ગુજરાતના 43 તાલુકામાં વરસાદ, સૌથી વધુ ધ્રોલમાં 4.36 ઇંચ, 20 ઓક્ટોબર સુધી આગાહી

અરબી સમુદ્રમાં સર્જાયેલાં ડિપ્રેશનથી રાજ્યનાં વાતાવરણમાં પલટો આવ્યો છે. ડબલ સિઝનનો અનુભવ થાય છે. જોકે, ડિપ્રેશન હવે ઓમાન તરફ આગળ વધી ગયું છે. પરંતુ, ડિપ્રેશનની અસરથી આગામી અઠવાડિયા દરમિયાન રાજ્યમાં ગરમી અને બફારાનું  પ્રમાણ યથાવત રહેશે. 20 ઓકટોબર સુધી અમદાવાદ સહિત રાજ્યમાં કેટલાક સ્થળે હળવાથી મધ્યમ વરસાદ પડવાની આગાહી કરવામાં આવી છે. ત્યારે રાજ્યમાં છેલ્લા 24 કલાકમાં 43 તાલુકામાં વરસાદ નોંધાયો છે. જેમાં સૌથી વધુ 43 તાલુકામાં 4 ઇંચથી વધુ વરસાદ નોંધાયો છે.

રાજ્યમાં છેલ્લા 24 કલાકમાં વરસાદની વાત કરીએ તો ધ્રોલમાં 4.36 ઇંચ, ભાવનગરના સિહોરમાં 3.68 ઇંચ, રાજકોટનાં ગોંડલમાં 2.52ઇંચ, રાજકોટનાં ધોરાજી અને કોટડાસંઘાણીમાં બે ઇંચથી વધુ વરસાદ, રાજકોટ, જૂનાગઢના વંથલી, કચ્છના રાપર, જોડીયા ભાવનગરનાં ઘોઘા તથા ભાવનગરમાં દોઢ ઇંચથી વધુ વરસાદ નોંધાયો છે.