ગ્લેમરની દુનિયા છોડી લંડનમાં ગોલ્ડ મેડાલિસ્ટ ડેન્ટિસ્ટ અને પાયલોટ બની ગયો બોલિવૂડનો આ એક્ટર | taare zameen par yohan actor sachet engineer now gold medalist dentist pilot uk
What is Sachet Engineer Doing?: આમિર ખાનના નિર્દેશનમાં બનેલી વર્ષ 2007ની બ્લોકબસ્ટર ફિલ્મ ‘તારે ઝમીન પર’ આજે પણ સિનેમાપ્રેમીઓના દિલની ખૂબ નજીક છે. આ ફિલ્મે બાળ ઉછેર અને શિક્ષણ પ્રણાલી પ્રત્યે સમાજનો દ્રષ્ટિકોણ બદલી નાખ્યો હતો. ફિલ્મના મુખ્ય પાત્ર ‘ઈશાન અવસ્થી’ (દર્શીલ સફારી)ની સાથે તેના મોટા ભાઈ ‘યહાન’નું પાત્ર ભજવનાર ચાઇલ્ડ આર્ટિસ્ટ સચેત એન્જિનિયર પણ ઘરે-ઘરે લોકપ્રિય બન્યો હતો. જોકે, ફિલ્મની સુપર સક્સેસ બાદ સચેત ગ્લેમર વર્લ્ડની ચકાચૌંધથી સાવ ગાયબ થઈ ગયો હતો. લગભગ બે દાયકા બાદ, આજે સચેત એન્જિનિયરની રિયલ લાઈફ સિદ્ધિઓ જાણીને ફેન્સ આશ્ચર્યચકિત થઈ ગયા છે, કારણ કે તે સ્ક્રીનની જેમ જ અસલી જિંદગીમાં પણ સુપર જીનિયસ સાબિત થયો છે.
ફિલ્મમાં ભણવામાં હોશિયાર મોટા ભાઈનું પાત્ર ભજવ્યું હતું
ફિલ્મ ‘તારે ઝમીન પર’માં યહાન અવસ્થી એક આદર્શ અને હોશિયાર દીકરાના રોલમાં હતો. અભ્યાસમાં હંમેશા ટોપ કરનારો, ટેબલ ટેનિસનો ચેમ્પિયન અને પોતાના નાના ભાઈ ઈશાનની ખૂબ કાળજી રાખનારો યહાન દરેક માતા-પિતાનું સપનું હતો. રસપ્રદ વાત એ છે કે, સચેતની અસલી જિંદગી પણ ફિલ્મના આ પાત્ર સાથે ઘણી મળતી આવે છે. પ્રખ્યાત બાળ કલાકારોની જેમ ગ્લેમરની પાછળ ભાગવાને બદલે સચેતે ઉચ્ચ અભ્યાસ પર પોતાનું ધ્યાન કેન્દ્રિત કર્યું હતું.
લંડનની પ્રતિષ્ઠિત ઇન્સ્ટિટ્યૂટમાંથી મેળવી ડિગ્રી, જીત્યો ગોલ્ડ મેડલ
સચેત એન્જિનિયરની લિન્ક્ડઇન પ્રોફાઇલ અનુસાર, તેણે લંડનની વિશ્વપ્રસિદ્ધ ‘UCL ઇસ્ટમેન ડેન્ટલ ઇન્સ્ટિટ્યૂટ’ માંથી પેરિયોડોન્ટોલોજીમાં M.Clin.Dent ની ડિગ્રી મેળવી છે. તે ‘યુરોપિયન ફેડરેશન ઓફ પેરિયોડોન્ટોલોજી’નો રજિસ્ટર્ડ સભ્ય છે. આ સાથે જ તેણે યુકેમાં ડેન્ટિસ્ટ તરીકે પ્રેક્ટિસ કરવા માટે જરૂરી ‘ઓવરસીઝ રજિસ્ટ્રેશન એક્ઝામિનેશન’ના બંને તબક્કા સફળતાપૂર્વક પાસ કરી લીધા છે. વિદેશ જતાં પહેલાં, તેણે ભારતની ડી.વાય. પાટિલ યુનિવર્સિટીમાંથી ગ્રેજ્યુએશન પૂરું કર્યું હતું અને પેરિયોડોન્ટોલોજીમાં ગોલ્ડ મેડલ પણ મેળવ્યો હતો.
ડેન્ટિસ્ટની સાથે પાઇલટ પણ બન્યો સચેત
સચેતની પ્રતિભા માત્ર તબીબી ક્ષેત્ર પૂરતી સીમિત નથી. વર્ષ 2024માં તેણે સોશિયલ મીડિયા પર એરક્રાફ્ટના કોકપિટમાંથી એક તસવીર શેર કરી હતી, જેનાથી ખુલાસો થયો હતો કે તે ફ્લાઇંગનો પણ ભારે શોખીન છે અને એક પાઇલટ બનવાની દિશામાં આગળ વધી રહ્યો છે. એક બાળ કલાકારમાંથી સીધા ગોલ્ડ મેડલિસ્ટ ડેન્ટિસ્ટ અને પાઇલટ બનવાની તેની આ સફર ખરેખર પ્રેરણાદાયી છે.
આકસ્મિક રીતે મળ્યો હતો ‘તારે ઝમીન પર’નો રોલ
વર્ષ 2022માં આપેલા એક ઇન્ટરવ્યૂમાં સચેતે જણાવ્યું હતું કે, તેનું ફિલ્મોમાં આવવું માત્ર એક સંયોગ હતો. તેણે કહ્યું કે, “હું એક ફિલ્મી પરિવારમાંથી આવું છું. મારી દાદી ક્રિષ્ણા કુમારી સેઠ અભિનેત્રી હતા અને દાદા સૂરજ પ્રકાશ ફિલ્મ પ્રોડ્યુસર હતા. આ કારણે હું હંમેશા ફિલ્મી માહોલમાં રહ્યો, પણ મારો ક્યારેય એક્ટિંગનો પ્લાન નહોતો. ફિલ્મમેકર્સ ખરેખર મારા નાના ભાઈનું ઓડિશન લઈ રહ્યા હતા, હું બસ ત્યાં હાજર હતો અને તેમણે મને પણ ઓડિશન આપવા કહ્યું. ત્યારે મારી ઉંમર માત્ર 11 વર્ષની હતી અને મને રોલ મળી ગયો.”
સુપરહિટ ફિલ્મ બાદ ઓફર્સ ઠુકરાવી દીધી
ફિલ્મની જબરદસ્ત સફળતા બાદ તેને ઘણી મોટી ફિલ્મોની ઓફર્સ મળી હતી, પરંતુ તેણે ભણતરને પ્રાથમિકતા આપીને તમામ ઓફર્સ નકારી કાઢી હતી. સચેતે જણાવ્યું હતું કે, આજે પણ ઘણા લોકો તેને રસ્તા પર ઓળખી કાઢે છે અથવા તો તેમને લાગે છે કે આ ચહેરો ક્યાંક જોયો છે. સચેતે અગાઉ સંકેત આપ્યો હતો કે અભ્યાસ પૂરો થયા બાદ તે બોલિવૂડમાં વાપસી કરવાનું વિચારી શકે છે, પરંતુ તેના ચાર વર્ષ બાદ પણ હજી સુધી તેના કમબેકના કોઈ અણસાર દેખાઈ રહ્યા નથી. હાલમાં તે લંડનમાં પોતાની સફળ તબીબી કારકિર્દીનો આનંદ માણી રહ્યો છે.
