બંગાળમાં શપથવિધિ બાદ હવે યુપીમાં નવા-જૂનીના એંધાણ! યોગી સરકારમાં થશે 6 નવા ચહેરાઓની એન્ટ્રી | up government new ministers yogi cabinet expansion bhupendra chaudhary manoj pandey pooja pal
CM Yogi Cabinet Expansion: ઉત્તર પ્રદેશમાં આગામી વર્ષે યોજાનારી વિધાનસભાની ચૂંટણી પહેલા રાજ્યના રાજકારણમાં ફરી એકવાર હલચલ વધી ગઈ છે. સૂત્રોના જણાવ્યા મુજબ યોગી સરકારમાં આવતીકાલે સાંજે મંત્રીમંડળનું વિસ્તરણ થઈ શકે છે. તેને લઈને લખનઉમાં રાજકીય ગતિવિધિઓ વધી ગઈ છે.
સંભવિત નામો પણ સામે આવ્યા
જાણકારી મુજબ મુખ્યમંત્રી યોગી આદિત્યનાથ આજે રાજ્યપાલ સાથે મુલાકાત કરી શકે છે. આ મુલાકાતને સંભવિત મંત્રીમંડળ વિસ્તરણ સાથે જોડીને જોવામાં આવી રહી છે. સૂત્રોનું કહેવું છે કે યોગી સરકારમાં આશરે 6 નવા ચહેરાઓને સામેલ કરવામાં આવે તેવી શક્યતા છે. સંભવિત નામોમાં ભાજપ પ્રદેશ પ્રમુખ ભૂપેન્દ્ર ચૌધરી, મનોજ પાંડે અને પૂજા પાલના નામ પ્રમુખ રીતે ચર્ચામાં છે. જોકે હજુ સુધી સરકાર કે પાર્ટી તરફથી સત્તાવાર જાહેરાત કરવામાં આવી નથી.
સંગઠન અને સરકારમાં સંતુલન બેસાડવાનો પ્રયાસ
એવી પણ ચર્ચા છે કે મંત્રીમંડળ વિસ્તરણ દ્વારા સંગઠનાત્મક અને સામાજિક સમીકરણોને સાધવાનો પ્રયાસ કરી શકાય છે. લોકસભા ચૂંટણી બાદ બદલાયેલા રાજકીય માહોલમાં ભાજપ ઉત્તર પ્રદેશમાં પોતાના સંગઠન અને સરકાર બંનેને નવી રીતે સંતુલિત કરવાની વ્યૂહરચના પર કામ કરી રહ્યું છે.
આ પણ વાંચો: તમિલનાડુમાં વિજયની પાર્ટી TVKને સરકાર રચવા બહુમતી મળી, VCKએ સત્તાવાર સમર્થન જાહેર કર્યું
ક્ષેત્રીય અને જ્ઞાતિગત સમીકરણો
એવામાં સંભવિત કેબિનેટ વિસ્તરણને માત્ર વહીવટી ફેરફાર નહીં પરંતુ રાજકીય સંદેશ તરીકે પણ જોવામાં આવી રહ્યું છે. કારણ કે આવતા વર્ષે જ રાજ્યમાં વિધાનસભાની ચૂંટણી યોજાવા જઈ રહી છે. જો વિસ્તરણ થાય છે તો નવા મંત્રીઓને સામેલ કરીને ક્ષેત્રીય અને જ્ઞાતિગત સંતુલનને મજબૂત કરવાનો પ્રયાસ કરી શકાય છે.
