ભારતીય સૈન્ય પર ભ્રષ્ટાચારનો આરોપ, લેફ્ટ. કર્નલની અરજી પર દિલ્હી હાઈકોર્ટે કેન્દ્ર, CBI અને કેગ પાસે જવાબ માગ્યો | delhi high court notices centre cbi cag over indian army corruption allegations
Delhi High Court News : ભારતીય સેનામાં ખરીદી પ્રક્રિયામાં થયેલી ગંભીર નાણાકીય અનિયમિતતાઓને લઈને દિલ્હી હાઈકોર્ટે કડક વલણ અપનાવ્યું છે. લેફ્ટનન્ટ કર્નલ સુમિત શ્યોરાણ દ્વારા દાખલ કરવામાં આવેલી અરજી પર સુનાવણી કરતા જસ્ટિસ પ્રતીક જલાનની બેન્ચે કેન્દ્ર સરકાર, CBI અને CAG ને નોટિસ ફટકારી 4 અઠવાડિયામાં જવાબ માંગ્યો છે. આ કેસની આગામી સુનાવણી 19 મે, 2026 ના રોજ નક્કી કરવામાં આવી છે.
શું છે મુખ્ય આક્ષેપો?
લેફ્ટનન્ટ કર્નલ સુમિત શ્યોરાણના જણાવ્યા મુજબ, નવી દિલ્હીમાં તેમની નિમણૂક દરમિયાન તેમણે ACG (Army Cadet Group) હેઠળની ખરીદી પ્રક્રિયામાં ભારે ભ્રષ્ટાચાર પકડ્યો હતો. સરકારી નાણાંથી ખરીદાયેલા સામાનને અધિકારીઓના મેસનો સામાન ગણાવીને રજૂ કરવામાં આવ્યો હતો. તપાસ અને દેખરેખથી બચવા માટે મોટા ઓર્ડરને નાના-નાના ભાગોમાં વહેંચી દેવામાં આવ્યા હતા જેથી ખરીદીની મર્યાદાનું ઉલ્લંઘન ન દેખાય. સરકારી મિલકતનો દુરુપયોગ કરવા માટે ખોટા દસ્તાવેજો તૈયાર કરવામાં આવ્યા હોવાનો દાવો કરવામાં આવ્યો છે.
ફરિયાદ કરી તો મળી સજા!
અરજીમાં લેફ્ટનન્ટ કર્નલે આક્ષેપ કર્યો છે કે, તેમણે સપ્ટેમ્બર 2024 થી અનેકવાર પુરાવાઓ સાથે ઉચ્ચ અધિકારીઓને ફરિયાદ કરી હતી, પરંતુ કોઈ પગલાં લેવાયા નહીં. ઉલટું, ફરિયાદ કરવા બદલ તેમને પ્રતાડિત કરવામાં આવ્યા. તેમનો પરફોર્મન્સ રિપોર્ટ (ACR) ખરાબ કરી દેવામાં આવ્યો. તેમની બદલી નાગપુર કરી દેવામાં આવી. તેમના કોમ્પ્યુટર સિસ્ટમમાં પરવાનગી વગર એક્સેસ કરીને સાયબર ઘૂસણખોરીનો પ્રયાસ કરાયો.
CBI અને કોર્ટની દરમિયાનગીરી
અરજદારે જાન્યુઆરી 2025 માં CBI ને પણ વિગતવાર ફરિયાદ આપી હતી, પરંતુ હજુ સુધી FIR નોંધાઈ નથી. હવે આ મામલે કોર્ટની દેખરેખ હેઠળ CBI તપાસ થાય તેવી માંગ કરવામાં આવી છે. કેન્દ્ર સરકાર તરફથી એડવોકેટ ઈશકરણ સિંહ ભંડારી અને વિશાલ બલિયાન જ્યારે CBI તરફથી રજની ગુપ્તાએ પક્ષ રજૂ કર્યો હતો. હવે તમામ એજન્સીઓના જવાબ બાદ કોર્ટ નક્કી કરશે કે આ મામલે તપાસ કેવી રીતે આગળ વધારવી.
