ગુજરાત ATS અને રાજસ્થાન પોલીસનું મેગા ઓપરેશન, ભીવાડીમાં ડ્રગ્સ ફેક્ટરીનો પર્દાફાશ | Gujarat ATS Rajasthan Police Bust Illegal Drug Factory in Bhiwadi in Mega Operation
Drug Factory In Rajasthan: ગુજરાત ATS એ નશાના કાળા કારોબાર વિરુદ્ધ વધુ એક મોટી સફળતા મેળવી છે. ગુજરાત ATS અને રાજસ્થાન પોલીસના SOGએ એક સંયુક્ત ઓપરેશન હાથ ધરીને રાજસ્થાનના ખેરથલ જિલ્લાના ભીવાડી ખાતે ચાલતી એક ગેરકાયદે ડ્રગ્સ ફેક્ટરી ઝડપી પાડી છે. 28મી ડિસેમ્બર 2025ના રોજ પાડવામાં આવેલા આ દરોડામાં કરોડોની કિંમતનો નશાકારક પદાર્થ અને કેમિકલનો જથ્થો જપ્ત કરવામાં આવ્યો છે.
ફેક્ટરી ડ્રગ્સનું ઉત્પાદન!
મળતી માહિતી અનુસાર, ભીવાડીના RIICO ઇન્ડસ્ટ્રીયલ એરિયામાં આવેલી APL Pharma નામની કંપનીમાં નશાકારક પદાર્થોનું ઉત્પાદન કરવામાં આવતું હતું. બાતમીના આધારે ગુજરાત ATS અને રાજસ્થાન પોલીસે આ ફેક્ટરી પર રેડ કરી હતી. તપાસ દરમિયાન સ્થળ પરથી આશરે 22 કિલો સાયકોટ્રોપિક કેમિકલ અલ્પ્રાઝોલમ પ્રીકર્સર અને અડધો પ્રોસેસ થયેલો માલ મળી આવ્યો હતો. ડ્રગ્સ બનાવવામાં વપરાતા વિવિધ પ્રતિબંધિત કેમિકલ્સ અને સાધનસામગ્રી પણ પોલીસે કબજે કરી છે. આ ફેક્ટરી ઔદ્યોગિક વિસ્તારમાં આવેલી હોવાથી કોઈને શંકા ન જાય તે રીતે ત્યાં ડ્રગ્સનું ઉત્પાદન ચાલતું હતું.
આ ઓપરેશનમાં પોલીસે કુલ ત્રણ મુખ્ય આરોપીઓની ધરપકડ કરી છે, જેમાં અંશુલ શાસ્ત્રી, અખિલેશ કુમાર મૌર્ય અને કૃષ્ણકુમાર યાદવનો સમાવેશ થાય છે. આ ઉપરાંત, ફેક્ટરીમાં કામ કરતા અન્ય ત્રણ શ્રમિકોને પણ અટકાયતમાં લેવામાં આવ્યા છે. પ્રાથમિક તપાસમાં બહાર આવ્યું છે કે આ આરોપીઓ મોટા પાયે નશાકારક પદાર્થો બનાવીને અન્ય રાજ્યોમાં સપ્લાય કરવાનું નેટવર્ક ધરાવતા હતા. હાલ ભીવાડી ફેઝ-3 પોલીસ સ્ટેશનમાં ગુનો નોંધીને આ રેકેટના મૂળ સુધી પહોંચવા માટે વધુ તપાસ હાથ ધરવામાં આવી છે.
