આ એકતા અને રાહુલ ગાંધીની રણનીતિની જીત: કેરલમમાં જીત બાદ કોંગ્રેસ નેતાઓની પ્રતિક્રિયા | Congress Led UDF Wins Big In Kerala Assembly Elections Rahul Gandhi Strategy Succeeds

Kerala Election Results 2026 : કેરલમ વિધાનસભા ચૂંટણીમાં કોંગ્રેસના ગઠબંધનની બહુમતી સાથે જીત થઈ છે. અત્યાર સુધીના ડેટા મુજબ કોંગ્રેસની આગેવાની હેઠળના યુનાઈટેડ ડેમોક્રેટિક ફ્રન્ટ (UDF) ગઠબંધને કુલ 99 બેઠકો જીતી લીધી છે, તેમાંથી કોંગ્રેસે સૌથી વધુ 63 બેઠકો જીતી છે. આ ભવ્ય જીત બાદ કોંગ્રેસે ગઠબંધનની જીતને ‘યુડીએફની એકતાની જીત’ ગણાવી છે. 

કોંગ્રેસે જીત બદલ કેરલમની પ્રજાનો આભાર માન્યો

કોંગ્રેસ સાંસદ ઈમરાન પ્રતાપગઢીએ મીડિયા સાથેની વાતચીતમાં કહ્યું કે, ‘અમારા ગઠબંધનને કેરલમમાં ખૂબ મોટી જીત મળી છે. આ જીત બદલ અમે કેરલમની પ્રજા અને દેશભરમાં પાર્ટીના કાર્યકર્તાઓને અભિનંદન પાઠવીએ છીએ. કેરલમની પ્રજાએ UDFને માત્ર બહુમતી જ નહીં, ભારે બહુમતીથી જીત અપાવી છે.

કોંગ્રેસ સાંસદે રાહુલ, ખડગે, યુડીએફના કર્યા વખાણ

પ્રતાપગઢીએ વધુમાં કહ્યું કે, ‘કેરલમમાં મળેલી જીત લોકસભામાં વિપક્ષના નેતા રાહુલ ગાંધી (Rahul Gandhi)ની રણનીતિની યુડીએફની એકતાની અને કોંગ્રેસ અધ્યક્ષ મલ્લિકાર્જુન ખડગે (Mallikarjun Kharge)ની જીત છે. કોંગ્રેસ સાંસદ કે.સી.વેણુગોપાલની લોકોને એક રાખવાની રણનીતિ પણ આ જીત છે.

આ પણ વાંચો : કેરલમમાં ભાજપનું ખાતું ખુલ્યું, ડાબેરીઓના અભેદ્ય ગઢમાં મેળવી શાનદાર જીત

અમારા CMની સંખ્યા વધી : પ્રતાપગઢી

તેમણે વધુમાં કહ્યું કે, ‘કોંગ્રેસે વધુ એક રાજ્યમાં જીત મળી છે, હવે અમારા મુખ્યમંત્રીઓની સંખ્યામાં વધુ એક વૃદ્ધિ થઈ છે. યુડીએફ કેરલમમાં સ્પષ્ટ બહુમતી સાથે સરકાર બનાવશે. હું રાજ્યમાં વરિષ્ઠ પર્યવેક્ષક હતો, જેથી આ જીતથી હું ખૂબ જ ખુશ છું.’

કેરલમમાં કોંગ્રેસ કાર્યકર્તાઓની જીત

કોંગ્રેસ નેતા અને તેલંગણા ફિશરમેન કોઓપરેટિવ ફેડરેશન લિમિટેડના અધ્યક્ષ મેટૂ સાઈએ કેરલમમાં યુડીએફની જીતને કોંગ્રેસ કાર્યકર્તાઓની જીત ગણાવી છે. અખિલ ભારતીય મહિલા કોંગ્રેસના અધ્યક્ષ અલકા લાંબાએ, કોંગ્રેસ અધ્યક્ષ સની જોસેફે કેરલમમાં કોંગ્રેસની જીતથી ખુશી વ્યક્ત કરી છે. તેઓએ કેરલમની પ્રજા, મતદારો અને પાર્ટી નેતૃત્વનો આભાર  માન્યો છે.

આ પણ વાંચો : કેજરીવાલને ઝટકો, આસામમાં ચૂંટણી લડનાર AAPની દયનીય હાલત, 1%થી પણ ઓછા વોટ મળ્યાં