વડોદરાના રાવપુરમાં બેફામ દોડતી વૈભવી કાર ટ્રાફિક સિગ્નલના થાંભલા સાથે ભટકાઈ, ચાલક ફરાર | Vadodara Luxury Car Rams Signal Pole Near Khodiyar Temple Driver Runs Away
Vadodara News: વડોદરા શહેરના રાવપુરા ટાવર ચાર રસ્તા પાસે ખોડીયાર માતાના મંદિર પાસે શુક્રવારે (છઠ્ઠી ફેબ્રુઆરી) મોડી રાત્રે એક ગંભીર અકસ્માત સર્જાયો હતો. જ્યુબિલી બાગ તરફથી પૂર ઝડપે આવી રહેલી વૈભવી કાર ટ્રાફિક સિગ્નલના પોલ સાથે ધડાકાભેર અથડાઈ હતી. અકસ્માત સર્જ્યા બાદ કારનો ચાલક સ્થળ પરથી નાસી છૂટ્યો હતો.
કોઈ જાનહાની થઈ નથી
ઘટનાની જાણ થતા રાવપુરા પોલીસે તાત્કાલિક સ્થળ પર પહોંચી તપાસ હાથ ધરી હતી. પોલીસે સરકારી મિલકતને નુકસાન પહોંચાડવું, મોટર વાહન અધિનિયમ સહિતની સંબંધિત કલમો હેઠળ ગુનો નોંધી કાયદેસરની કાર્યવાહી શરૂ કરી છે. આ ઘટનાના સીસીટીવી વીડિયો હાલ સોશિયલ મીડિયા પર વાઈરલ થયા છે. વીડિયોમાં કારચાલક પૂર ઝડપે ઓવરટેક કરવાનો પ્રયાસ કરતા નિયંત્રણ ગુમાવી અકસ્માત સર્જાયો હોવાનું સ્પષ્ટ દેખાઈ રહ્યું છે. મોડી રાત્રે ઘટના ઘટી હોવાથી સદનસીબે કોઈ જાનહાની થઈ નહોતી. અકસ્માત બાદ વૈભીવી કારનો ચાલક કોણ હતો, તે નશાની હાલતમાં હતો કે નહીં તેમજ કારની ઝડપ અને અન્ય પરિસ્થિતિઓ અંગે હાલ શહેરમાં ચર્ચા ચાલી રહી છે. પોલીસે સીસીટીવી ફૂટેજના આધારે ફરાર ચાલકની શોધખોળ ઝડપી બનાવી છે.
