અમદાવાદઃ “તે મારી નહિ તો કોઈની નહિ”, મંગેતર સાથે વાત કરતી પ્રેમિકાને પ્રેમીએ માર્યા છરીના ઘા

અમદાવાદ: શહેરના પૂર્વ વિસ્તારમાં રહેતી એક યુવતીને ફ્લેટમાં જ રહેતા એક યુવક સાથે પ્રેમ સંબંધ હતો. પણ પરિવારજનોએ યુવતીની સગાઈ સમાજના યુવક સાથે કરી દેતા યુવતીએ પ્રેમીને સંબંધ ન રાખવા જણાવ્યું હતું. પણ પ્રેમી પ્રેમમાં પાગલ હતો અને તેને યુવતી અને તેના મંગેતર ને ધમકી આપી હતી કે “તે મારી નહિ તો કોઈની નહિ”. યુવતી જ્યારે મંગેતર સાથે વાત કરતી હતી ત્યારે જ પ્રેમી આવ્યો અને તેણે યુવતીને ઉપરાછાપરી છરીના ઘા મારી દેતા યુવતીને હોસ્પિટલ ખસેડાઇ હતી પોલીસે આ મામલે હત્યાની કોશિશ નો ગુનો નોંધી તપાસ શરૂ કરી છે.

મૂળ રાજસ્થાનની 26 વર્ષીય યુવતી તેના માતા પિતા અને બે બહેનો સાથે પૂર્વ વિસ્તારમાં રહે છે અને છૂટક સિલાઈ કામ કરે છે. આજથી સાતેક વર્ષ પહેલા તેના ફ્લેટના અન્ય બ્લોકમાં રહેતા જીમ્મી નામના યુવક સાથે તેને મિત્રતા થઈ હતી. આ મિત્રતા પ્રેમમાં પરિણમી હતી. પણ ઘરમાં આ યુવતી મોટી હોવાથી તેની જવાબદારી વધુ હોવાથી લગ્ન કરી શકાય તેમ ન હોવાનું તેણે જીમ્મી ને જણાવ્યું હતું.

બાદમાં માતાપિતા ના કહેવાથી રાજસ્થાનના યુવક સાથે આ યુવતીએ વર્ષ 2020 માં સગાઈ કરી લીધી હતી. યુવતીએ જીમ્મી ને પણ સગાઈની જાણ કરી પ્રેમ સંબંધ નો અંત લાવવા જણાવ્યું હતું. પણ જીમ્મી પ્રેમમાં પાગલ થઈ ગયો હતો અને યુવતીની વાત માનતો ન હતો. યુવતીએ પણ આ વાત તેના ઘરે કરી ન હતી.