અમદાવાદ : પેટમાં નાળિયેર જેટલી ગાંઠથી થતો અસહ્ય દુખાવો, સફળ સર્જરી થતા બાળકને થયો હાશકારો

બનાસકાંઠાના ડીસા તાલુકાના ત્રણ વર્ષનો શિવમ પોતાના બાળપણની મજા માણી રહ્યો હતો પરંતુ સાત મહિના પહેલા અચાનક જ શિવમનું પેટ દિન-પ્રતિદિન વધવા લાગ્યું. પેટની જમણી બાજુએ સોજો આવતા તેને અસહ્ય દુખાવો થવા લાગ્યો. હસતા-રમતા દીકરાને આવુ થતાં પરિવાર પર અચાનક જ આભ તુટી પડ્યુ હતું. શિવમના પિતા પેટ્રોલ પંપ પર એક સામાન્ય નોકરી કરી પરિવારનું ભરણ-પોષણ કરી રહ્યા છે.

જાન્યુઆરી મહિનામાં શિવમના માતા-પિતા ડિસાની ખાનગી હૉસ્પિટલમાં ચકાસણી અર્થે લઈ ગયા હતા. જ્યાં શિવમનું સીટી સ્કેન કરવામાં આવ્યું જેમાં તેના પેટમાં એક મોટી ગાંઠ હોવાનું જાણવા મળતા ડૉક્ટરોએ કેટલીક દવાઓની સારવાર શરૂ કરી જેથી તેને થોડું સારું થઇ ગયુ હતુ. પરંતુ થોડા સમય પછી તેને ફરીથી પેટમાં દુખાવો ઉપડતા તબીબોએ સર્જરી કરવવા માટે કહ્યુ. પરંતુ આર્થિક ભીંસના કારણે શિવમના પિતા સચીનભાઇ માટે મોંધી સર્જરી ખાનગી હોસ્પિટલમાં કરાવવું મુશ્કેલ બની રહ્યુ. જેથી તેઓ અમદાવાદની સોલા સિવિલમાં પહોંચ્યા. ત્યાં ફરીથી તેનું સીટી સ્કેન કરવામાં આવ્યું, જેમાં મેસેન્ટ્રિક સિસ્ટ હોવાનું જણાઈ આવ્યું. આ સર્જરી જટીલ હોવાથી સોલા સિવિલ હૉસ્પિટલ દ્વારા અમદાવાદ સિવિલ ખાતે સર્જરી માટે મોકલવામાં આવ્યા. તારીખ 10 જુલાઈના રોજ શિવમને અસારવા ખાતે આવેલી સિવિલ હૉસ્પિટલમાં દાખલ કરવામાં આવ્યો. બીજા દિવસે પિડિયાટ્રીક સર્જરી વિભાગના વડા ડૉ. રાકેશ જોશી અને તેમની ટીમ દ્વારા બાળકની સફળ સર્જરી કરી.

આ ઓપરેશનમાં એનેસ્થેસિયા વિભાગના ડૉ. જ્હાનવી પટેલે પણ પોતાનું યોગદાન આપ્યુ હતું. શિવમના પેટમાં ખૂબ જ મોટું મલ્ટીલોક્યુલેટેડ સિસ્ટ હતું જે મેસેન્ટ્રી (રક્ત વાહિનીઓ સાથેનો નાના આંતરડાનો ભાગ) માંથી ઉ્દભવતુ હતું.

ડૉ. જોશી વધુમાં ઉમેરે છે કે, “આ ગાંઠ આંતરડાના શરૂઆતના ભાગમાં થઈ હતી એટલે આવા કિસ્સામાં જો કોઈ ચૂક થાય અથવા ટાંકા પર રુઝ ન આવે તો દર્દી માટે ખતરારૂપ સાબિત થાય છે. મેડીકલ સાયન્સ માટે આ કિસ્સો રેર છે. અત્યાર સુધી સમગ્ર વિશ્વમાં આ પ્રકારના 822 ઓપરેશન નોંધાયા છે. અંદાજિત 2.50 લાખ વ્યક્તિએ એક વ્યક્તિમાં આ પ્રકારનો કિસ્સો જોવા મળે છે.”