5મી વખત પુડુચેરીના મુખ્યમંત્રી બન્યા એન.રંગાસ્વામી, કેરલમમાં કોંગ્રેસ આજે CM નક્કી કરી શકે | N Rangasamy Sworn In as Puducherry Chief Minister for Fifth Time
Puducherry CM N Rangasamy: દક્ષિણ ભારતના રાજકારણમાં આજે (13મી મે) મોટા ફેરફારો જોવા મળ્યા છે. એક તરફ પુડુચેરીમાં એન. રંગાસ્વામીએ પાંચમી વખત મુખ્યમંત્રી તરીકે શપથ લીધા છે, તો બીજી તરફ પાડોશી રાજ્ય કેરલમમાં મુખ્યમંત્રીના નામ પર ચાલી રહેલું સસ્પેન્સ હવે અંતિમ તબક્કામાં પહોંચ્યું હોય તેવું જણાય છે.
રંગાસ્વામીના નેતૃત્વવાળા NDA ગઠબંધને બહુમતી મેળવી હતી
પુડુચેરીના લોક ભવન ખાતે આયોજિત ભવ્ય શપથવિધિ સમારોહમાં ઉપ-રાજ્યપાલ કૈલાશ નાથને એન. રંગાસ્વામીને પદ અને ગુપ્તતાના શપથ લેવડાવ્યા હતા. આ પ્રસંગે ભાજપના રાષ્ટ્રીય અધ્યક્ષ નીતિન નવીન સહિતના દિગ્ગજ નેતાઓ હાજર રહ્યા હતા. ચોથી મેના રોજ જાહેર થયેલા પરિણામોમાં NDA ગઠબંધને સ્પષ્ટ બહુમતી મેળવી હતી.
ચૂંટણી પરિણામોનું વિશ્લેષણ (કુલ બેઠકો: 30):
પુડુચેરીમાં 30 બેઠકો પર ચૂંટણી યોજાઈ હતી. AINRCએ 16માંથી 12 બેઠકો જીતીને 75%નો સૌથી વધુ સ્ટ્રાઇક રેટ હાંસલ કર્યો. ભાજપે 10માંથી 4 બેઠકો જીતીને 40% સાથે બીજું સ્થાન મેળવ્યું. કોંગ્રેસ 16 બેઠકો પર ચૂંટણી લડીને માત્ર 1 બેઠક જીતી શકી અને તેનો સ્ટ્રાઇક રેટ માત્ર 6% રહ્યો.
આ પણ વાંચો: PM મોદીની અપીલ બાદ ગુજરાત સહિત 5 રાજ્યોમાં ઈંધણ બચાવવા સરકાર એક્ટિવ, આપ્યા કડક નિર્દેશ
કેરલમમાં કેસી વેણુગોપાલ કે વીડી સતીશન?
કેરલમમાં મુખ્યમંત્રીના નામની જાહેરાત માટે ભારે કવાયત ચાલી રહી છે. પૂર્વ પ્રદેશ કોંગ્રેસ અધ્યક્ષ કે. મુરલીધરને રાહુલ ગાંધી સાથેની મુલાકાત બાદ દાવો કર્યો છે કે બુધવાર સવાર સુધીમાં નામ જાહેર થઈ જશે. સૂત્રોના જણાવ્યાનુસાર, હાઇકમાન્ડ કેસી વેણુગોપાલના નામ પર મહોર લગાવી શકે છે. ધારાસભ્ય દળની બેઠકમાં પણ 75-80% સભ્યોએ તેમને સમર્થન આપ્યું છે.
વીડી સતીશનને 6 ધારાસભ્યોનું સમર્થન મળ્યું છે. જોકે, તેમને UDF ના સહયોગી પક્ષો (IUML અને કેરળમ કોંગ્રેસ-જોસેફ) તેમજ ત્રણ પૂર્વ પ્રદેશ અધ્યક્ષોનો ટેકો મળી રહ્યો છે.
અન્ય રાજ્યોની સ્થિતિ
ઉલ્લેખનીય છે કે, 5 રાજ્યોની વિધાનસભા ચૂંટણી બાદ બંગાળ, આસામ અને તમિલનાડુમાં શપથવિધિ સંપન્ન થઈ ચૂકી છે. પુડુચેરીમાં આજે નવી સરકાર કાર્યરત થઈ ગઈ છે, જ્યારે હવે સમગ્ર દેશની નજર કેરલમ પર ટકેલી છે.
