એરલાઇન્સ કંપનીઓ પર ATF સંકટ, FIAએ ચેતવણી આપતાં કહ્યું, ‘જો સ્થિતિ નહીં સુધરે તો…’ | Airline Crisis: FIA Warns Flight Operations May Shut Down Due to Rising ATF Prices
Airline Crisis : જેટ ફ્યૂલના ભાવમાં વધારો અને કિંમતોમાં અનિશ્ચિતતાના કારણે દેશની એરલાઇન્સ ઇન્ડસ્ટ્રી આર્થિક સંકટમાં મૂકાઈ ગઈ છે. જો સ્થિતિ નહીં સુધરે તો ફ્લાઇટ સેવાઓ ઠપ થવાનો ખતરો વધી ગયો છે. આ મામલે ભારતીય એરલાઇન્સ કંપનીના સંગઠન ફેડરેશન ઑફ ઇન્ડિયન એરલાઇન્સે(FIA) ગંભીર ચિંતા વ્યક્ત કરીને કેન્દ્ર સરકારને પત્ર લખ્યો છે.
ATFની કિંમતમાં સહાય આપો : FIAએ મંત્રાલયને પત્ર લખ્યો
FIAએ નાગરિક ઉડ્ડયન મંત્રાલયને પત્ર લખીને તાત્કાલિક સહાયની માંગ કરી છે. FIAએ ચેતવણી આપી છે કે, ‘જો પરિસ્થિતિમાં સુધારો નહીં થાય તો ઘણી એરલાઇન્સ કંપનીઓને કામકાજ બંધ કરવા પડશે અથવા ફ્લાઇટ્સ ઓપરેશન અટકાવવાની નોબત ઊભી થશે.’
ભારતીય એરલાઇન્સ કંપનીઓ પર અનેક સંકટ
એરલાઇન ઇન્ડસ્ટ્રીના જણાવ્યા અનુસાર હાલમાં જેટ ફ્યૂઅલના ભાવ ઉથલ-પાથલની આશંકા ચાલી રહી છે, જેની સીધી અસર સ્થાનિક અને આંતરરાષ્ટ્રીય ઓપરેશનલ પર પડી રહી છે. એડ-હોક પ્રાઇસિંગ સિસ્ટમની ટીકા કરતાંં FIAએ કહ્યું કે, આ પદ્ધતિથી નેટવર્કનું સંચાલન કરવું અસ્થિર અને અવ્યવહારુ બની રહ્યું છે. ખાસ કરીને વિદેશી રૂટ પર એટીએફના ભાવમાં પ્રતિ લિટર 73થી 75 રૂપિયાનો વધારો જોવા મળ્યો છે જેના કારણે અનેક રૂટ પર વિમાન ઉડાડવા આર્થિક રીતે નુકસાનકારક સાબિત થઈ રહ્યા છે. આ સ્થિતિના કારણે ભારતીય એરલાઇન્સ માટે વિદેશી કંપનીઓ સામે ટકી રહેવું મુશ્કેલ બન્યું છે.
FIAએ એક્સાઇઝ ડ્યૂટી સ્થગિત કરવા માંગ કરી
આ સંકટમાંથી ઉગારવા માટે FIAએ સરકાર પાસે કેટલીક મહત્ત્વની માંગણીઓ મૂકી છે. સંગઠને વિનંતી કરી છે કે, ઘરેલું ઓપરેશન માટે એટીએફ પર લાગતી 11 ટકા એક્સાઇઝ ડ્યુટીને અસ્થાયી રૂપે સ્થગિત કરવામાં આવે. આ ઉપરાંત અગાઉની સ્ટાન્ડર્ડ ક્રેક બેન્ડ પ્રાઇસિંગ મિકેનિઝમ ફરી લાગુ કરવા અને મુખ્ય એવિએશન હબ પર વેટના દરમાં ઘટાડો કરવાની માંગ પણ કરવામાં આવી છે. હાલનું ટેક્સ માળખું એરલાઇન્સના ખર્ચના ભારણને વધારી રહ્યું છે જે લાંબો સમય સહન કરી શકાય તેમ નથી.
…તો ફ્લાઇટોનું સંચાલન બંધ કરવું પડશે
જો ઇંધણના ભાવમાં અસ્થિરતા ચાલુ રહેશે તો તેના ગંભીર પરિણામો આવી શકે છે. એરલાઇન કંપનીઓએ સ્પષ્ટ કહ્યું કે, આર્થિક નુકસાન વધવાને કારણે વિમાનોની ઉડાન રદ કરવાની ફરજ પડી શકે છે. આનાથી માત્ર કનેક્ટિવિટીમાં ઘટાડો થશે એવું નથી પરંતુ મુસાફરો માટે હવાઈ ભાડામાં પણ મોટો ઉછાળો આવી શકે છે અને ફ્લાઇટના શિડ્યુલમાં મોટી અનિશ્ચિતતા સર્જાઈ શકે છે. હાલની આ પરિસ્થિતિ એરલાઇન સેક્ટર માટે અસ્તિત્વની લડાઈ સમાન બની ગઈ છે જેમાં સરકારના હસ્તક્ષેપ વગર સામાન્ય મુસાફરો અને ઉદ્યોગ બંનેને મોટું નુકસાન થવાની પૂરી શક્યતા છે.
