આજથી ટી.ટી.એ.બી. દ્વારા વર્લ્ડ ટેબલ ટેનિસના બે મેગા ઇવેન્ટ્સની શરૂઆત | TTAB to host two mega events of World Table Tennis from today
ટી.ટી.એ.બી. (ટેબલ ટેનિસ એસોસિએશન ઓફ બરોડા) દ્વારા વર્લ્ડ ટેબલ ટેનિસ યુથ કન્ટેન્ડર અને વર્લ્ડ ફીડર સિરીઝનું આયોજન તા.૨થી ૧૧ જાન્યુઆરી દરમિયાન સમા ઇન્ડોર સ્પોર્ટ્સ કોમ્પ્લેક્સ ખાતે કરવામાં આવ્યું છે. આ પ્રતિષ્ઠિત ટૂર્નામેન્ટ્સમાં ભારત સહિત ૯થી વધુ દેશોના ૩૦૦થી વધુ ટોચના પેડલર્સ ભાગ લેશે.
ટી.ટી.એ.બી. દ્વારા ટી.ટી.એફ.આઈ. ( ટેબલ ટેનિસ ફેડરેશન ઓફ ઈન્ડિયા ) અને જી.એસ. ટી.ટી. એ (ગુજરાત સ્ટેટ ટેબલ ટેનિસ એસોસિએશન)ના નેજા હેઠળ આ આંતરરાષ્ટ્રીય ઇવેન્ટ્સનું આયોજન કરવામાં આવી રહ્યું છે.
વર્લ્ડ ટેબલ ટેનિસ યુથ કન્ટેન્ડર સ્પર્ધા તા. ૨થી ૫ જાન્યુઆરી દરમિયાન વડોદરામાં બીજી વખત યોજાશે, જ્યારે ડબલ્યુ.ટી.ટી. ફીડર સિરીઝ તા.૭થી ૧૧ જાન્યુઆરી દરમિયાન ભારતમાં પહેલીવાર યોજાવા જઈ રહી છે, જે શહેર અને રાજ્ય માટે ગૌરવની બાબત છે.
આ સ્પર્ધાઓમાં ૧૧થી ૧૯ વર્ષની વયના યુવા ખેલાડીઓ ઉપરાંત ઓપન એજ કેટેગરીના આંતરરાષ્ટ્રીય ક્રમાંક્તિ ખેલાડીઓ મહત્વપૂર્ણ રેન્કિંગ પોઇન્ટ્સ માટે સ્પર્ધા કરશે..
ડબલ્યુ.ટી.ટી. યુથ કન્ટેન્ડરમાં અંડર-૧૧, ૧૩, ૧૫, ૧૭ અને ૧૯ કેટેગરીમાં મેન્સ-ગર્લ્સના સિંગલ્સ તેમજ અંડર-૧૫ અને ૧૯ મિક્સ ડબલ્સ સહિત કુલ ૧૨ ઇવેન્ટ્સ યોજાશે. જ્યારે ડબલ્યુ.ટી.ટી. ફીડર સિરીઝમાં મેન્સ સિંગલ્સ, વિમેન્સ સિંગલ્સ, મેન્સ ડબલ્સ, વિમેન્સ ડબલ્સ અને મિક્સ ડબલ્સ મળી કુલ ૫ ઇવેન્ટ્સ રહેશે.
