સુરતે ચીનને માર્યો મોટો ફટકો: ભારતીય ખેલાડીઓ હવે પહેરે છે Made In Surat કાપડનાં ડ્રેસ
સુરત: કોરોનાના કારણે જ્યાં એક તરફ સુરત કાપડઉદ્યોગના ટ્રેડિંગ, પ્રોસેસિંગ, વીવિંગ સહિતના સેક્ટરની સ્થિતિ કફોડી થઈ છે, ત્યાં એકમાત્ર સર્ક્યુલર નીટિંગ સેક્ટરમાં તૈયાર થતા કાપડની દેશ અને દુનિયામાં મોટી ડિમાન્ડ આવી છે. ચીનથી દર મહિને થતી 800 ટન કાપડની આયાત સંપૂર્ણપણે અટકી છે, હવે દેશના સ્પોર્ટ્સ સેક્ટરના ખેલાડીઓ પણ સુરતમાં તૈયાર થતા કાપડનો ઉપયોગ કરતા થયા છે.
એક વર્ષ પૂર્વે જ્યાં શહેરના સર્ક્યુલર નીટિંગ સેક્ટર સાથે સંકળાયેલા એકમોની સંખ્યા ૫૫ હતી, તે આજે ૧૧૫ને પાર થઈ છે. વર્ષ 2000થી સર્ક્યુલર નીટિંગથી કાપડ ઉત્પાદન શરૂ થયું હતું. વર્ષ 2017થી ગતિ મળવાની શરૂઆત થઈ છે. સર્ક્યુલર નીટિંગ એટલે કાપડને નીટિંગ પદ્ધતિથી તૈયાર કરવામાં આવે છે. કોરોના પૂર્વે આ સેક્ટરમાં ભારતનો સૌથી મોટો હરીફ ચાઈના હતો. સ્થિતિ એવી હતી કે, દર મહિને 800 ટન જેટલું કાપડ ચાઈનાથી આયાત કરવાની નોબત આવતી હતી. એક જ વર્ષમાં સુરતના આ સેક્ટરને ચાઈના પર રહેલી નિર્ભરતા દૂર કરી લીધી છે.
સંપૂર્ણ આત્મનિર્ભર થયેલા સર્ક્યુલર નીટિંગ સેક્ટરમાં તૈયાર થતા અંડર ગાર્મેન્ટ્સ, સ્પોર્ટ્સ વેર, બેગ, શૂઝ, ટ્રેનની સીટ સહિતના સેક્ટરમાં વપરાતું કાપડ હવે ગાર્મેન્ટિંગ સેક્ટરમાં પણ પ્રથમ પસંદગીરૂપ બન્યું છે. વધુમાં, IPL (ઈન્ડિયન પ્રિમિયર લીગ) તથા ટોકિયો ઓલિમ્પિક (Tokyo Olympics) સહિતના વર્લ્ડ સ્પોર્ટ્સમાં ખેલાડીઓ દ્વારા પહેરાતું કાપડ પણ સુરત નિર્માણ કરી રહ્યું છે.
