‘રશિયા પાસેથી ઓઇલ ખરીદીની છૂટ વધારો’, સંકટ સમયે ભારતની અમેરિકા સમક્ષ માગ | India Seeks Oil Waiver Extension from US Amid Russia’s Energy Guarantee
India Seeks Oil Waiver Extension from US : મિડલ ઈસ્ટમાં વધતા તણાવ અને ઓઇલના સપ્લાયમાં ઊભા થયેલા સંકટને જોતાં ભારતે અમેરિકાને રશિયા પાસેથી ઓઇલ ખરીદવા માટે આપવામાં આવેલી છૂટ (Waiver) લંબાવવાની અપીલ કરી છે. આ છૂટની મુદત 16 મે 2026ના રોજ સમાપ્ત થઈ રહી છે. ભારતે વોશિંગ્ટનને સ્પષ્ટ કર્યું છે કે ઓઇલ બજારમાં અસ્થિરતાની સીધી અસર ભારતીય અર્થતંત્ર અને સામાન્ય જનતા પર પડી શકે છે.
રશિયાએ આપી સપ્લાયની ગેરંટી
બ્રિક્સ વિદેશ મંત્રીઓની બેઠક પહેલા રશિયન વિદેશ મંત્રી સર્ગેઈ લાવરોવે ખાતરી આપી છે કે રશિયા ભારતની ઊર્જા જરૂરિયાતોનું સંપૂર્ણ ધ્યાન રાખશે. તેમણે જણાવ્યું કે રશિયા હાઇડ્રોકાર્બન, ગેસ અને ઓઇલનો પુરવઠો સતત જાળવી રાખશે અને કુડનકુલમ ન્યુક્લિયર પ્લાન્ટ જેવા પ્રોજેક્ટ્સ દ્વારા સહયોગ ચાલુ રહેશે.
ભારતની ઓઇલ આયાતના આંકડા
ડેટા ફર્મ ક્લેપરના જણાવ્યા અનુસાર, મે મહિનામાં ભારતે રૅકોર્ડ સ્તરે રશિયન ઓઇલની આયાત કરી છે. મે મહિનામાં એક સમયે ભારતે દરરોજ 23 લાખ બેરલ ઓઇલની આયાત કરી હતી, જે આખા મહિના માટે સરેરાશ 19 લાખ બેરલ પ્રતિ દિવસ રહેવાનો અંદાજ છે.
શા માટે ભારત માટે આ મહત્ત્વનું છે?
યુક્રેન યુદ્ધ બાદ અમેરિકા ભારત પર રશિયા પાસેથી ઓઇલ ખરીદી ઘટાડવા દબાણ કરી રહ્યું છે, પરંતુ ઈરાન યુદ્ધ અને હોર્મુઝ સ્ટ્રેટમાં તણાવને કારણે વૈશ્વિક ઓઇલ સપ્લાય ખોરવાઈ શકે તેમ છે. આવી સ્થિતિમાં ભારત માટે રશિયાનું સસ્તું ઓઇલ ઘરેલું ઈંધણના ભાવ નિયંત્રિત રાખવા માટે અત્યંત જરૂરી છે.
