ખાલિસ્તાનીઓને મોટો ઝટકો આપવાનો માસ્ટર પ્લાન તૈયાર! ગેમચેન્જર સાબિત થશે કાર્નીનો ભારત પ્રવાસ | mark carney india visit masterplan against khalistani network
Masterplan against Khalistani network: ભારત અને કેનેડા વચ્ચેના રાજદ્વારી સંબંધોમાં હવે એક નવો અને મજબૂત વળાંક આવવાની શક્યતા દેખાઈ રહી છે. લાંબા સમયના રાજકીય ઉતાર-ચઢાવ બાદ, હવે બંને રાષ્ટ્રો સુરક્ષા અને વ્યૂહાત્મક મોરચે એકબીજા સાથે સહયોગ વધારવા તરફ આગળ વધી રહ્યા છે. કેનેડાના વડાપ્રધાન માર્ક કાર્નીની સંભવિત ભારત મુલાકાત પૂર્વે એવા અહેવાલો મળ્યા છે કે, બંને દેશો આતંકવાદ અને ભારત-વિરોધી નેટવર્ક સામે સંયુક્ત રીતે કડક કાર્યવાહી કરવા માટે તૈયાર છે. આ મુલાકાત માત્ર આર્થિક ક્ષેત્રે જ નહીં, પરંતુ વૈશ્વિક સુરક્ષા અને આંતરરાષ્ટ્રીય મંચો પર પણ એક નવા યુગની શરૂઆત કરી શકે છે.
આર્થિક હિતોથી મજબૂત બનતા સંબંધો
ભારત અને કેનેડા ભલે ભૌગોલિક રીતે દૂર હોય, પરંતુ બંને દેશો વચ્ચેના આર્થિક હિતો અને વૈશ્વિક શાસન સાથે જોડાયેલા મુદ્દાઓ લાંબા સમયથી સંબંધોને મજબૂત કરી રહ્યા છે. તાજેતરના અહેવાલ મુજબ, પૂર્વ રાજદ્વારી સંજય કુમાર વર્માએ જણાવ્યું છે કે જો વર્તમાન વલણ ચાલુ રહેશે, તો આગામી દાયકામાં ભારત-કેનેડા સંબંધો માત્ર રાજકીય ચર્ચાઓ પૂરતા મર્યાદિત નહીં રહે, પરંતુ રોકાણ, ઊર્જા સહયોગ અને સપ્લાય ચેઈન ભાગીદારી પર વધુ કેન્દ્રિત થશે. ખાસ કરીને વડાપ્રધાન માર્ક કાર્નીની આગામી ભારત મુલાકાત દ્વિપક્ષીય સંબંધોને નવી ઊંચાઈ પર લઈ જઈ શકે છે, જેમાં વ્યાપાર માળખા અને લાંબાગાળાના રોકાણો પર વિશેષ ભાર મૂકવામાં આવશે.
કેનેડામાં ભારતીય ફાર્મા અને ડિજિટલ સેવાઓનો દબદબો
આર્થિક ક્ષેત્રે પરસ્પર સહયોગ વધારવા માટે બંને દેશો ‘વ્યાપક આર્થિક ભાગીદારી કરાર'(CEPA) તરફ આગળ વધી રહ્યા છે. આનાથી કેનેડામાં ભારતીય ફાર્માસ્યુટિકલ્સ, ડિજિટલ સેવાઓ અને એન્જિનિયરિંગ ઉત્પાદનો માટે મોટું બજાર ઉપલબ્ધ થશે. તેના બદલામાં, ભારત કેનેડા પાસેથી ઊર્જા સંસાધનો, પોટાશ, કઠોળ અને અદ્યતન કૃષિ ટેકનોલોજીની આયાત કરી શકશે. કેનેડાનું રોકાણ પહેલેથી જ ભારતના ઈન્ફ્રાસ્ટ્રક્ચર અને રિન્યુએબલ એનર્જી ક્ષેત્રમાં મહત્ત્વનું રહ્યું છે અને એક વ્યવસ્થિત વ્યાપાર માળખું આગામી દાયકામાં દ્વિપક્ષીય વેપારને અત્યાર કરતા બમણો કરવાની ક્ષમતા ધરાવે છે.
ક્લીન ટેકનોલોજી અને હાઈડ્રોજન વેલ્યુ ચેઈન
વેપાર ઉપરાંત, આ મુલાકાત ઊર્જા અને ટેકનોલોજીના ક્ષેત્રમાં પણ નિર્ણાયક સાબિત થશે. પરમાણુ ઊર્જા માટે યુરેનિયમનો પુરવઠો અને સ્વચ્છ ઊર્જા(Clean Energy) જરૂરિયાતો પર ગંભીર ચર્ચાઓ થવાની સંભાવના છે. બંને દેશો ક્લીન એન્ડ ગ્રીન ટેકનોલોજી, હાઈડ્રોજન વેલ્યુ ચેઈન, એરોસ્પેસ અને આર્ટિફિશિયલ ઈન્ટેલિજન્સ જેવી આગામી પેઢીની ટેકનોલોજીમાં સહયોગ વધારવા આતુર છે. આ ઉપરાંત, સ્ટાર્ટઅપ ભાગીદારી અને કુશળ માનવ સંસાધનોની અવરજવર પર પણ ભાર મૂકવામાં આવશે, જે બંને દેશોના ભવિષ્યના વિકાસ માટે અત્યંત મહત્ત્વનું સાબિત થશે.
