નો આરોપીઓના સંભવિત પ્રશ્નપત્રમાં પણ
NTA દ્વારા નીટ પરીક્ષા માટે બીજો સેટ પણ તૈયાર કરાયો હતો. જોકે જે પ્રશ્નો NTAના બીજા સેટમાં હતા, તેવા જ પ્રશ્નો આરોપીઓના સંભવિત પ્રશ્નપત્રમાં પણ હોવાનો ખુલાસો થયો છે. આમાં તમામ સવાલો બીજા સેટ સાથે મેચ થયા છે.
સંભવિત પ્રશ્નપત્રો અનેક રાજ્યોમાં લાખોમાં વેચ્યા
ત્રીજી મેના રોજ પ્રશ્નપત્રનો પ્રથમ સેટ પરીક્ષામાં લવાયો હતો અને બીજા સેટ રિઝર્વમાં રખાયો હતો. જોકે હવે બંને સેટના બાયોલોજી અને કેમિસ્ટ્રીના તમામ સવાલો સંભવિત પ્રશ્નપત્રમાં હતા. એટલે કે માત્ર પરીક્ષાના દિવસે આવેલું પ્રશ્નપત્ર જ નહીં, રિઝર્વમાં રખાયેલ પ્રશ્નપત્ર પણ લીક થયું હતું. તપાસ મુજબ, પી.વી.કુલકર્ણી અને મનીષ માંધરેએ મળીને આ સંભવિત પ્રશ્નપત્ર તૈયાર કર્યું હતું અને તેને અનેક રાજ્યોમાં લાખોમાં વેંચ્યા હતા.
સંભવિત પ્રશ્નપત્રમાં બાયોલોજીના 180 અને કેમેસ્ટ્રીના 90 સવાલો એવા છે, જે NTAના બંને નીટ પેપરમાં સામેલ સવાલો સાથે એકસરખા મેળ ખાય છે. બંને સેટ પેપરમાં બાયોલોજીના 90 અને કેમેસ્ટ્રીના 45 સવાલ હતા, એટલે કે ગેસ પેપરમાં અડધો-અડધ સવાલો મેચ થતા હતા.
કેવી રીતે અને કોણે લીક કર્યું NEET પેપર?
પેપર લીક કેસમાં આસિસ્ટન્ટ પ્રોફેસર પી.વી.કુલકર્ણી અને સીનિયર ટીચર મનીષા ગુરુનાથ માંધરેનું નામ સામે આવ્યું છે. કુલકર્ણી કેમેસ્ટ્રીનો અભ્યાસ કરાવે છે અને મનીષા માંધરે વનસ્પતિશાસ્ત્ર (Botany) અને પ્રાણીશાસ્ત્ર (Zoology)ના પ્રશ્નોનું ભાષાંતર કરવામાં નિષ્ણાત હતી. આ જ કારણે માંધરેની નજર નીટના પ્રશ્નપેપર પર હતી અને તેઓએ તેનો ફાયદો ઉઠાવીને કુલકર્ણી અને મનીષ વાઘમરે સાથે મળીને નીટ પેપર લીકને અંજામ આપ્યો હતો.
ફિજિક્સના સવાલો લીક થયા હોવાના પણ પુરાવા મળ્યા
કુલકર્ણી અને મનીષા માંધરેએ બાયોલોજીના પ્રશ્નો NTAમાંથી ચોરી કર્યા હતા. આ ઉપરાંત સીબીઆઈને ભૌતિકશાસ્ત્ર (Physics)ના કેટલાક સવાલો લીક થયા હોવાના પુરાવા મળ્યા છે. બંને આરોપીઓ નીટ પેપર તૈયાર કરનારા એક્સપર્ટ પેનલમાં સામેલ હતા. બંનેએ ચોરી કરેલા સવાલો હાથથી લખાવડાયા અને પછી સંભવિત પ્રશ્નપત્રના નામે વેચ્યા હતા. મનીષા વાઘમારે ‘એજન્ટ બનીને ગેસ પેપર વેચતી હતી.
મનીષા માંધરે 14 દિવસના રિમાન્ડ પર
ઉલ્લેખનીય છે કે, પેપર લીકની માસ્ટરમાઈન્ડ મનીષા માંધરેને 14 દિવસની સીબીઆઈ કસ્ટડીમાં મોકલી દેવાઈ છે. બીજીતરફ પેપર લીક થયા બાદ NTAએ નીટની ફરી પરીક્ષા યોજવાની તારીખો પણ જાહેર કરી દીધી છે. નવી પરીક્ષા 21 જૂને યોજાશે અને એડમિટ કાર્ડ 14 જૂને જારી કરવામાં આવશે.
