મુંબઈમાં દિવ્યાંગ યુવતી બળાત્કાર પછી ગર્ભવતી, 17 લોકોના DNA ટેસ્ટ બાદ પિતા જ નીકળ્યો આરોપી | Mumbai Father Arrested for Molest Disabled Daughter After DNA Test
Mumbai News : મુંબઈના કફ પરેડ વિસ્તારમાંથી માનવતાને શર્મસાર કરનારી એક ઘટના સામે આવી છે, જ્યાં એક 20 વર્ષીય દિવ્યાંગ યુવતી પર તેના જ પિતાએ દુષ્કર્મ ગુજાર્યું હતું જેનાથી તે ગર્ભવતી થઈ ગઇ હતી. લાંબી તપાસ અને 17 જેટલા શંકાસ્પદોના DNA ટેસ્ટ બાદ આખરે ક્રૂર સત્ય બહાર આવ્યું અને પોલીસે નરાધમ પિતાની ધરપકડ કરી છે.
કેવી રીતે સામે આવ્યો મામલો?
સપ્ટેમ્બર 2025માં જ્યારે યુવતીએ તેની દાદીને પેટમાં તકલીફ હોવાની ફરિયાદ ઈશારામાં કરી, ત્યારે તેને હોસ્પિટલમાં દાખલ કરવામાં આવી હતી. મેડિકલ તપાસમાં જાણવા મળ્યું કે યુવતી પાંચ મહિનાની ગર્ભવતી છે. હોસ્પિટલ પ્રશાસને તુરંત પોલીસને જાણ કરી હતી. શરૂઆતમાં પિતાએ કોઈ પણ પ્રકારના જાતીય શોષણના સવાલોને નકારી કાઢ્યા હતા અને પોલીસ ફરિયાદ કરવાનો પણ વિરોધ કર્યો હતો.
પોલીસની જટિલ તપાસ અને સત્ય
યુવતી બોલી શકતી ન હોવાથી પોલીસને નિવેદન લેવામાં ઘણી મુશ્કેલી પડી હતી. કાઉન્સેલિંગ બાદ યુવતીએ ઈશારાથી જે માહિતી આપી તેના આધારે પોલીસે પહેલા એક પુરુષ અને 17 વર્ષના છોકરાની અટકાયત કરી હતી. જોકે, પાકા પુરાવા માટે પોલીસે પિતા સહિત 17લોકોના DNA સેમ્પલ લેબોરેટરીમાં મોકલ્યા હતા. 27 જાન્યુઆરી 2026ના રોજ આવેલા રિપોર્ટમાં સ્પષ્ટ થયું કે ભ્રૂણનો જેનિટિક ડેટા માત્ર યુવતીના પિતા સાથે જ મેચ થાય છે.
આરોપી પિતાની ધરપકડ
પોલીસના જણાવ્યા અનુસાર, માર્ચ 2025 થી 21 સપ્ટેમ્બરની વચ્ચે યુવતી પર વારંવાર દુષ્કર્મ આચરવામાં આવ્યું હતું. DNA રિપોર્ટ પોઝિટિવ આવ્યા બાદ પોલીસે અન્ય શંકાસ્પદોની ભૂમિકાની તપાસ કરવાની સાથે નરાધમ પિતાની ધરપકડ કરી કાયદેસરની કાર્યવાહી હાથ ધરી છે. આ ઘટનાએ સમગ્ર મુંબઈને હચમચાવી દીધું છે.
