તમિલનાડુમાં ‘વિજય’ રાજનો આરંભ! TVK ધારાસભ્ય દળના નેતા તરીકે વરણી, સ્ટાલિનનું રાજીનામું | Thalapathy Vijay Elected TVK Leader As MK Stalin Resigns After Tamil Nadu Election Defeat
Tamil Nadu Election Results 2026 : તમિલનાડુ વિધાનસભા ચૂંટણીના પરિણામોમાં સત્તાધારી દ્રવિડ મુન્નેત્ર કજગમ (DMK)ના વડા એમ. કે. સ્ટાલિનની કારમી હાર થઈ છે અને રાજ્યમાં અભિનેતા થલપતી વિજયી નીત નવી પાર્ટી તમિલગા વેત્રી કઝગમ (TVK)નો ભવ્ય વિજય થયો છે. હાર બાદ મુખ્યમંત્રી એમ.કે.સ્ટાલિને મંગળવારે (5 મે) રાજીનામું આપી દીધું છે. બીજીતરફ થલપતી વિજયને ટીવીકે ધારાસભ્ય દળના નેતા બનાવાયા છે. આ માટે તમામ ધારાસભ્યોના હસ્તાક્ષર લેવાયા છે. અત્યાર સુધીમાં 90 ધારાસભ્યોએ હસ્તાક્ષર કર્યા છે.
TVKએ 234માંથી 107 બેઠકો જીતી
તમિલનાડુની ચૂંટણીમાં વિજયની ટીવીકે સૌથી મોટી પાર્ટી બનીને ઉભરી આવી છે. ટીવીકેએ રાજ્યની કુલ 234 બેઠકોમાંથી 107 બેઠકો જીતી લીધી છે. જોકે પાર્ટી હજુ પણ બહુમતીથી 11 બેઠકો દૂર છે. જ્યારે ડીએમકેએ 59 બેઠકો અને AIADMKએ 47 બેઠકો જીતી છે.
TVK પાસે સરકાર બનાવવા બે વિકલ્પ
વિજયન(Thalapathy Vijay)ની પાર્ટી ટીવીકેએ ભલે સૌથી વધુ બેઠકો મેળવી હોય, પરંતુ તેમની પાસે સરકાર બનાવવા માટે જરૂરી બેઠકો નથી. આવી સ્થિતિમાં વિજય પાસે ગઠબંધન કરીને સરકાર બનાવવાનો અથવા કેટલીક પાર્ટીઓનો બહારથી ટેકો મેળવીને સરકાર બનાવવાનો વિકલ્પ છે. જોકે એ વાત સ્પષ્ટ છે કે, તમિલનાડુમાં ફરી ગઠબંધનની જ સરકાર બનશે. આમ કરવાથી વિજયની જ સ્થિતિ મજબૂત થશે. વિજયે ચૂંટણી પ્રચાર વખતે કહ્યું હતું કે, તેઓ સત્તામાં ભાગીદાર થવા માટે તૈયાર છે.
…તો વિજયે નાના પક્ષોનો ટેકો લેવો પડશે
થલપતિ વિજયે સરકાર બનાવવા માટે નાના પક્ષોનો ટેકો લેવો પડશે. તમિલનાડુમાં VSKએ બે, લેફ્ટે 4 અને કોંગ્રેસે 5 અને IUMLએ બે બેઠકો જીતી છે. જ્યારે ચાર ધારાસભ્યો ધરાવતી PMK વિજયને સાથ આપવા માટે સંપૂર્ણ તૈયાર છે.
સ્ટાલિને મુખ્યમંત્રી પદેથી રાજીનામું આપ્યું
તમિલનાડુમાં હાર થયા બાદ પૂર્વ મુખ્યમંત્રી અને ડીએમકેના પ્રમુખ એમ.કે.સ્ટાલિને(MK Stalin) મંગળવારે મુખ્યમંત્રી પદેથી રાજીનામું આપી દીધું છે. વિધાનસભા ચૂંટણીમાં હાર થયા બાદ સ્ટાલિને રાજ્યપાલ રાજેન્દ્ર વિશ્વનાથ અર્લેકરને રાજીનામું સોંપ્યું છે.
