આસામમાં હિમંતા બિસ્વા સરમા જ ફરી બનશે મુખ્યમંત્રી, ભાજપ ધારાસભ્ય દળની બેઠકમાં નિર્ણય | Himanta Biswa Sarma to take oath as Assam CM
Himanta Biswa Sarma to take oath as Assam CM : Himanta Biswa Sarma to take oath as Assam CM : આસામના આગામી મુખ્યમંત્રીને લઈને ચાલી રહેલી તમામ અટકળોનો અંત આવ્યો છે. હિમંતા બિસ્વા સરમાને સર્વાનુમતે NDA ધારાસભ્ય દળના નેતા તરીકે પસંદ કરવામાં આવ્યા છે. ભાજપના દિગ્ગજ નેતા જેપી નડ્ડાએ સત્તાવાર રીતે તેમના નામની જાહેરાત કરી છે. હિમંતા બિસ્વા સરમા 12 મેના રોજ સવારે 11 વાગ્યે આસામના મુખ્યમંત્રી તરીકે શપથવિધિ કરશે.
ભાજપ ધારાસભ્ય દળની બેઠકમાં લેવાયેલા આ નિર્ણયથી સ્પષ્ટ થાય છે કે હાઈકમાન્ડે ફરી એકવાર હિમંતા બિશ્વા સરમાના નેતૃત્વ અને તેમની વહીવટી કુશળતા પર વિશ્વાસ વ્યક્ત કર્યો છે. પૂર્વોત્તર ભારતમાં ભાજપના સૌથી કદાવર નેતા ગણાતા સરમાના નેતૃત્વમાં પાર્ટીએ શાનદાર પ્રદર્શન કર્યું છે, જેનું પરિણામ આજે તેમને ફરી મુખ્યમંત્રી પદ તરીકે મળ્યું છે. 12 મેના રોજ યોજાનાર શપથ ગ્રહણ સમારોહમાં વડાપ્રધાન નરેન્દ્ર મોદી તથા ભાજપ અને NDAના અન્ય દિગ્ગજ નેતાઓ પણ હાજર રહે તેવી શક્યતા છે.
હિમંતા બિસ્વા સરમા: રાજકીય સફર
1990 – 2001 (રાજકીય પદાર્પણ): તેમણે કોંગ્રેસના વિદ્યાર્થી સંગઠન NSUI થી પોતાની સફર શરૂ કરી હતી. હિતેશ્વર સૈકિયા જેવા દિગ્ગજ નેતાઓના માર્ગદર્શન હેઠળ તેઓ એક મજબૂત યુવા નેતા તરીકે ઉભરી આવ્યા હતા.
2001: તેમણે ગુવાહાટીની જલુકબારી બેઠક પરથી પ્રથમ વખત વિધાનસભા ચૂંટણી લડી અને જીત મેળવી. ત્યારથી આજ દિન સુધી તેઓ આ બેઠક પર અજેય રહ્યા છે.
2002 – 2014 (મંત્રી તરીકેનો અનુભવ): તરુણ ગોગોઈની કોંગ્રેસ સરકારમાં તેમણે કૃષિ, આયોજન અને વિકાસ, આરોગ્ય અને શિક્ષણ જેવા અત્યંત મહત્વના મંત્રાલયો સંભાળ્યા હતા.
2015 (ભાજપમાં પ્રવેશ): તત્કાલીન મુખ્યમંત્રી તરુણ ગોગોઈ સાથેના મતભેદોને કારણે ઓગસ્ટ 2015માં તેઓ અમિત શાહની હાજરીમાં ભારતીય જનતા પાર્ટીમાં જોડાયા. આ ઘટનાએ પૂર્વોત્તર ભારતના રાજકારણનું ચિત્ર બદલી નાખ્યું.
2016 (સરકાર બનાવવામાં ભૂમિકા): આસામમાં ભાજપની પ્રથમ સરકાર બનાવવામાં તેમણે મુખ્ય વ્યૂહરચનાકારની ભૂમિકા ભજવી. સર્બાનંદ સોનોવાલની સરકારમાં તેઓ નાણાં, આરોગ્ય અને પીડબ્લ્યુડી મંત્રી બન્યા.
2016 (NEDAના સંયોજક): નોર્થ ઈસ્ટ ડેમોક્રેટિક એલાયન્સ (NEDA) ના કન્વીનર તરીકે તેમની નિમણૂક થઈ, જેના દ્વારા તેમણે પૂર્વોત્તરના અન્ય રાજ્યોમાં પણ ભાજપનો પ્રભાવ વધાર્યો.
2021 (પ્રથમવાર મુખ્યમંત્રી): 10 મે 2021 ના રોજ તેમણે આસામના 15મા મુખ્યમંત્રી તરીકે પ્રથમવાર શપથ લીધા.
2026 (સતત બીજી ટર્મ): 12 મે 2026 ના રોજ તેઓ સતત બીજી ટર્મ માટે આસામના મુખ્યમંત્રી તરીકે શપથ ગ્રહણ કરશે.
