VIDEO: AI ઈમ્પેક્ટ સમિટમાં યુથ કોંગ્રેસના કાર્યકરોનો હોબાળો, ભારત મંડપમમાં ટી-શર્ટ ઉતારી નારેબાજી | security breach at bharat mandapam ai summit youth congress protest pm modi
AI Impact Summit : રાજધાનીના પ્રગતિ મેદાન સ્થિત ભારત મંડપમ ખાતે ચાલી રહેલી હાઈ-પ્રોફાઇલ ‘AI ઈમ્પેક્ટ સમિટ’ (AI Impact Summit) દરમિયાન આજે ત્યારે ભારે હોબાળો મચી ગયો હતો. જ્યારે યુથ કોંગ્રેસના કાર્યકરો સુરક્ષા કોર્ડન તોડીને સંકુલની અંદર ઘૂસી ગયા હતા.
સૂત્રોચ્ચાર અને હોબાળો
પ્રદર્શનકારીઓએ વડાપ્રધાન નરેન્દ્ર મોદી વિરુદ્ધ આક્રમક સૂત્રોચ્ચાર કર્યા હતા અને “PM is Compromised” ના નારા લગાવ્યા હતા. જે સમયે આ વિરોધ પ્રદર્શન થયું, તે સમયે સમિટમાં દેશ-વિદેશના અનેક દિગ્ગજો અને પ્રતિનિધિઓ હાજર હતા. યુથ કોંગ્રેસના કાર્યકરો અચાનક બેનરો અને પોસ્ટરો સાથે મુખ્ય હોલ પાસે પહોંચી ગયા હતા. સુરક્ષાકર્મીઓએ તરત જ હરકતમાં આવીને દેખાવકારોની અટકાયત કરી હતી અને તેમને સંકુલની બહાર કાઢ્યા હતા.
પોલીસની કાર્યવાહી અને તપાસ
દિલ્હી પોલીસના સૂત્રોએ જણાવ્યું હતું કે, AI સમિટમાંથી કેટલાક કોંગ્રેસી કાર્યકરોની અટકાયત કરવામાં આવી છે. પોલીસનું કહેવું છે કે, તેઓ આરોપીઓ સામે કડક કાયદેસરની કાર્યવાહી કરશે. આ સાથે જ આ બાબતની પણ તપાસ કરવામાં આવી રહી છે કે આટલા કડક સુરક્ષા બંદોબસ્ત હોવા છતાં કાર્યકરો અંદર પહોંચવામાં સફળ કેવી રીતે રહ્યા.
ભાજપે આપી પ્રતિક્રિયા
ભાજપે આ મામલે કોંગ્રેસના ઘેરતા કહ્યું કે આ એક શરમજનક હરકત છે અને દેશને શર્મિંંદા કરવામાં આવ્યો છે. આ રીતે આવા મંચ પર દેખાવ કરવાથી દેશની છબિ ખરડાશે. હવે આ મામલે દિલ્હી પોલીસ એફઆઈઆર નોંધીને કડક કાર્યવાહી કરી શકે છે. હાલમાં દેખાવો કરનારા કાર્યકરોની અટકાયત કરી લેવામાં આવી છે.
