ઉ. પ્રદેશનું બાંદા 46.4 ડિગ્રી તાપમાન સાથે દેશનું સૌથી ગરમ સ્થળ, અરુણાચલમાં ભારે પૂર | UP is hottest place in the country with a temperature of 46 4 degrees heavy floods in Arunachal
– વિશ્વના સૌથી ગરમ 50 શહેરો ભારતના
– શિમલામાં સામાન્ય વરસાદથી પર્યટકોને ગરમીથી રાહત, કેરળમાં એક જિલ્લામાં ઓરેન્જ, છ જિલ્લામાં યલો એલર્ટ
– ઉ. પ્રદેશમાં તાપમાન વધશે, અનેક રાજ્યોમાં હજુ એક સપ્તાહ સુધી હીટવેવ-ગરમીથી કોઇ જ રાહત નહીં
નવી દિલ્હી : ઉત્તર અને મધ્ય ભારતમાં અનેક રાજ્યોમાં હજુ પણ ગરમીનો પ્રકોપ યથાવત છે, શુક્રવારે તાપમાનમાં બહુ જ મામૂલી ઘટાડો જોવા મળ્યો જોકે તેમ છતા અનેક વિસ્તારોમાં તાપમાન ૪૦ ડિગ્રીથી પણ વધુ નોંધાયું હતું. જ્યારે બીજી તરફ અરુણાચલ અને હિમાચલ પ્રદેશમાં ગરમીથી રાહત મળી હતી અને ભારે વરસાદને કારણે કેટલાક વિસ્તારોમાં પૂરની સ્થિતિ પણ સર્જાઇ છે. જ્યારે વિશ્વના ટોચના સૌથી ગરમ ૫૦ શહેરો ભારતમાં નોંધાયા છે. એટલે કે ભારત હાલ સમગ્ર વિશ્વમાં ગરમીનું એપિસેન્ટર બની ગયું છે.
શુક્રવારે હવામાન વિભાગે જણાવ્યું હતું કે ઉત્તરપશ્ચિમ, મધ્ય અને પૂર્વ વિસ્તારોમાં ભારેથી અતી ભારે હીટવેવની શક્યતાઓ છે, આગામી એક સપ્તાહ સુધી ગરમીથી કોઇ જ રાહત મળે તેવા સંકેતો નથી મળી રહ્યા. દિલ્હીના તાપમાનમાં સામાન્ય ઘટાડો થયો હતો અને ૪૩.૩ ડિગ્રી નોંધાયું હતું.
પંજાબમાં અનેક વિસ્તારોમાં અસહ્ય ગરમી વચ્ચે સવારે સામાન્ય વરસાદ પડયો હતો, જેને કારણે હોશિયારપુર સહિતના કેટલાક વિસ્તારોમાં ગરમીમાં સામાન્ય રાહત રહી અને તાપમાન ૪૦ ડિગ્રીથી ઓછુ નોંધાયું હતું.
પંજાબ સરકારે સરકારી ઓફિસો, સ્કૂલ, કોલેજોનો સમય સવારે ૯થી સાંજે પાંચ વાગ્યાના બદલે સવારે ૭.૩૦થી બપોરે ૧.૩૦ વાગ્યા સુધીનો જાહેર કર્યો છે.
હરિયાણાના રોહતકનું તાપમાન ૪૫.૩ ડિગ્રી રહ્યું હતું. રાજસ્થાનનું ચિત્તોડગઢ ૪૪.૨ ડિગ્રી સાથે સૌથી ગરમ સ્થળ રહ્યું હતું, જ્યારે બિકાનેર, ચુરૂમાં પણ તાપમાન ૪૪ ડિગ્રી નોંધાયું હતું. ઉત્તર પ્રદેશનું બાંદા ૪૬.૪ ડિગ્રી સાથે સૌથી ગરમ સ્થળ રહ્યું, જે બાદ પ્રયાગરાજનું તાપમાન પણ ૪૬.૨ ડિગ્રી નોંધાયું હતું અને બીજા ક્રમે રહ્યું હતું. હવામાન વિભાગે આગાહી કરી છે કે ઉત્તર પ્રદેશમાં તાપમાન ૪૮ કલાકમાં બેથી ત્રણ ડિગ્રી વધી શકે છે.
બીજી તરફ અરુણાચલ પ્રદેશમાં ભારે વરસાદ પડયો છે જેને કારણે સુબનસીરી જિલ્લામાં પૂરની સ્થિતિ સર્જાઇ છે.
ફ્લેશ ફ્લડને કારણે કેટલાક પૂલ, મકાનો તણાયા હતા. હિમાચલ પ્રદેશમાં પર્યટન સ્થળ શિમલામાં લોકોએ ગરમીથી રાહત મેળવી છે, અહીંયા સામાન્ય વરસાદ પડયો હતો. તેથી તાપમાનમાં મોટો ઘટાડો થયો હતો.
શુક્રવારે વિશ્વના ટોચના સૌથી ગરમ ૫૦ શહેરો ભારતના નોંધાયા છે. હવામાનની માહિતી આપતી એક ખાનગી વેબસાઇટ પર વિશ્વના સૌથી ગરમ ૫૦ શહેરોની માહિતી આપવામાં આવી હતી, આ તમામ શહેરો ભારતના છે. એટલે કે હાલ ગરમીમાં ભારત સમગ્ર વિશ્વનું એપી સેન્ટર બની ગયું છે. જેમાં ટોચના સૌથી ગરમ શહેરો ઉત્તર પ્રદેશ, મહારાષ્ટ્ર, ઓડિશાના નોંધાયા હતા.
