શર્ટલેસ પ્રોટેસ્ટ: 20 કલાકની પૂછપરછ બાદ યૂથ કોંગ્રેસના પ્રમુખ ઉદય ભાનુ ચિબની ધરપકડ | Delhi AI Summit Protest: Youth Congress President Uday Bhanu Chib Arrested
Delhi AI Summit protest : દિલ્હીમાં યોજાયેલી AI સમિટમાં અર્ધનગ્ન થઈ વિરોધ કરવા મામલે પોલીસે કાર્યવાહી શરૂ કરી છે. યૂથ કોંગ્રેસના પ્રમુખ ઉદય ભાનુ ચિબની પૂછપરછ બાદ ધરપકડ કરવામાં આવી છે. તેમને દિલ્હીના તિલક માર્ગ પોલીસ સ્ટેશનમાં રાખવામાં આવ્યા છે. પોલીસ સ્ટેશન બહાર ભારે ફોર્સ તૈનાત કરવામાં આવી છે. સમગ્ર મામલે કોંગ્રેસના વરિષ્ઠ નેતા કે સી વેણુગોપાલે પોલીસ કાર્યવાહીની ટીકા કરી છે.
યૂથ કોંગ્રેસના પ્રમુખની ધરપકડ
કોંગ્રેસ નેતાએ મીડિયાને આપેલી જાણકારી અનુસાર ઉદય ભાનુ ચિબની 20 કલાક સુધી પૂછપરછ કરાઈ. તિરુવલ્લુરના સાંસદ શશિકાંત સેંથીલે જણાવ્યું કે 20 કલાક સુધી પૂછપરછ બાદ સવારે 4 વાગ્યે ઉદય ભાનુની ધરપકડ કરાઈ. યૂથ કોંગ્રેસના યોદ્ધાઓએ તેમના પર ગર્વ છે. દેશના યુવાનો માટે કોંગ્રેસ લડત આપતી રહેશે.
કે સી વેણુગોપાલે તમામ આરોપીઓની છોડી મૂકવાની માંગ કરી
કોંગ્રેસના વરિષ્ઠ નેતા કે સી વેણુગોપાલે કહ્યું છે કે, સરકાર કદાચ ભૂલી ગઈ છે કે વિરોધ પ્રદર્શન લોકશાહીનું મૂળ તત્વ છે, કોઈ ગુનો નહીં. ઈન્ડિયન યૂથ કોંગ્રેસના કાર્યકરોએ બહાદુરીથી વડાપ્રધાન મોદીનો ભ્રષ્ટાચાર ઉજાગર કર્યો. હિંસા ભડકાવ્યા વિના શાંતિપૂર્ણ વિરોધ કર્યો. અમારી માંગ છે કે તમામ આરોપીઓ પરથી તમામ કેસ રદ કરવામાં આવે અને તેમને છોડવામાં આવે.
આ કેસમાં ગ્વાલિયરથી પણ જિતેન્દ્ર સિંહ યાદવ નામના કોંગ્રેસ કાર્યકરની ધરપકડ કરવામાં આવી છે. પોલીસનું કહેવું છે કે હજુ બીજા ત્રણથી ચાર આરોપીઓ તેમની રડાર પર છે.
શું છે સમગ્ર મામલો
નોંધનીય છે કે દિલ્હીના ભારત મંડપમમાં AI સમિટ યોજાઈ હતી. જેમાં વિશ્વના અનેક દેશોના પ્રતિનિધિ આવ્યા હતા. આ સમિટ દરમિયાન યૂથ કોંગ્રેસના કાર્યકરો અંદર ઘૂસ્યા અને અર્ધ નગ્ન થઈને વડાપ્રધાન મોદી વિરુદ્ધ નારાબાજી કરી હતી. જે બાદ સાત આરોપીઓની ત્યાં જ અટકાયત કરવામાં આવી હતી.
